XOCALI AĞRISI
Xırdalan, 26 fevral (AZƏRTAC). Şəhər mədəniyyət sarayında Abşeron Rayon İcra Hakimiyyətinin təşkilatçılığı ilə Xocalı faciəsi qurbanlarının xatirəsinə həsr olunmuş tədbir keçirilmişdir.
İştirakçılar əvvəlcə foyedə gənc rəssamların “Xocalı məktəblilərin gözü ilə” mövzusunda rəsm sərgisinə tamaşa etmişlər.
Xocalı qurbanlarının xatirəsi birdəqiqəlik sükutla yad olunduqdan sonra Ramiz Duyğunun “Xocalı qisasa çağırır” pyesinin motivləri əsasında hazırlanmış kompozisiya göstərilmişdir. Mədəniyyət sarayının xalq teatrının, bədii özfəaliyyət kollektivlərinin aktyorlarının və məktəblilərin ifa etdikləri parçalarda bir gecədə öz vətənində məcburi köçkünə çevrilmiş insanların problemlərindən bəhs edilir. Bir ailənin timsalında bu insanların psixoloji, mənəvi və sosial problemləri qabardılır. Kompozisiya dahi Azərbaycan bəstəkarı Üzeyir Hacıbəylinin ölməz “Koroğlu” operasından uvertüranın səslənməsi ilə başa çatmışdır.
######
Bölmənin digər xəbərləri
