BANM ilə “Kompleks Qazma İşləri” tresti arasında əməkdaşlıq haqqında razılaşma imzalanıb
Bakı, 8 may, AZƏRTAC
Bakı Ali Neft Məktəbi (BANM) ilə “Kompleks Qazma İşləri” tresti arasında əməkdaşlıq haqqında razılaşma imzalanıb.
BANM-dən AZƏRTAC-a bildiriblər ki, sənədi ali məktəbin rektoru Elmar Qasımov və trestin müdiri İskəndər Şirəli imzalayıblar.
Razılaşmanın şərtlərinə əsasən BANM “Kompleks Qazma İşləri” trestini müxtəlif vəsaitlərlə təmin edəcək. Sənəddə, həmçinin trestin bəzi mütəxəssislərinin müəllim kimi tədris proqramına cəlb olunması, tələbələrin istehsalat təcrübəsi və onlar üçün iş imkanlarının yaradılması, yay təcrübə proqramlarının təşkil edilməsi nəzərdə tutulub.
Tədbirdə E.Qasımov bu əməkdaşlığın hər iki müəssisə üçün səmərəli olacağına əminliyini bildirib, trestin ali məktəbə və tələbələrə diqqətini yüksək dəyərləndirib. Həyatının böyük hissəsini qazma işlərinə sərf etdiyini söyləyən İ.Şirəli tələbələrlə təcrübəsini bölüşüb, rəhbərlik etdiyi müəssisənin fəaliyyəti, gələcək planları, buradakı dünya standartlarına cavab verən maddi-texniki baza və avadanlıq barədə məlumat verib. O, hazırda trestin geoloq, qazmaçı, mexanik kimi mütəxəssislərə böyük ehtiyacı olduğunu söyləyib, həmin vakant yerlərdə BANM-ın tələbələrini görmək istədiyini bildirib.
Sonda tələbələrin sualları cavablandırılıb.
Bölmənin digər xəbərləri
