TÜRKİYƏ PREZİDENTİ ABDULLAH GÜLÜN NİTQİ
Hörmətli nazirlər!
Dəyərli qonaqlar!
Qars şəhərinin dəyərli insanları, vətəndaşlarım!
Bu gün biz, həqiqətən, çox xoşbəxt bir gün yaşayırıq. Bu xoşbəxt günün Azərbaycan Prezidentinin və Gürcüstan Prezidentinin də şahidi olmaları, habelə, bu əlamətdar gündə burada olmağımız, şübhəsiz ki, bizim sevincimizi daha da artırmaqdadır.
Bu gün böyük bir layihənin Türkiyə hissəsinin təməlqoyma mərasimini keçiririk. Bakı-Tbilisi-Qars dəmir yolu layihəsi, əslində, hamının bildiyi tarixi İpək yolunun təkrar canlanmasıdır. Vaxtilə bu İpək yolu ilə karvanlar gedib-gəlirdi. İndi isə bunu “Dəmir İpək yolu”nun həyata keçirilməsi ilə təkrar reallığa çeviririk. Bu, həqiqətən, böyük bir layihədir. Çünki sadəcə üç ölkəni - Azərbaycanı, Gürcüstanı və Türkiyəni dəmir yolu ilə bir-birinə bağlamır. Bu, Asiyanın mərkəzini, Çini Avropanın o biri ucu - Londonla bağlayan bir dəmir yoludur. Bu layihə tamamlandıqda, sadəcə, sərnişinlər deyil, çox böyük miqdarda yüklər də Orta Asiyadan Avropanın digər ucuna, yaxud Avropadan da Orta Asiyaya qədər daşına biləcəkdir. Bu baxımdan, layihə təkcə iki müxtəlif coğrafiyanı bir-birinə bağlamayacaq, eyni zamanda, mədəniyyətləri, fərqli anlayışları da bir-birinə qovuşduracaqdır. Bu səbəbdən, layihənin böyüklüyü çox anlaşılandır.
Bir az öncə, əziz dostlarımın, prezidentlərin söylədiyi kimi, əvvəllər bəziləri bu layihəyə bir xəyal kimi baxırdı. Əslində, bu layihə bir zamanlar unudulmuşdu, “həyata keçirilməsi mümkün deyil” bəhanəsi ilə rəflərə atılmışdı. Amma 2004-cü ildə təkrar rəflərdən qaldırıldı və üç ölkə arasında təkrar görüşlər keçirildi, danışıqlar aparıldı. Bu layihənin həyata keçirilməsi ilə bağlı siyasi iradələr güclü bir şəkildə ortaya qoyuldu. Bundan başqa, bu üç ölkəni Qazaxıstan və Çin də dəstəklədi. Qazaxıstan bu dəmir yolunun fəaliyyətə başlaması ilə xüsusilə çox maraqlanır. Hörmətli Prezident Nazarbayevlə bütün görüşlərimiz və danışıqlarımız zamanı o, bu layihəyə xüsusi diqqət yetirir.
Bütün bu səylər nəticəsində indi layihə həyata keçirilməkdədir. Keçən il Gürcüstanda təməlqoyma mərasimi keçirilərək, dəmir yolunun Gürcüstan hissəsinin tikintisi ilə bağlı tədbirlər görüldü. Bu tikintinin maliyə dəstəyi də təmin olundu. Azərbaycan Prezidenti hörmətli İlham Əliyevin layihəyə verdiyi önəmli dəstək onun həyata keçirilməsinə daha əlverişli şərait yaratdı.
Türkiyə hissəsinin tikintisini bu gündən həyata keçiririk. Türkiyə ərazisində tamamilə yeni bir xətt çəkiləcəkdir. Bunun böyük əhəmiyyəti vardır.
Bu layihə, əslində, Qafqazda sabitliyə və rifaha töhfə verəcək bir layihədir. Layihə Qafqazdakı və bölgədəki bütün ölkələrə açıqdır. Bölgənin sabitliyinə və sülhə yardımçı olan, yaxşı qonşuluq əlaqələrinə önəm verən və hörmətlə yanaşan hər bir ölkəyə açıqdır. Bu layihənin həyata keçməsi ilə, sadəcə, iqtisadi fəaliyyət deyil, öncə söylədiyim kimi, mədəni əlaqələr də daha çox canlanacaqdır. Biz böyük ümidlə və məmnuniyyətlə görürük ki, hələlik adı elan edilməyən yaxşı bir iqtisadi bölgə ortaya çıxmaqdadır. Türkiyə ilə Gürcüstan arasında sərbəst ticarət anlaşması imzalandı. Türkiyə ilə Azərbaycan arasında da ticarətin daha da asanlaşdırılması ilə bağlı ikitərəfli danışıqlar aparılır. Batumi hava limanı müştərək işlədilir. İndi İstanbuldan uçan təyyarələrin sərnişinləri Artvində pasport nəzarətindən keçmədən Batumi hava limanına enə bilirlər.
Bunlar göstərir ki, bu iqtisadi bölgə gələcəkdə daha da canlanacaqdır. Bütün bu işlərin zəminində olan önəmli amil buradakı üç ölkənin liderlərinin siyasi iradəsidir. Bu siyasi iradə davam edəcəyi təqdirdə, heç şübhəm yoxdur ki, bütün bu layihələrdən üç ölkənin xalqları, vətəndaşları faydalanacaqlar. Bu siyasi iradə daha da güclü şəkildə davam edəcək, gündəliyə yeni-yeni layihələr gələcək və həyata keçiriləcəkdir.
Mən bir daha bu layihənin uğurlu olmasını diləyirəm. Bütün bölgəmizə faydalı olmasını arzulayıram. Burada əməyi olan hər kəsə təşəkkür edirəm.
Əziz qardaşlarımın - dövlət başçılarının Türkiyədə olmalarından, bu mərasimdə iştirak etmələrindən duyduğum xoşbəxtliyi və məmnunluğu bir daha ifadə edərək, hamınıza hörmət və ehtiramımı çatdırıram.
Bir daha uğurlar diləyirəm.
X X X
Sonra dövlət başçıları üç ölkənin ərazisinin təsvir olunduğu sxematik xəritənin asıldığı səhnəyə dəvət edildilər. Azərbaycan Prezidenti İlham Əliyev, Gürcüstan Prezidenti Mixeil Saakaşvili və Türkiyə Prezidenti Abdullah Gül öz ölkələrinin “ərazisində” rəmzi dəmir yolu xətlərini qoyaraq birləşdirdilər. Stansiyadakı qatarın fiti səsləndi.
Bölmənin digər xəbərləri
