İQTİSADİYYAT
Yeni İstilik Elektrik Stansiyasının inşası Azərbaycanda qeyri-neft sektorunun inkişafına önəmli töhfələr verəcək
Bakı, 13 fevral, AZƏRTAC
Bu gün müstəqillik tarixində ən böyük gücə malik olan, 1280 meqavat gücündə ən böyük İstilik Elektrik Stansiyasının təməlqoyma mərasimi keçirilib. Ölkənin əsas məqsədi, yaxın gələcəkdə həm İstilik Elektrik Stansiyaları hesabına istehsal olunan elektrik enerjisinin həcmini, həm də alternativ mənbələr əsasında elektrik enerjisinin istehsalının kəskin artırılmasıdır. Bununla da daxili istehlakın həcmi artır, Azərbaycan iqtisadiyyatının sürətli inkişafına önəmli töhfələr verir.
Bu fikirləri AZƏRTAC-a açıqlamasında iqtisadçı ekspert Xalid Kərimli söyləyib.
O vurğulayıb ki, bu investisiyaların qoyulması əsasən ixrac məqsədlidir: “Azərbaycan son illər elektrik enerjisi sahəsində ixracatçı dövlətə çevrilib. Azərbaycan elektrik enerjisi istehsalını hər il mütəmadi olaraq, natural ifadədə 4-5 faizə qədər artırır. İstilik Elektrik Stansiyalarının istehsal qabiliyyəti artırılır. Yaxın gələcəkdə Azərbaycanın alternativ enerjinin istehsalında payının 30 faizə qədər artırılacağı gözlənilir. Ötən ilin rəqəmlərinə baxsaq, Azərbaycan elektrik enerjisi istehsalını 4 faiz, ixracını isə demək olar ki, 2 dəfəyə qədər artırıb. 2021-ci ildə 1 milyard 673 milyon kilovat-saat elektrik enerjisi ixrac edilmişdisə, 2022-ci ildə artıq bu rəqəm 3 milyard kilovat-saatdan çox olub. Hazırda isə elektrik enerjisi istehsalının strukturuna baxsaq, 95-96 faizi İstilik Elektrik Stansiyalarındadır”.
“Azərbaycan yaxın gələcəkdə Zəngəzur dəhlizini keçməklə Türkiyəyə, Gürcüstandan keçməklə Qara dənizin dibi ilə Rumıniyaya, Macarıstana və Avropanın digər ölkələrinə elektrik enerjisi ixrac etməyi planlaşdırır. Ölkəmizin hazırda əsas istiqamətlərindən biri, elektrik enerjisinin istehsalını artırmaqla Avropa bazarına çıxarılmasıdır. Bu isə Azərbaycanda enerji sektorunda məşğulluğun artmasına, qeyri-neft sektorunun inkişafına və ixracının artırılmasına imkan verəcək”,- deyə ekspert qeyd edib.