DÜNYA
Xaricdə yaşayan 440 mindən çox macar Macarıstan vətəndaşlığı almaq istəyir
Budapeşt, 11 may (AZƏRTAC). Xarici ölkələrdə yaşayan 440 mindən çox etnik macar mayın 15-dək onlara sadələşdirilmiş qayda da ilə Macarıstan vətəndaşlığı verilməsi xahişi ilə bu ölkənin dövlət orqanlarına müraciət etmişdir.
Bu barədə Macarıstan hökumətinin müvəkkil naziri Tomaş Vetsel Niredqaza şəhərində mətbuat konfransında məlumat vermişdir.
Vetsel demişdir: “Xaricdə yaşayan 440 mindən çox macar mayın ortalarınadək sadələşdirilmiş prosedur üzrə vətəndaşlıq almaq üçün ərizə vermişdir. Onlardan 360 min nəfəri artıq müvafiq qaydada and içmişdir”.
Onun hesablamalarına görə, belə ərizələrin sayı payızadək yarım milyona çata bilər. Macarıstan hökumətinin müvəkkil naziri bildirmişdir ki, bu il ərizələrin sayının ötən illə müqayisədə 35 faiz artması Macarıstan vətəndaşlığına marağın artdığını təsdiq edir. Rumıniyanın Transilvaniya vilayətində yaşayan macarlar arasında Macarıstan vətəndaşı olmaq istəyənlərin sayı daha çoxdur. Belə ki, Transilvaniyadan 100 mindən yuxarı ərizə daxil olmuşdur.
Agentlikdən bildirmişlər ki, Ukraynadan 50 mindən yuxarı, Rumıniyadan 283.866, Serbiyadan 76.652, Slovakiyadan 1515, Rusiyadan 1284, ABŞ-dan 1013 - ümumən 30-dan çox ölkədən 422.870 vətəndaş 2013-cü il yanvarın 1-dək Macarıstan vətəndaşlığı verilməsi prosedurunun sadələşdirilməsi xahişi ilə bu ölkənin dövlət orqanlarına müraciət etmişdir. Onların 341.447 nəfəri artıq Macarıstana sədaqət andı içmişdir.
Macarıstan parlamenti 2010-cu il mayın 26-da vətəndaşlıq verilməsi prosedurunun sadələşdirilməsi haqqında qanun qəbul etmişdir. 1920-ci ilədək və ya 1938-1945-ci illərdə Macarıstan vətəndaşı olmuş, macar dilində danışan və milli təhlükəsizlik üçün təhlükə yaratmayan əcnəbi vətəndaşlar (yaxud onların nəslindən olanlar) da müvafiq ərizə verə bilərlər. Əvvəllər bu prosedur 1-1,5 il davam edirdi, 2011-ci ilin yanvarın 2-dən etibarən isə yalnız üç-dörd ay çəkir.
Pərvənə Qarayeva
AZƏRTAC–ın xüsusi müxbiri
Budapeşt