XOCALI FACİƏSİ ANILMIŞDIR
Bakı, 25 fevral (AZƏRTAC). Fevralın 25-də Azərbaycan Memarlıq və İnşaat Universitetində Xocalı soyqırımı qurbanlarının xatirəsini anma mərasimi keçirilmişdir.
Universitetin rektoru, professor Gülçöhrə Məmmədova təpədən-dırnağadək silahlanmış erməni quldurlarının 18 il əvvəl Xocalıda törətdikləri qırğınlardan danışmışdır. Tökülən günahsız qanların yerdə qalmayacağını diqqətə çatdıran rektor gəncləri Vətən yolunda həmişə mərd və mübariz olmağa çağırmışdır.
Universitetin baş müəllimi Telman İmanov, şəhid tələbə Fərhad Atakişiyevin anası Dilarə Atakişiyeva Xocalıda dinc əhaliyə amansız divan tutulmasından söz açaraq vurğulamışlar ki, keçmiş SSRİ-nin 366-cı alayının dəstəyi ilə həyata keçirilən bu soyqırımı, erməni qəsbkarlarının misli görünməmiş vəhşilik aktı təkcə xalqımıza deyil, bütün bəşəriyyətə qarşı törədilmiş cinayət kimi XX əsrin tarixinə düşmüşdür.
Sonda Xocalı faciəsinə həsr olunmuş sənədli film nümayiş etdirilmişdir.
Bölmənin digər xəbərləri
