Xocalı soyqırımı unudulmayacaq
Bakı, 27 fevral, AZƏRTAC
Azərbaycan Milli Elmlər Akademiyasının (AMEA) Radiasiya Problemləri İnstitutunda Xocalı faciəsinin 23-cü ildönümü ilə əlaqədar anma tədbiri keçirilib.
İnstitutdan AZƏRTAC-a bildiriblər ki, tədbirdə bu elm müəssisəsinin direktoru, akademik Adil Qəribov ermənilərin zaman-zaman xalqımıza qarşı törətdikləri vəhşiliklər və Xocalı soyqırımı ilə bağlı hadisələrdən söz açıb. Akademik qeyd edib ki, bu faciənin geniş ictimaiyyətə çatdırılması üçün Azərbaycan xalqının ümummilli lideri Heydər Əliyevin böyük əməyi olub. Məhz onun təşəbbüsü ilə Azərbaycan Respublikasının Milli Məclisində ilk dəfə bu məsələyə siyasi qiymət verilib. Xocalı soyqırımının dünya ictimaiyyətinə çatdırılmasında Heydər Əliyev Fondunun vitse-prezidenti Leyla Əliyeva genişmiqyaslı işlər görür. A.Qəribov institut əməkdaşlarını, xüsusilə də gəncləri istər ölkə daxilində, istərsə də xarici ölkələrdə iştirak etdikləri tədbirlər çərçivəsində Qarabağ həqiqətlərini təbliğ etməyə çağırıb.
Tədbirdə institut direktorunun elmi işlər üzrə müavini,
dosent Rəvan Mehdiyeva və başqaları beynəlxalq ictimaiyyətin Xocalı soyqırımına siyasi-hüquqi qiymət verməsinin vacibliyini vurğulayıblar.
Bölmənin digər xəbərləri
