Bakı, 21 yanvar, AZƏRTAC

Azərbaycan qədim və zəngin idman ənənələrinə malik ölkələrdəndir. Ölkəmiz idmanın müxtəlif növləri üzrə qazandığı uğurlarla dünyada tanınır. İdmançılarımız Azərbaycanı beynəlxalq arenada layiqincə təmsil edir, ən mötəbər idman yarışları ölkəmizdə yüksək səviyyədə təşkil olunur. 2015-ci ildə ilk Avropa Oyunlarının standartları məhz ölkəmizdə müəyyənləşib. Paytaxtımızda təşkil olunan Formula 1 Azərbaycan Qran-Prisi nüfuzlu idman nəşrləri tərəfindən ilin ən yaxşı yarışı adına layiq görülüb.

Respublikamızda Olimpiya idman növləri ilə yanaşı, qeyri-Olimpiya idman növləri də sürətlə inkişaf edir. Belə idman növlərindən biri də kunq-fudur.

Azərbaycan Kunq-fu Federasiyasının (AKF) vitse-prezidenti Tural Alışanlı idmanın bu növünün inkişafı və perspektivləri ilə bağlı AZƏRTAC-ın əməkdaşının suallarını cavablandırıb.

Müsahibəni təqdim edirik.

- Tural müəllim, ötən il federasiya üçün hansı əlamətdar hadisələrlə yadda qalıb?

- Azərbaycan Kunq-fu Federasiyası Azərbaycan Xalq Cümhuriyyətinin 100 illiyi münasibətilə ötən ilin mayında respublika çempionatı təşkil edib. Yarışda 500-dək idmançı birincilik uğrunda mübarizə aparıb. Yüksək səviyyədə təşkil olunan çempionatda kadetlər, yeniyetmələr, gənclər və böyüklər güclərini sınayıblar.

Ötən il idmançılarımız bir sıra beynəlxalq turnirlərə qatılıb və ölkəmizi layiqincə təmsil ediblər. Həmçinin AKF-in təşkilatçılığı ilə Bakı beynəlxalq turnirlərə ev sahibliyi edib, peşəkarlar arasında yarışlar təşkil olunub.

2018-ci ilin sonunda isə “Sərhədçi” İdman Olimpiya Mərkəzində ilk dəfə olaraq, “Prezident kuboku” turniri keçirilib. Bu yarış böyük maraqla qarşılanıb. Habelə Heydər Əliyev Mərkəzinin qarşısındakı meydanda kunq-fu üzrə açıq seminar təşkil olunub. Paytaxtın iki yüzədək sakininin qatıldığı tədbir ölkədə idmanın bu növünün kütləviləşməsi məqsədilə keçirilib. Bundan başqa, AKF-in prezidenti Nurlan Aslanovun tapşırığı ilə Bakıda və bölgələrdə də mütəmadi qaydada seminarlar təşkil edilib.

2018-ci ilin idman yekunları ilə bağlı tədbirdə dövlətimizin başçısı, Milli Olimpiya Komitəsinin prezidenti İlham Əliyev tərəfindən Azərbaycanda bədən tərbiyəsinin və idmanın inkişafında xidmətləri olan və il ərzində yüksək nailiyyətlər qazanan idmançılara və idman mütəxəssislərinə mükafatlar təqdim edilərkən federasiyamızın iki üzvünün - Babək Əliyevin və Nizami Məmmədovun da mükafatlandırılması bizi yeni uğurlara həvəsləndirir. Bütün bunları nəzərə alaraq, ötən ili AKF üçün qənaətbəxş hesab etmək olar.

- Cari ildə kunq-fu idmançılarını hansı sınaqlar gözləyir?

- Aprelin sonu-mayın əvvəlində respublika çempionatının təşkili nəzərdə tutulub. Cari ildə Avropa və dünya çempionatlarına İtaliya ev sahibliyi edəcək. Ölkə birinciliyindən sonra mötəbər yarışlar üçün heyət formalaşdırılacaq. Bundan əlavə, milli komandamızın bir neçə beynəlxalq turnirdə iştirakı planlaşdırılır.

