ELM VƏ TƏHSİL
Türkiyənin TürkUrolap dərnəyinin yaradıcısı Azərbaycan Tibb Universitetində
Bakı, 9 iyun, AZƏRTAC
Azərbaycan Tibb Universitetinin (ATU) rektoru, Milli Məclisin deputatı, akademik Əhliman Əmiraslanovun Türkiyənin TürkUrolap dərnəyinin yaradıcısı, professor Yaşar Ozgok ilə görüşüb.
Azərbaycan Tibb Universitetindən AZƏRTAC-a bildiriblər ki, görüşdə ATU-da keçirilən beynəlxalq laparoskopik urologiya kursunun nəticələri, həmçinin təhsil müəssisəsi ilə əməkdaşlıq məsələləri müzakirə edilib.
Görüşdən məmnun qaldığını bildirən professor Y.Ozgok ATU-nun Tədris Cərrahiyyə Klinikası ilə tanış olduğunu diqqətə çatdırıb və burada 32-ci beynəlxalq laparoskopik urologiya kursu keçirildiyini xatırladıb. TİKA-nın dəstəyi sayəsində bütün Avropada qəbul edilən belə bir kursun bu dəfə Azərbaycan Tibb Universitetində keçirilməsindən çox razı qaldığını söyləyən professor Y.Ozgok ATU ilə əməkdaşlığa yol açacaq daha bir təkliflə çıxış edərək deyib: “Bu klinikada Azərbaycan Endouroloji Dərnəyinin yaradılmasını istərdik. Bu dərnək bizim əməkdaşlığın daha da dərinləşməsinə, ATU-nun əlaqələrinin genişlənməsinə, universitetin Avropada tanınmasına səbəb olacaq”.
Bu təklifi müsbət qarşılayan akademik Ə.Əmiraslanov belə bir dərnəyin yaradılmasının hər iki tərəfə böyük fayda verəcəyini vurğulayıb. ATU-nun rektoru Azərbaycan Endouroloji Dərnəyinin yaradılması üçün hazır olduqlarını diqqətə çatdırıb.
Sonra ATU-nun nəzdində Azərbaycan Endouroloji Dərnəyinin yaradılması ilə bağlı qarşılıqlı memorandum imzalanması barədə razılıq əldə olunub.
Görüşdə ATU-nun beynəlxalq əlaqələr üzrə prorektoru Rəhimə Qabulova, beynəlxalq əlaqələr şöbəsinin müdiri Nadir Zeynalov, Tədris Cərrahiyyə Klinikasının direktoru Hacıqulu Bağırov, baş həkim Asiman Həsənov, treninq mərkəzinin müdiri Qorxmaz Əhmədov iştirak ediblər.
Xatırladaq ki, TurkUrolap dərnəyi laparoskopik urologiya sahəsində dünyanın bir çox ölkəsində təlim kursları keçirir. Növbəti 32-ci beynəlxalq tətbiqi laparoskopik urologiya kursu bu il iyunun 8-9-da ATU-nun urologiya kafedrası ilə birlikdə universitetin Tədris Cərrahiyyə Klinikasında keçirilir. Kursda nəzəri və praktik laparoskopik vərdişlər tətbiq edilir. Tədbirdə 7-si Sudandan olmaqla ümumilikdə 20 həkim, 10 tibb bacısına təlim keçirilir. Sonda Avropa Uroloqlar Assosiasiyasının beynəlxalq E-BLUS sertifikatı üçün imtahan keçiriləcək. Kursun prezidentləri Türkiyə tərəfdən TürkUrolap dərnəyinin yaradıcısı professor Yaşar Ozgok, Azərbaycan tərəfdən ATU-nun urologiya kafedrasının müdiri, AMEA-nın müxbir üzvü Südeyf İmamverdiyevdir.