Yaşadıqca xatırlayırıq!
Kiyev, 27 fevral, AZƏRTAC
Fevralın 26-da Səməd Vurğun adına Kiyev İctimai Kitabxanasında Xocalı soyqırımı qurbanlarının anım tədbiri keçirilib. Xatirə mərasimi Azərbaycanın Ukraynadakı səfirliyi tərəfindən təşkil edilib. Bu mədəniyyət ocağının rəflərində və stendlərində Xocalı qırğını, Ermənistan-Azərbaycan, Dağlıq Qarabağ münaqişəsi haqqında Heydər Əliyev Fondu tərəfindən təqdim olunmuş kitablar, kitabçalar, rəqəmsal daşıyıcılar, habelə Azərbaycanın diplomatik nümayəndəliyi tərəfindən Ukrayna dilində nəşr etdirilmiş tematik kitab məhsulu yerləşdirilib.
Xatirə tədbirində Azərbaycan səfirliyinin əməkdaşları, Ukraynanın Xalq Artisti, müğənni Qurban Abbasov, Kiyev Milli Aviasiya Universitetinin professoru Arif Quliyev, Ukraynada Azərbaycan diasporunun əsasını qoyanlardan biri Tələt Əliyev, gənclər və diaspor təşkilatlarının rəhbərləri və fəalları, kitabxananın kollektivi, Ukrayna ictimaiyyətinin nümayəndələri və azərbaycanlı tələbələr iştirak ediblər.
Əvvəlcə tədbir iştirakçıları həlak olmuş xocalılıların nurlu xatirəsini bir dəqiqəlik sükutla anıblar. Sonra xatirə gecəsinin aparıcısı, kitabxananın direktoru Qalina Çebotaryova sözü Azərbaycanın Ukraynadakı müvəqqəti işlər vəkili Nazim Əliyevə verib.
Çıxışında Azərbaycan xalqı ilə həmrəylik nümayiş etdirdiyinə görə kitabxananın rəhbərliyinə təşəkkür edən diplomat xalqımızın qaysaqlanmayan yarasından söz açıb, erməni işğalçıları tərəfindən yer üzündən silinmiş Azərbaycanın Xocalı şəhərində qanlı qırğın barədə ictimaiyyəti öz resurs və verilişlərində məlumatlandıran Ukraynanın mətbu və elektron KİV-lərini xüsusi qeyd edib. N.Əliyev dünya birliyinin ermənilərin Xocalıdakı əməllərinə müvafiq hüquqi qiymət verməsinin vacib olduğunu vurğulayıb.
Birləşmiş Ukrayna Azərbaycanlıları Konqresinin sədri, Ukrayna Millətlər Assambleyasının rəhbəri Rövşən Tağıyev, Ukrayna Azərbaycanlı Gənclər İttifaqının (UAGİ) başçısı İlhamə Allahverdiyeva, UAGİ-nın fəalı Nizami Çələbiyev və başqaları əminliklə bildiriblər ki, ermənilər tərəfindən işğal edilmiş əzəli torpaqlarımız Azərbaycan Prezidenti İlham Əliyevin rəhbərliyi ilə mütləq azad ediləcək və erməni cəlladları gec-tez ədalət məhkəməsi qarşısında cavab verəcəklər.
Sonra Kiyevin altı məktəbinin Azərbaycan siniflərinin şagirdləri müəllimləri Səfayə Nəbiyevanın rəhbərliyi ilə Azərbaycan və rus dillərində vətənpərvərlik mövzusunda ədəbi kompozisiya təqdim ediblər.
Xocalı soyqırımı haqqında sənədli filmin nümayişindən sonra ehsan verilib.
Zeynal Ağazadə
AZƏRTAC-ın xüsusi müxbiri
Moskva
Bölmənin digər xəbərləri
