XOCALI QAN YADDAŞIMIZDIR
Bakı, 23 fevral (AZƏRTAC). Fevralın 23-də Bakıdakı Texniki Humanitar Liseydə Xocalı faciəsinin ildönümünə həsr olunmuş tədbir keçirilmişdir.
Salonda qanlı faciənin dəhşətlərini əks etdirən fotoguşə təşkil olunmuşdur.
Tədbirdə Azərbaycan Vətən Müharibəsi Veteranları Birliyinin sədri Füzuli Rzaquliyev, Könüllü Hərbi Vətənpərvərlik Texniki İdman Cəmiyyəti Respublika Şurasının sədri Novruzəli Orucov çıxış edərək qəsbkar ermənilərin 1992-ci il fevralın 25-dən 26-na keçən gecə Xocalıda törətdikləri qanlı hadisələrdən danışmışlar. Həmin gecə düşmən keçmiş sovet ordusunun 366-cı motoatıcı alayının şəxsi heyəti ilə birlikdə Xocalını yerlə-yeksan etmişdir.
Bildirilmişdir ki, erməni təcavüzkarlarının Azərbaycan xalqına qarşı törətdikləri bu qırğın zamanı 613 nəfərin, o cümlədən 106 qadının, 63 uşağın, 70 qocanın həyatına son qoyulmuş, 487 nəfər yaralanmış, 1275 dinc sakin əsir götürülmüşdür.
Digər çıxış edənlər də faciənin dəhşətlərindən bəhs etmişlər.
Mərasimdə liseyin şagirdləri “Dumanda itən şəhər...” mövzusunda ədəbi-bədii kompozisiya göstərmişlər.
Bölmənin digər xəbərləri
