Azərişıq” ASC Kəlbəcərdə yenidənqurma işlərini davam etdirir
Bakı, 31 iyul, AZƏRTAC
“Azərişıq” ASC Kəlbəcərdə yenidənqurma işlərini davam etdirir.
ASC-dən AZƏRTAC-a bildirilib ki, Prezident İlham Əliyevin müvafiq tapşırıqlarına əsasən, qurum ölkənin bütün regionlarında olduğu kimi, işğaldan azad edilən tarixi torpaqlarımızda da yenidənqurma işlərini davam etdirir.
Kəlbəcərdə də ən ucqar kəndlərə belə işıq çəkilir. Köhnə Sovet dövründən qalma xətlər yenisi ilə əvəzlənir. Hazırda Zar kəndi istiqamətində 35 Kv-luq izolyasiyalı xətlərin çəkilişi üzrə işlərə başlanılıb. Xətlərin daşınması üçün dayaqlar basdırılır, xətlər çəkilir. Paralel olaraq Mərcimək, Yellicə və Ağqaya kəndləri istiqamətində də yenidənqurma işləri aparılır.
İzolyasiyalı kabellərin açıq xətlərlə müqayisədə üstünlükləri çoxdur. Yüksək dağlıq ərazilərdə kəskin hava şəraitində açıq naqillərdə buzlaşma halları tez-tez baş verir. Əlavə olaraq meşə zolağından keçən hissədə ağacların budağının toxunması nəticəsində də açılmalar olur. Çətin relyefə malik belə yerlərdə baş verən qəzaların aradan qaldırılması da kifayət qədər vaxt tələb edir. İzolyasiyalı kabellərdə isə belə problemlər yaranmır. Nəticədə abonent dayanıqlı və keyfiyyətli elektrik enerjisi ilə təmin olunmaqla yanaşı itkilər də azalır. Üstəlik açıq kabellərdə mühafizə sonası 30 metr olmalıdır. Xətlərin onlarla kilometr uzunluğunda olduğunu nəzərə alsaq nə qədər boş torpaq sahəsi itkisi olduğunu təsəvvür etmək çətin deyil. İzolyasiyalı kabellərdə isə mühafizə zonası cəmi 4-6 metrdir. Bu da qəza baş verəcəyi halda texnikaların işləyə bilməsi üçün nəzərdə tutulub.
Prezident İlham Əliyevin 2022-ci il iyunun 26-da təməlqoyma mərasimində iştirak etdiyi Kəlbəcər Rəqəmsal İdarəetmə Mərkəzinin tikintisi davam edir. Rəqəmsal İdarəetmə Mərkəzi ən müasir avadanlıqlarla təchiz ediləcək. Bu da gələcəkdə Kəlbəcərin dayanıqlı və keyfiyyətli elektrik enerjisi ilə təmin olunmasında mühüm rol oynayacaq.
Bölmənin digər xəbərləri