Çalışırıq ki, cari ildə Bakıda növbəti beynəlxalq yarış təşkil edək. Düzdür, turnir cari ilin sonu - 2020-ci ilin əvvəllərinə planlaşdırılır. Ancaq biz turnirin bu il keçirilməsini istəyirik. Çünki tamaşaçılar beynəlxalq turnirlərə böyük həvəslə gəlirlər.

- Azərbaycan Kunq-fu Federasiyasının əsas hədəfləri nədən ibarətdir

- Federasiyamızın əsas hədəfi ölkəmizdə kunq-funun yeniyetmə və gənclər arasında təbliği, idmanın bu növünün kütləviliyinə nail olmaq və idmançıların peşəkarlıq səviyyəsini artırmaqdır. Həmçinin yeniyetmə və gəncləri zərərli vərdiş və əməllərdən, narkomaniyadan uzaqlaşdırmaq, onların asudə vaxtının səmərəli təşkilinə geniş imkanlar açmaqdır. Ölkəmizi beynəlxalq arenada layiqincə təmsil etmək, himnimizi səsləndirib üçrəngli bayrağımızı dalğalandırmaq təbii ki, hər bir idmançı kimi bizim də ən əsas hədəfimizdir.

Bu gün ölkəmizdə digər sahələrdə olduğu kimi, idman da sürətlə inkişaf edir. Əsası ümummilli lider Heydər Əliyev tərəfindən qoyulan idman siyasəti hazırda Azərbaycan Prezidenti İlham Əliyev tərəfindən uğurla davam və inkişaf etdirilir. Ölkəmiz irimiqyaslı idman tədbirlərinə yüksək səviyyədə ev sahibliyi edir, atletlərimiz beynəlxalq turnirlərdən yüksək əyarlı medallarla qayıdırlar. Məhz bu uğurlar Azərbaycanın dünyada idman ölkəsi kimi tanınmasına səbəb olub. Artıq beynəlxalq idman qurumlarının rəhbərləri heç bir tərəddüd etmədən irimiqyaslı turnirlərin təşkilini ölkəmizə həvalə edirlər. Yüksək təşkilatçılıq bacarığı ilə seçilən Azərbaycanda cari ildə də bir neçə nüfuzlu yarış təşkil olunacaq.

Mən idmanla yanaşı, digər istiqamətdə - diaspor sahəsində də fəaliyyət göstərirəm. Belə ki, ötən ilin dekabrında Neapol-Bakı Assosiasiyasının İdarə Heyətinin qərarı ilə bu beynəlxalq təşkilatın vitse-prezidenti vəzifəsinə təyin olunmuşam. Mənə göstərilən etimada görə, təşkilatın prezidenti Cüzeppe Kanilyaya, vitse-prezidentlər Elnur Camalxanova və Emilio Saponaraya, həmçinin Assosiasiyanın bütün üzvlərinə dərin minnətdarlığımı bildirirəm. İki ölkə arasında mədəni və iqtisadi əlaqələrin daha da möhkəmləndirilməsi üçün üzərimə düşən öhdəliyi tam məsuliyyətimlə yerinə yetirməyə çalışacağam və dövlətimizin təbliği, Azərbaycan həqiqətlərinin İtaliya ictimaiyyətinə çatdırılması istiqamətində bütün bacarığımı əsirgəməyəcəyəm.

Yeri gəlmişkən, qeyd edim ki, ötən il dekabrın 12-də Neapolun Şərqşünaslıq Universitetində ulu öndər Heydər Əliyevin anım günü ilə bağlı tədbir təşkil etdik. Tədbirdə assosiasiyamız tərəfindən italyan dilinə dublyaj olunan və dahi siyasətçinin həyat və yaradıcılığından bəhs edilən “Xilaskar ömrü” sənədli filminin nümayişi auditoriya tərəfindən böyük rəğbətlə qarşılanıb. Bundan başqa, Azərbaycan Dillər və Neapolun L'Orientale universitetləri arasında qarşılıqlı əməkdaşlığa dair memorandumun imzalanmasının təşəbbüskarı və təşkilatçısı olduq. Memorandum çərçivəsində Neapolun bu ali təhsil ocağında Azərbaycan Dilinin Təbliği Mərkəzi fəaliyyət göstərəcək.

