XOCALI QAN YADDAŞIMIZDIR
Bakı, 25 fevral (AZƏRTAC). Beynəlxalq Əlillər Cəmiyyəti və “Əlillər dünyası” qəzeti Xocalı soyqırımının 17-ci ildönümü ilə əlaqədar fevralın 25-də “Xocalı qan yaddaşımızdır” mövzusunda anma tədbiri keçirmişdir.
Əvvəlcə faciə qurbanlarının xatirəsi bir dəqiqəlik sükutla yad edilmişdir.
Beynəlxalq Əlillər Cəmiyyətinin sədri Tahir Xudiyev tədbiri açaraq, o müdhiş gecə erməni cəlladlarının sovet ordusunun 366-cı motoatıcı alayının köməyi ilə Xocalı sakinlərinin başına gətirdikləri müsibətlərdən danışmışdır. Bildirilmişdir ki, 1992-ci il fevralın 26-da ermənilərin törətdikləri vəhşiliklər təkcə azərbaycanlılara qarşı deyil, bütövlükdə insanlığa qarşı yönəlmiş ən qanlı cinayətlərdəndir.
Sonra çıxış edən natiqlər erməni terrorizminin bəşəriyyət üçün təhlükəli bəla olduğunu qeyd etmiş, Xocalı qətliamının qan yaddaşımıza əbədi həkk olunduğunu, tökülən günahsız qanların yerdə qalmayacağını söyləmişlər.
Tədbirdə, həmçinin xocalılara göstərilən dövlət qayğısından bəhs edilmişdir.
Bölmənin digər xəbərləri
