Xocalı qan yaddaşımızdır
Bakı, 23 fevral (AZƏRTAC). Fevralın 23-də M.S.Ordubadinin ev-muzeyində Xocalı soyqırımının 19-cu ildönümünə həsr olunmuş “Xocalı qan yaddaşımızdır” adlı tədbir keçirilmişdir.
AZƏRTAC xəbər verir ki, tədbirdə Bakıdakı 169 nömrəli məktəbin şagirdləri və Respublika Gənc Turistlər və Diyarşünaslıq Mərkəzinin (RGTDM) üzvlərinin ifasında Zərəngiz Dəmirçi Qayalının Qarabağa və Xocalıya həsr olunmuş şeirləri əsasında ədəbi-bədii kompozisiya nümayiş etdirilmişdir.
Muzeyin direktoru Lalə Abaszadə, elmi işçisi İradə Vəliyeva, Bülbülün ev-muzeyinin direktoru Adelaida Məmmədova, Dövlət Din Tarixi Muzeyinin direktoru Münəvvər Babayeva və başqaları 1992-ci il fevralın 25-dən 26-na keçən gecə dinc Xocalı sakinlərinin gülləbaran edilməsini tarixi cinayət kimi qiymətləndirmişlər.
Sonda M.S.Ordubadinin ev-muzeyinin direktoru L.Abaszadə RGTDM-in üzvlərinə, 169 nömrəli məktəbin şagirdlərinə və şair Z.D.Qayalıya muzeyin təsis etdiyi fəxri fərmanları təqdim etmişdir.
Bölmənin digər xəbərləri
