Hörmətli xanımlar və cənablar!

Hörmətli qonaqlar!

Bu gün gözəl bir gündür. Bizim Azərbaycanda yeni bir tibb müəssisəsi, Uşaq Bərpa Mərkəzi açılır. Mən bu münasibətlə sizin hamınızı təbrik edirəm. Bu işdə bizə kömək edən Yaponiya hökumətinə və Avropa Birliyinə də öz minnətdarlığımı bildirirəm.

Son günlər ərzində ikinci dəfədir ki, mən Əmək və Əhalinin Sosial Müdafiəsi Nazirliyinin xətti ilə tikilib istifadəyə verilən obyektlərin açılışında iştirak edirəm. Bundan əvvəl, İsmayıllı rayonunda Qarabağ müharibəsi əlilləri və şəhid ailələri üçün tikilmiş evin istifadəyə verilməsində iştirak etmişdik. Bu gün isə buradayıq. Bu, onu göstərir ki, Əmək və Əhalinin Sosial Müdafiəsi Nazirliyi çox böyük iş aparır, əlillərə, ehtiyac içində yaşayanlara kömək edir, böyük qayğı göstərir. Mən nazirliyin və cənab nazir Əli Nağıyevin xidmətlərini xüsusi qiymətləndirir və qeyd edirəm.

Azərbaycanda son illər ərzində görülən bütün işlər Heydər Əliyevin siyasətinin nəticələridir. Məhz onun siyasətinin nəticəsində Azərbaycanda sosial məsələlərin böyük əksəriyyəti öz həllini tapıbdır. Heç kəs üçün sirr deyil ki, Azərbaycan hələ iqtisadi cəhətdən o qədər də güclü ölkə deyildir. Azərbaycanın çox böyük problemləri var. O problemlərin həlli ilə bağlı biz böyük işlər görürük.

Bütün bu çətinliklərə baxmayaraq, Heydər Əliyevin siyasəti nəticəsində əldə edilən uğurlar bizə imkan verir ki, Azərbaycanda ən çətin vəziyyətdə olan xəstələrə, xüsusilə uşaqlara böyük diqqət və qayğı göstərək. Bu, bir daha onu göstərir ki, Azərbaycan Respublikası Prezidentinin siyasəti məhz xalqa xidmətə yönəldilmişdir. Bu siyasət bizə imkan verib ki, belə gözəl, lazımlı, xəstələrə kömək edəcək müəssisələr tikilsin, istifadəyə verilsin. Azərbaycanda bu siyasət davam edəcəkdir. Buna alternativ siyasət ola bilməz.

Mən öz çıxışlarımda dəfələrlə bəyan etmişəm ki, gələcək fəaliyyətimdə bu siyasəti rəhbər tutaraq, ilk növbədə, Azərbaycanda sosial məsələlərin həllində xalqın dəstəyinə arxalanaraq, çalışacağam ki, bu istiqamətdə daha gözəl işlər görə bilək. Əminəm ki, bu, belə də olacaqdır. Əminəm ki, Əmək və Əhalinin Sosial Müdafiəsi Nazirliyi bu xeyirxah missiyanı bundan sonra da davam etdirəcək, Azərbaycanda çətin vəziyyətdə yaşayan insanlar üçün gözəl şərait yaradacaqdır.

Mən bilirəm ki, Azərbaycanın digər şəhərlərində də gözəl evlər tikilib istifadəyə verilibdir. Təəssüflər olsun ki, mən onların hamısında iştirak edə bilməmişəm. Halbuki, Əli müəllim mənə təklif etmişdi. Sadəcə, vaxt azlığından buna imkan olmadı. Amma hesab edirəm ki, gələcəkdə bütün belə gözəl tədbirlərdə iştirak edəcəyəm və insanlarımıza xidmət göstərəcək neçə-neçə belə müəssisə, obyekt, xəstəxana, bərpa mərkəzi açacağıq.

Uşaq Bərpa Mərkəzinin açılışı münasibətilə sizin hamınızı bir daha ürəkdən təbrik edirəm. Arzu etmək istəyirəm ki, burada çalışan həkimlər, mütəxəssislər uşaqlara yaxşı xidmət eləsinlər, qayğı göstərsinlər, kömək etsinlər. Əminəm ki, bu, belə də olacaqdır. Xeyirli olsun, uğurlu olsun.

Sağ olun.

X X X

Əmək və əhalinin sosial müdafiəsi naziri ƏLİ NAĞIYEV mərasim iştirakçılarına müraciətlə dedi:

- Əziz bacılar, qardaşlar, həmkarlar! Sizin hamınızın adından cənab Baş nazirə hörmət və ehtiramımızı, məhəbbətimizi bildirək, Heydər Əliyev siyasətinin ən layiqli davamçısına ən böyük dəstək olduğumuzu bundan sonra da nümayiş etdirək. Cənab Baş nazirin Azərbaycan xalqına bəyan elədiyi kimi, ən böyük təbliğat işdir. Biz fəaliyyətimizdə həmişə bunu rəhbər tutacağıq. Xalq bundan sonra da əmin olacaq ki, İlham Əliyev bu təbliğatı - yəni xalqın rifahını yaxşılaşdırmaq, qurub-yaratmaq işini gələcəkdə də davam etdirəcəkdir.

X X X

Prezidentin İcra Aparatının rəhbəri Ramiz Mehdiyev, Baş nazirin birinci müavini Artur Rasizadə və respublika hökuməti başçısının müavini Abid Şərifov, Yaponiyanın Azərbaycandakı səfiri Toşiyuki Fucivara və digər rəsmi şəxslər mərasimdə iştirak edirdilər.