Bakı, 19 yanvar (AZƏRTAC). Əllərində Azərbaycanın üçrəngli bayrağını tutmuş gənclər dəstə-dəstə müqəddəs məkana doğru irəliləyirlər. Cərgələri sıx-sıx, baxışları iti, görkəmləri vüqarlı olan bu gənclərin istiqamət və ünvanı birdir - Şəhidlər xiyabanı.

Ölməz şəhidlərimizin uyuduğu bu müqəddəs məkan həmişəki kimi yenə də səliqə-sahmanı ilə diqqəti cəlb edir. Azərbaycan Respublikasının Prezidenti İlham Əliyevin müvafiq Sərəncamı ilə Şəhidlər xiyabanı vahid kompleks kimi yüksək səviyyədə yenidən qurularaq abadlaşdırılmışdır. Xiyabanın girişində yarasından qan sızan şəhidlərimizin mübarizə simvolu kimi ağ və qırmızı tər qərənfillərdən hazırlanmış rəmzi məşəllər hər kəsi birliyə, mətinliyə, Vətəni, torpağı, milləti sevməyə səsləyir...

AZƏRTAC xəbər verir ki, yanvarın 19-da Yeni Azərbaycan Partiyası Gənclər Birliyinin sıralarında olan gənclər Şəhidlər xiyabanında “Şəhidlər ölməz!!!” adlı anma tədbiri keçirmişdir.

Müstəqilliyimiz uğrunda şəhid olmuş həmvətənlərimizin xatirəsinə həsr edilmiş tədbirə 500-yaxın gənc qatılmışdır.

Sinələrinə 20 Yanvar şəhidlərinin fotoşəkillərini yapışdırmış gənclər xiyabanı ziyarət edərək “Əbədi məşəl” abidəsinin önündə qanlı faciə ilə bağlı Azərbaycan gənclərinin mövqeyini dünyaya bəyan etmişlər.

Tədbirdə iştirak edən YAP Gənclər Birliyinin sədri Seymur Orucov demişdir: “20 Yanvar Azərbaycan xalqının tarixində qanla yazılmış bir səhifədir. Lakin bu hadisəyə təkcə faciə kimi baxmaq düzgün olmazdı. Bu tarix həm də Azərbaycanın istiqlal yolunun ilk zirvəsi, milli məfkurəmizin, azadlıq istəyimizin oyanış günü idi. Bu, uzun illər Sovet imperiyasının əsarətində yaşayan xalqın azadlıq səsini ucaltdığı, öz suverenliyi uğrunda cəsarət nümayiş etdirdiyi şərəfli bir tarixdir. Bu tarix həm də kimin kim olduğunu sübut edən növbəti imtahan idi. Müstəqilliyimiz və azadlığımız uğrunda canlarından keçənləri heç zaman unutmayacağıq. Yanvarın 20-də də gənclərimiz bugünkü kimi bu müqəddəs məkanı ziyarət edəcəklər”.

Xalq o günlərdə böyük bir gücün — həqiqi liderin meydanda olmamasını da bütün mahiyyəti ilə dərk etdi. O müdhiş günlərdə Heydər Əliyevin — qüdrətli liderin yoxluğu günün ən böyük həqiqəti kimi dərk olundu. 20 Yanvar günündə xalqının səsinə hamıdan əvvəl səs verən də Heydər Əliyev oldu. Ümummilli liderimiz Moskvada xüsusi nəzarət altında ola-ola, özünün və ailə üzvlərinin həyatını açıq təhlükə qarşısında qoyaraq hadisələrdən dərhal sonra, 1990-cı il yanvarın 21-də oğlu, silahdaşı, o çətin günlərdə atasını bir an belə tək qoymayan İlham Əliyevlə birlikdə ölkəmizin Moskvadakı daimi nümayəndəliyinə gəldi, təcavüzə kəskin etirazını bildirdi, faciəni törədənləri, şəxsən Mixail Qorbaçovun ünvanına kəskin ittihamlar söylədi, qoşunların Bakıdan çıxarılmasını tələb etdi. SSRİ-nin hələ hökm sürdüyü bir vaxtda bu nəhəng imperiyanı və onun başçısını paytaxtın özündə tənqid etmək, sözün əsl mənasında, böyük hünər və cəsarət tələb edirdi. Ulu öndər Heydər Əliyev və oğlu İlham Əliyev bununla, hər şeydən əvvəl Vətən, xalq qarşısında vətəndaşlıq və milli mövqelərini nümayiş etdirdilər. Xalqımızın ümummilli lideri Heydər Əliyevin 1990-cı il 21 yanvar tarixli bəyanatı həm də faciəyə verilən ilk siyasi qiymət idi.

