İQTİSADİYYAT
SOCAR-ın ümumi aktivləri 3,1 dəfə artaraq 39,9 milyard manat təşkil edib
Bakı, 28 iyun, Nihad Budaqov, AZƏRTAC
SOCAR-ın ümumi aktivləri 2008-ci ildən bu vaxtadək 3,1 dəfə artaraq 39,9 milyard manat təşkil edib.
AZƏRTAC xəbər verir ki, bu fikirləri SOCAR-ın iqtisadi məsələlər üzrə vitse-prezidenti Süleyman Qasımov iyunun 28-də şirkətin baş ofisində ölkədə fəaliyyət göstərən QHT nümayəndələri ilə Dövlət Neft Şirkətinin 2015-ci il üzrə maliyyə hesabatına dair keçirilən görüşdə səsləndirib.
S.Qasımov bildirib ki, cari ilin iyunun 30-dək SOCAR-ın illik hesabatı audit yoxlamalarının rəyi ilə birgə şirkətin rəsmi saytında dərc olunacaq. Hazırda bununla bağlı son tamamlama işləri aparılır.
“SOCAR-ın ümumi aktivləri 39,9 milyard manata çatıb ki, bu artımın əsas səbəblərindən biri manatın dollara olan ekvivalentidir. Həmçinin dünya bazarlarında neftin qiymətinin ucuzlaşması da bu prosesə təsir edib. Şirkətin əsas borcları isə xarici valyutadadır. Təbii ki, valyutanın məzənnəsi dəyişdikcə, borcun həcmi də dəyişir. Əgər hazırda konsolidə olunmuş borcumuz 6,3 milyard dollardırsa, manat ekvivalentində bu rəqəm 9,4 milyard manat təşkil edir”, - deyə S.Qasımov əlavə edib.
O deyib ki, SOCAR hazırda bütün həyata keçirdiyi layihələri davam etdirir. Bu layihələrin icrası üçün cəlb olunmuş borcların çoxu dövlət zəmanətlidir və hissə-hissə qaytarılacaq: “SOCAR dünyanın aparıcı bankları ilə kreditləşmə əməliyyatları həyata keçirir. Bu, beynəlxalq maliyyə institutlarının SOCAR-a olan inamının və etibarının göstəricisidir. Hazırda bu banklar və maliyyə institutları SOCAR-a çox aşağı faizlərlə kreditlər ayırır. Biz çalışırıq ki, bu kreditlər uzunmüddətli olmasın. Bu səbəbdən son zamanlar biz banklardan maksimum 5 faiz olmaqla 5 illik kredit alırıq”.
SOCAR-ın Sərmayələr İdarəsinin rəisi Vaqif Əliyev isə bildirib ki, “Cənub Qaz Dəhlizi”nin tərkib hissələri olan - “Şahdəniz-2”, “Cənubi Qafqaz Boru Kəmərinin Genişləndirilməsi” (CQBKG), TANAP və TAP layihələri ümumilikdə 42,9 milyard ABŞ dollara qiymətləndirilir. “Şahdəniz-2” layihəsi 23,8 milyard, CQBKG 4,9 milyard, TANAP 9,2 milyard, TAP layihəsi isə 5 milyard dollar dəyərində ölçülür. Hazırda bu layihələrin maliyyələşdirilməsində heç bir problem yoxdur və bütün işlər qrafiki qabaqlayır.
“Bu il aprelin sonlarına “Şahdəniz-2” layihəsi üzrə nəzərdə tutulan 26 quyudan 9-u qazılıb. Layihədə ilk qazın hasilatı ilə bağlı işlərin 74,2 faizi yerinə yetirilib. 2014-2020-ci illər üzrə “Şahdəniz-2”nin ümumi kapital xərcləri inflyasiya nəzərə alınmaqla təxminən 24 milyard dollar təşkil edir. Bu məbləğdən 12 milyard dolları artıq istifadə olunub. Hazırda layihə üçün 23 ölkədən 162 avadanlıq təchizatçısı cəlb edilib. Layihə üzrə mühəndislik, tikinti və təchizat işləri ilə əlaqəli 11 milyard ABŞ dolları dəyərində əsas müqavilələr imzalanıb. Əsas müqavilələr üzrə işlər uğurla davam etdirilir və qrafiki qabaqlayır”, - deyə idarə rəisi əlavə edib.
SOCAR-ın kadr, rejim və informasiya texnologiyaları üzrə vitse-prezidenti Xalik Məmmədov isə şirkətin kadr siyasətindən və aparılan struktur dəyişikliklərindən söz açıb.
Görüşdə QHT nümayəndələrini maraqlandıran suallar cavablandırılıb.