Təşkilatın vitse-prezidenti Elnur Camalxanov Azərbaycan dilini öyrənməsi üçün ilk əyani vəsaiti universitetin tələbələrindən birinə təqdim edib. Həmin tələbə dilimizi müəyyən səviyyəyə qədər öyrəndiyi halda Assosiasiyamız tərəfindən bütün xərcləri qarşılanmaqla Azərbaycana bir həftəlik səyahət imkanı ilə təmin olunacaq. Düşünürəm ki, bu tədbirlər Azərbaycanın İtaliyada təbliği baxımdan atılan faydalı addımlardandır. İstər idman sahəsində, istərsə də diaspor sahəsində fəaliyyət göstərərək ölkəmizin təbliği işinə xidmət etməkdən qürur duyuram.

- Kunq-funun bölgələrdə inkişaf etdirilməsi istiqamətində hansı işlər görülür?

- Paytaxtla yanaşı, regionlarda da idmanın bu növünə maraq böyükdür. Hazırda Azərbaycanın bölgələrində kunq-fu zalları fəaliyyət göstərir. Ümumiyyətlə, federasiyamızda minə yaxın idmançı qeydiyyatdan keçib. Bölgələrdə çoxlu sayda perspektivli idmançılarımız var ki, onlar həmişə ölkəmizi beynəlxalq arenada yüksək səviyyədə təmsil edirlər.

“Cəlilabad” idman klubu qazandığı nailiyyətlərlə həmişə fərqlənir. Bu klubda kifayət titullu idmançılarımız məşq edirlər. Onlar üçün Cəlilabad Olimpiya İdman Kompleksində hər cür şərait yaradılıb. Klubun rəhbəri və baş məşqçisi Elvin və Aqil Mustafayev qardaşlarıdır. Onlar da idmanın bu növündə ölkəmizi layiqincə təmsil ediblər. Klub həm ölkə çempionatında, həm də beynəlxalq arenada müvəffəqiyyətlə iştirak edir. Bir müddət əvvəl Bərdədə “Alışan” idman klubu fəaliyyətə başlayıb. Klub yeni olduğu üçün hazırda orada 30-dək uşaq məşqlərə qatılır. Ümid edirəm ki, gələcəkdə klubun sıraları daha da genişlənəcək. “Xocalı” idman klubunu xüsusi vurğulamaq istərdim. Belə ki, fəallığı ilə seçilən klub məcburi köçkün uşaqlardan təşkil olunub. Bundan əlavə, şəhid və Qarabağ əlilləri ailələrinin uşaqları da klubda çıxış edirlər. Bu qəbildən və maddi imkanı zəif olan ailələrin uşaqları klublarımıza ödənişsiz qatılırlar. Regionlarda Erkin Osmanov, Rauf Gərayzadə, Səxavət Həsənov və digərləri kimi güclü idmançılarımız var və onlar da kunq-funun inkişafı istiqamətində əllərindən gələni əsirgəmirlər.

Cari ildə paytaxtdan kənarda beynəlxalq yarışlar təşkil etməyi nəzərdə tutmuşuq. Bu ölkəmizin turizm imkanlarının təbliği ilə yanaşı, bölgələrdə idmanın bu növünün inkişafına yeni təkan verəcək.

- Peşəkar kunq-fu idmançısı olmaq üçün hansı keyfiyyətlər əsas götürülür?

- Peşəkar idmançı olmaq üçün, ilk növbədə, məqsəd olmalıdır və atlet bu məqsədinə çatmaq yolunda inamla addımlamalıdır. Əvvəla deyim ki, məşqlərdən yorulmaq olmaz. Əksinə, inamla və əzmlə çalışmaq lazımdır ki, üçrəngli bayrağımız beynəlxalq arenada dalğalansın. Bu gün ölkəmizdə kifayət qədər peşəkar kunq-fu ustaları var. Ellər Orucov, Ramil Allahverdiyev, Babək Hüseynov və Emil Hacıyevin adını çəkmək yerinə düşər.

- Tural müəllim, ətraflı müsahibəyə görə sağ olun.

- Təşəkkür edirəm, sağ olun.