SİYASƏT
YERLİ DEMOKRATİYA HƏFTƏSİ BƏLƏDİYYƏLƏRLƏ VƏTƏNDAŞLARIN ƏLAQƏLƏRİNİN İNKİŞAFINA VƏ PROBLEMLƏRİN HƏLLİNƏ KÖMƏK GÖSTƏRƏCƏKDİR
AZƏRTAC xəbər verir ki, noyabrın 3-də Muzey Mərkəzində Prezidentin İcra Aparatı regional idarəetmə və yerli özünüidarəetmə orqanları ilə iş şöbəsinin, Azərbaycan Şəhər və Qəsəbə Bələdiyyələri Milli Assosiasiyalarının təşkilatçılığı ilə yerli demokratiya həftəsinə hazırlıqla əlaqədar Bakı, Gəncə, Mingəçevir, Şirvan və Naftalan şəhərinin və qəsəbələrin bələdiyyə sədrlərinin müşavirəsi keçirilmişdir.
Müşavirədə Prezidentin İcra Aparatı regional idarəetmə və yerli özünüidarəetmə orqanları ilə iş şöbəsinin bələdiyyələrlə iş sektorunun müdiri Ramiq Həşimov, baş məsləhətçi Rüfət Əliyev, Ədliyyə Nazirliyinin Bələdiyyələrlə İş Mərkəzinin rəisi Mehdi Səlimzadə, Şəhər Bələdiyyələri Milli Assosiasiyasının sədri Əbülfəz Babayev, Qəsəbə Bələdiyyələri Milli Assosiasiyasının sədri İlham Xəlilov, Kənd bələdiyyələri Milli Assosiasiyasının sədri Şəmistan Yusifov, Naxçıvan MR şəhər, qəsəbə və kənd bələdiyyələri assosiasiyalarının və 61 şəhər və qəsəbə bələdiyyəsinin sədrləri iştirak etmişlər.
Şəhər Bələdiyyələri Milli Assosiasiyasının və Sumqayıt bələdiyyəsinin sədri Əbülfəz Babayev bildirmişdir ki, Azərbaycan xalqı bu yaxınlarda mühüm əhəmiyyətli siyasi hadisənin şahidi olmuş, növbəti prezident seçkiləri keçirilmişdir. Həmin gün xalqımız öz dövlət başçısına olan sonsuz sədaqətini nümayiş etdirərək Yeni Azərbaycan Partiyası tərəfindən namizədliyi irəli sürülmüş partiyanın sədri İlham Əliyevi son 5 ildəki əməli fəaliyyətinə görə yenidən özünün Prezidenti seçmişdir. Bu o deməkdir ki, əsası ulu öndərimiz Heydər Əliyev tərəfindən qoyulmuş siyasi-iqtisadi inkişaf xətti davamlı olaraq həyata keçiriləcək, Prezident İlham Əliyevin böyük əzmkarlıqla reallaşdırdığı genişmiqyaslı islahatlar davam etdiriləcək, demokratik dəyərlər daha da möhkəmlənəcəkdir.
Ə.Babayev qeyd etmişdir ki, Prezident İlham Əliyevin uğurla davam etdirdiyi demokratik və hüquqi dövlət quruculuğu siyasəti nəticəsində Azərbaycanda yerli özünüidarəetmə sistemi getdikcə daha çox demokratik əsaslara yiyələnməkdədir. 2007-ci il noyabrın 5-dən 11-dək Azərbaycan bələdiyyələrinin ilk dəfə olaraq Avropa Şurasının təşəbbüsünə qoşularaq yerli demokratiya həftəsində fəal iştiak etdiyini xatırladan AŞBMA-nın sədri, həmin vaxt keçirilmiş 5 min görüşdə 350 min vətəndaşın iştirak etdiyini vurğulamışdır. Həmin görüşlərdə bələdiyyələrin fəaliyyətinin gücləndirilməsinə dair 18 min təklif irəli sürülmüşdür. Ölkə rəhbərliyinin xüsusi önəm verdiyi yerli demokratiya həftəsinin nəticələri Avropa qurumları tərəfindən Valensiya bəyannaməsində yüksək qiymətləndirilmişdir. Eyni zamanda, həftənin nəticələri iyunun 25-də keçirilmiş bələdiyyə sədrlərinin II Ümumrespublika Toplantısında müzakirə olunmuş və bu tədbirin hər il təşkili barədə qərar qəbul edilmişdir.
