Xocalısız 24 il
Yevlax, 24 fevral, AZƏRTAC
Yeni Azərbaycan Partiyası (YAP) Yevlax rayon təşkilatı və mədəniyyət və turizm idarəsinin birgə təşkilatçılığı ilə Xocalı faciəsinin ildönümünə həsr edilmiş “Xocalısız 24 il” adlı tədbir keçirilib.
AZƏRTAC xəbər verir ki, mədəniyyət evində keçirilən tədbirdə əvvəlcə Xocalı soyqırımı qurbanlarının xatirəsi bir dəqiqəlik sükutla yad edilib.
Şəhər mərkəzi mədəniyyət evinin direktoru Eldəniz Mustafayev və YAP Yevlax rayon təşkilatının aparat rəhbəri Əli Quliyev çıxış edərək, erməni millətçilərinin keçmiş SSRİ-nin 366-cı motoatıcı alayının köməyi ilə 24 il bundan əvvəl fevralın 25-dən 26-na keçən gecə Xocalı şəhərində törətdikləri qırğının acı nəticələrindən, dinc əhaliyə amansız divan tutulmasından danışıblar. Günahsız insanlara - uşaqlara, qadınlara, qocalara qarşı törədilmiş bu qırğın faktı bəşəriyyətə qarşı əsl soyqırımı kimi qiymətləndirilib.
Çıxış edən Xocalı sakinləri o dəhşətli gecədə üzləşdikləri müsibətlər, erməni millətçilərinin dinc əhaliyə amansız divan tutmasından danışıblar. Xocalıda ailə üzvlərini itirmiş Aynur Mustafayeva faciənin Azərbaycan tarixində qadınlara, körpələrə qarşı törədilmiş ən qəddar, amansız bir cinayət kimi qiymətləndirərək, dünya qadınlarını azərbaycanlı qadınlarla, analarla həmrəy olmağa çağırıb.
Tədbirdə faciəyə həsr edilən film göstərilib, iştirakçılara bukletlər paylanıb.
Bölmənin digər xəbərləri
