Yaddaşların Xocalı ağrısı
Bakı, 24 fevral, AZƏRTAC
Bakı Pedaqoji Kadrların İxtisasartırma və Yenidənhazırlanma İnstitutunda (BPKİYİ) Xocalı soyqırımının 23-cü ildönümünə həsr olunan “Yaddaşların Xocalı ağrısı” mövzusunda elmi-praktik konfrans keçirilib.
BPKİYİ-dən AZƏRTAC-a bildiriblər ki, əvvəlcə tədbir iştirakçıları anım gününə həsr olunmuş fotosərgi ilə tanış olublar.
Sonra faciə qurbanlarının xatirəsi bir dəqiqəlik sükutla yad edilib.
Tədbirdə BPKİYİ-nin rektoru, professor Asəf Zamanov çıxış edərək Xocalı soyqırımının xalqımıza və dövlətimizə, ümumilikdə bəşəriyyətə qarşı törədilən misli görünməmiş bir cinayət olduğunu söyləyib. Rektor zaman-zaman ermənilərin azərbaycanlılara qarşı həyata keçirdikləri etnik təmizləmə və deportasiya siyasətindən danışıb. Bildirilib ki, 1992-ci il fevralın 25-dən 26-na keçən gecə Azərbaycanın Xocalı şəhəri ermənilər tərəfindən yerlə-yeksan edilib, günahsız əhali vəhşicəsinə qətlə yetirilib. Bir çox insanın taleyi hələ də məlum deyil.
Qeyd edilib ki, Xocalı faciəsinə ilk siyasi-hüquqi qiymət ümummilli lider Heydər Əliyev tərəfindən verilib.
Rektor dünyanın müxtəlif ölkələrində Heydər Əliyev Fondunun vitse-prezidenti Leyla Əliyevanın təşəbbüsü ilə “Xocalıya ədalət!” beynəlxalq təbliğat-təşviqat kampaniyası çərçivəsində görülən işləri yüksək dəyərləndirib.
Tədbirdə “Xocalı şahidlərin gözü ilə”, “Xocalı soyqırımı tarixin yaddaşında”, “Xocalı harayı - gənclərin səsi” mövzularında məruzələr dinlənilib.
Sonda Xocalı faciəsinə həsr olunan sənədli film nümayiş etdirilib.
Bölmənin digər xəbərləri