Qeyd edilmişdir ki, Prezidentin İcra Aparatı regional idarəetmə və yerli özünüidarəetmə orqanları ilə iş şöbəsinin dəstəyi, yerli icra hakimiyyəti orqanlarının və Ədliyyə Nazirliyi Bələdiyyələrlə iş Mərkəzinin iştirakı ilə bu il noyabrın 17-dən 23-dək keçiriləcək həftənin məqsədi yerli demokratiyanın inkişafında vətəndaşların fəallığının və hüquqi biliklərinin artırılmasıdır.
Müşavirədə məruzə ilə çıxış edən Qəsəbə Bələdiyyələri Milli Assosiasiyasının sədri İlham Xəlilov demişdir ki, növbəti demokratiya həftəsi bələdiyyələrin inkişafında, vətəndaşlar arasında nüfuzunun möhkəmlənməsində mühüm əhəmiyyət kəsb edəcəkdir. Həftə ərzində keçiriləcək tədbirlərdə vətəndaşların fəal iştirakı təmin olunmalı, bələdiyyələrin fəaliyyətində demokratik prinsiplərin gücləndirilməsinə üstünlük verilməlidir. Həftənin keçirilməsi ilə bələdiyyələr öz işlərini bitmiş hesab etməməli, bu məsələni daimi fəaliyyət proqramına çevirməlidirlər.
Azərbaycanda yerli demokratiya həftəsi ilə əlaqədar bələdiyyələr tərəfindən planlaşdırılan tədbirlərə dair tövsiyələr barədə məlumat verən İ.Xəlilov bildirmişdir ki, həftənin 2 mərhələdə həyata keçirilməsi planlaşdırılır. Birinci mərhələ hazırlıq tədbirlərini, ikinci mərhələ isə görüləcək işləri və yekun mərhələni əhatə edəcəkdir. Təklif olunan tövsiyələrdə “Seçicilərimizi eşidək” adı altında vətəndaşlarla görüşlərin təşkili, irəli sürülən təkliflərin qeydiyyatının aparılması, qaldırılan problemlərin həlli üçün müvafiq tədbirlərin görülməsi, “qaynar telefon xətləri”nin yaradılması, “bələdiyyə poçtu” qutularının quraşdırılması, fəaliyyətin nəticələrini əks etdirən lövhənin hazırlanması və digər məsələlər öz əksini tapmışdır. Bələdiyyələrin mövcud internet saytında “Bələdiyyəyə sözüm var“ pəncərəsinin açılması və bu yolla vətəndaşların müraciətlərinin qəbulu və cavablandırılması da tövsiyə olunmuşdur.
Müşavirədə Naxçıvan bələdiyyəsinin sədri Kamal Ələkbərov, Yasamal bələdiyyəsinin sədri Zakir Cəfərov, Ədliyyə Nazirliyinin Bələdiyyələrlə İş Mərkəzinin rəisi Mehdi Səlimzadə, Binəqədi bələdiyyəsinin sədri Natiq Məmmədov, Pirşağı bələdiyyəsinin sədri İlham Cəfərov, Şirvan bələdiyyəsinin sədri Əfsəlağa Babayev, Mingəçevir bələdiyyəsinin sədri Cavanşir Yusubov, Gəncə şəhəri Nizami bələdiyyəsinin sədri Faiq Əhmədov və başqaları çıxış edərək, son illər Azərbaycanda demokratik ənənələrin təşəkkülü, yerli özünüidarəetmənin inkişafı sahəsində atılan uğurlu addımlar, regionların sosial-iqtisadi inkişafı Dövlət proqramının müvəffəqiyyətli icrası nəticəsində yerlərdə əhalinin sosial rifah halının yaxşılaşması, bələdiyyələrin yerli infrastrukturun inkişafında rolu və görülmüş işlər barədə məlumat vermişlər. Bildirilmişdir ki, respublikanın şəhər və qəsəbə bələdiyyələri Azərbaycanda yerli demokratiya həftəsinin 2008-ci ildə də keçirilməsi ilə əlaqədar təklifi dəstəkləyirlər və nəzərdə tutulan tədbirlər uğurla həyata keçiriləcəkdir.
