Vaşinqton, 28 dekabr (AZƏRTAC). Dekabrın 27-də “Azərbaycan Araşdırmaları üzrə Vaşinqton Mərkəzi” tərəfindən Vaşinqtonda Dünya Azərbaycanlılarının Həmrəylik Günü və Yeni il münasibətilə tədbir keçirilmişdir.

Əsasən paytaxt Vaşinqton şəhəri və eləcə də yaxınlıqda yerləşən Virciniya və Merilənd ştatlarında yaşayan soydaşlarımızın qatıldıqları tədbirdə çıxış edənlər mərasimin əhəmiyyətindən danışmışlar.

“Azərbaycan Araşdırmaları üzrə Vaşinqton Mərkəzi”nin rəhbəri Qədir Şirəliyev hazırkı tədbiri təşkil etməkdə məqsədin hər bir azərbaycanlı üçün əziz olan 31 dekabr - Dünya Azərbaycanlılarının Həmrəylik Günü və Yeni İl ərəfəsində ABŞ-da yaşayan həmvətənlərimizi qardaşlıq və qarşılıqlı anlayış ruhunun hökm sürdüyü bir mühitdə toplamaq olduğunu söyləmişdir.

Azərbaycanın ABŞ-dakı səfiri Elin Süleymanov müstəqil dövlətimizin qət etdiyi inkişaf və tərəqqi yoluna nəzər salmış və Azərbaycan Respublikasının Prezidenti İlham Əliyevin dünya azərbaycanlılarına müraciətindən sitatlar gətirərək, müstəqil ölkəmizin dünyada yaşayan bütün azərbaycanlıların doğma yurdu və güvənc yeri olduğunu vurğulamış və soydaşlarımızı birgə işlər görməklə, Vətənimizin çiçəklənməsinə fəal surətdə dəstək verməyə çağırmışdır.

Vaşinqtonda fəaliyyət göstərən Qarabağ Fondunun həmtəsisçisi və sədri, Amerika Azərbaycanlıları Şəbəkəsinin direktoru Adil Bağırov bu tədbirdəki 31 dekabr-Dünya Azərbaycanlılarının Həmrəylik Gününün tarixi barədə iştirakçılara məlumat vermiş və təmsil etdiyi təşkilatların gördüyü işlər barədə danışmışdır.

Uzun illərdən bəri ABŞ-da yaşayan, əslən azərbaycanlı olan Həbib Azərsina müstəqil Azərbaycanımız və Dünya Azərbaycanlılarının Həmrəylik Günü ilə bağlı təəssüratlarını bölüşmüşdür.

Daha sonra şənlik iştirakçıları Azərbaycan mətbəxinin ləziz yeməklərinə qonaq edilmişlər. Canlı ifa vasitəsilə Azərbaycanın xalq və müasir musiqi nömrələrindən ibarət konsert proqramı təqdim olunmuşdur.

Yusif Babanlı

AZƏRTAC

Vaşinqton