20 Yanvar xalqımızın yaddaşında silinməz yaralar qoymuş bir gündür. Tarixən bir çox xalqlar, millətlər öz müstəqilliklərinə mübarizə, müharibə hesabına qovuşmuşlar. Lakin Azərbaycan xalqının başına gətirilən faciələrin miqyası çox böyükdür. Bir neçə gün ərzində 147 nəfər öldürüldü, yüzlərlə insan yaralandı. Buna baxmayaraq təskinliyimiz odur ki, müstəqilliyimizə qovuşduq. Qanlı faciədən 23 il keçməsinə baxmayaraq xalqımız bu hadisəni unutmur. Şəhidlərimizin xatirəsi əbədiləşdirilmişdir və onların uyuduğu məzarları ziyarət etmək hər birimiz üçün mənəvi borca çevrilmişdir. Artıq bir neçə gündür ki, faciəsinin növbəti ildönümü ilə əlaqədar ölkəmizin hər yerində silsilə tədbirlər keçirilməkdədir. Eyni zamanda, şəhidlərimizi ziyarət edən insanların da ardı - arası kəsilmir. Hər bir azərbaycanlı, Vətənini sevən insan bu gənclər kimi paytaxtın ən uca yerində yerləşən müqəddəs məkanı ziyarət etməyi özünə borc bilir.

“20 Yanvar azərbaycanlılar üçün həm kədər, həm də milli qürur günü hesab olunur. Azərbaycanın azadlığı uğrunda həyatlarını qurban verən qəhrəman oğul və qızlarımız təpədən dırnağadək silahlanmış sovet qoşunlarına sinə gərərək müstəqilliyimizi bərpa etmək yolunda şanlı tarix yazmışlar”. Bu fikirlər isə Şəhidlər xiyabanını ziyarətə gələrək igid Vətən övladlarının müqəddəs xatirəsini yad etməyi özünə borc bilən YAP Gənclər birliyinin Siyasi Şurasının üzvü Daşqın Qəmbərova məxsusdur. O, 20 Yanvar faciəsini iki istiqamətdə dəyərləndirmişdir: “Birincisi, bu, millətimizin qəhrəmanlıq səhifəsidir. Ona görə ki, əliyalın insanlar həyatlarından keçərək Azərbaycanın azadlığı uğurunda vuruşmuşlar. Digər tərəfdən 1990-cı il yanvarın 19-dan 20-nə keçən gecə imperiya ordusunun xalqımıza qarşı törətdiyi qətliamdır. Tarixə nəzər salsaq, görərik ki, xalqımızın başına gətirilən müsibətlər Azərbaycanda hakimiyyətin zəif olduğu vaxtlarda baş vermişdir. Bu gün də Azərbaycanın müstəqilliyini gözü götürməyən qüvvələr müxtəlif təxribat üsulları ilə ölkəmizdə sabitliyi pozmaq istəyirlər. Onların arzularını gözlərində qoymaq üçün, bir daha belə ağır faciəni yaşamamaq üçün biz gənclər Azərbaycan hakimiyyətinin ətrafında birləşməliyik.”

Xiyaban təkcə qəhrəmanlıq deyil, həm də bir sevgi məzarlığıdır. Burada elə bir insan tapmaq olmaz ki, İlham və Fərizə faciəsinə acımasın. YAP Gənclər Birliyi Siyasi Şurasının üzvü Qabil Qafarov deyir: “23 ildir ki, hər dəfə bu günü xatırlayanda gözümüzün önündə mütləq iki qəhrəman canlanır - İlham və Fərizə! Bu cütlüyün məzarları üzərindəki foto da hər birimizin yaddaşına həkk olunmuşdur. Onlar milli azadlıq hərəkatının simvollarına çevrilmişlər. İlham və Fərizənin faciəsi millətin böyüklüyündən xəbər verir, onun ucalığını sübut edir. 20 Yanvar tarixi Vətən uğrunda şəhid olmağın, eşq uğrunda cana qıymağın tarixidir”.

Şəhidlərin məzarı önünə tər qərənfillər düzən gənclərin bir çoxunun bu gün heç 23 yaşı yoxdur. Bu, bir daha sübut edir ki, illər ötsə də, nəsillər dəyişsə də Şəhidlər xiyabanı bir müqəddəs and yeri kimi Azərbaycan xalqının tarixində qalacaq və hər zaman ziyarət olunacaqdır.

Şəhidlərimizə bir daha rəhmət diləyir, onların müqəddəs xatirəsi qarşısında baş əyirik.