Müşavirədə Prezidentin İcra Aparatı regional idarəetmə və yerli özünüidarəetmə orqanları ilə iş şöbəsinin sektor müdiri Ramiq Həşimov çıxış edərək bildirmişdir ki, dövlətimizin başçısı İlham Əliyevin rəhbərliyi altında respublikamızda vətəndaş cəmiyyətinin formalaşması, demokratik dəyərlərin təşəkkülü istiqamətində uğurlu addımlar atılır.
Gələn il bələdiyyə seçkilərinin keçiriləcəyini xatırladan R.Həşimov qeyd etmişdir ki, yerli özünüidarəetmə orqanları bütün qüvvələrini, imkanlarını səfərbər edərək vətəndaşların etimadını təkrar qazanmaq üçün əzmlə çalışmalıdırlar. 2006-cı ilin sonlarında bələdiyyələrin milli assosiasiyalarının yaradılmasının yerli özünüidarəetmədə canlanmaya səbəb olduğunu vurğulayan R.Həşimov bu assosiasiyalar tərəfindən bələdiyyələrin fəaliyyətinin əlaqələndirilməsi və qarşıya çıxan problemlərin həllinə birlikdə nail olmaq məqsədi ilə konkret tədbirlərin hazırlanıb həyata keçirildiyini demişdir. 2008-ci il iyunun 25-də bələdiyyə sədrlərinin II Ümumrespublika toplantısının keçirildiyi, burada yerli özünüidarəetmə orqanlarının fəaliyyətinin təkmilləşdirilməsi, mövcud problemlərin həlli yollarının müəyyən edilməsi məsələlərinin müzakirə edildiyi xatırlanmışdır.
Sektor müdiri təəssüf hissi ilə qeyd etmişdir ki, bəzi hallarda vətəndaşların yerli özünüidarəetməyə cəlb olunması prosesi zəif gedir, bəzi bələdiyyə sədrləri və üzvləri hələ də vətəndaşlarla birbaşa ünsiyyətdən yayınırlar. Həftənin təşkilindən məqsəd məhz bələdiyyələrinin xalqla birbaşa təmasa cəlb edilməsidir. Həftə ərzində tövsiyə edilən tədbirlərin lazımi səviyyədə təşkili vətəndaşların bələdiyyələrə inamını, onların işində fəallığını artıracaqdır.
Noyabrın 17-dən 23-dək keçiriləcək həftənin hər bir vətəndaş tərəfindən hiss olunmasının, tədbirlər zamanı müasir texnologiyaların imkanlarından maksimum istifadə edilməsinin vacibliyi xüsusi vurğulanmışdır.
Bildirilmişdir ki, irəli sürülmüş tövsiyələr mütləq icra edilməli, yeni təşəbbüslərlə zənginləşdirilməlidir. Vətəndaşların keçiriləcək tədbirlərə kütləvi şəkildə cəlb edilməsi bələdiyyələrin fəaliyyətində demokratiyanı genişləndirməli və bu, daimi xarakter almalıdır.
Müşavirənin işinə yekun vuran Azərbaycan Şəhər Bələdiyyələri Milli Assosiasiyasının sədri Əbülfəz Babayev aparılan müzakirələrin həftə ilə bağlı qarşıda duran vəzifələrin həllində müsbət rol oynayacağına əmin olduğunu bildirmişdir. Tədbir iştirakçılarına həftə ərzində istifadə olunacaq təşviqat materialları, o cümlədən həftənin rəmzini əks etdirən plakatlar və cib təqvimləri paylanmışdır.
Noyabrın 4-dən 13-dək respublikanın 51 rayonunda bələdiyyə sədrlərinin müşavirələri davam edəcək, burada yerli icra hakimiyyət orqanlarının iştirakı ilə həftənin daha fəal keçirilməsi yolları müzakirə olunacaqdır.
######