Bakı, 7 may, P.İmanova, AZƏRTAC

Mayın 7-də Bakı Slavyan Universitetində (BSU) ümummilli lider Heydər Əliyevin anadan olmasının 96-cı ildönümünə həsr edilən “Azərbaycanşünaslığın aktual problemləri” mövzusunda beynəlxalq elmi konfrans keçirilib.

AZƏRTAC xəbər verir ki, əvvəlcə konfrans iştirakçıları Fəxri xiyabana gələrək xalqımızın ümummilli lideri, müasir müstəqil Azərbaycan dövlətinin memarı və qurucusu Heydər Əliyevin xatirəsini dərin ehtiramla yad edib, məzarı önünə əklil qoyublar. Görkəmli oftalmoloq-alim, akademik Zərifə xanım Əliyevanın da xatirəsi ehtiramla anılıb, məzarı üzərinə gül dəstələri düzülüb.

Tədbirdə çıxış edən BSU-nun rektoru, professor Nurlana Əliyeva beynəlxalq elmi konfransın məqsədi, iş prinsipi və vəzifələri barədə məlumat verib. Bildirib ki, hər il universitetdə ümummilli lider Heydər Əliyevin anadan olmasının ildönümünə həsr olunan silsilə tədbirlər təşkil edilir. Həmin tədbirlərdə xarici ölkələrdən gələn qonaqların, ölkəmizdəki səfirlərin, müxtəlif beynəlxalq təşkilatların nümayəndələrinin, hökumət adamlarının, Milli Məclisin üzvlərinin iştirakı ənənəvi hal alıb. Bugünkü konfransda azərbaycanşünaslığın aktual problemlərinin araşdırılması müasir dövlətçiliyimizin strategiyasının dahi şəxsiyyətin qoyduğu prinsiplərdən kənara çıxmadığının bir göstəricisi kimi dəyərləndirilməlidir.

Rektor beynəlxalq elmi konfransın Ümummilli Liderin geniş siyasi-elmi irsinin öyrənilməsinə, dövlətçilik təcrübəsinin araşdırılmasına, onun tərəfindən irəli sürülmüş azərbaycançılıq ideologiyasının tədqiqinə həsr edildiyini söyləyib, Ulu Öndərin xalqımız və dövlətimiz qarşısındakı misilsiz xidmətlərindən söz açıb. Bildirib ki, dahi şəxsiyyət Heydər Əliyev qısa müddətdə müstəqil Azərbaycanı stabil, inkişaf etmiş qüdrətli bir dövlətə, regionun lider ölkəsinə çevirdi. Görkəmli dövlət xadimi Heydər Əliyevin uzaqgörən siyasəti nəticəsində bu gün Azərbaycanın səsi dünyanın hər yerindən gəlir. Çətin və şərəfli tarixi yol keçən Azərbaycan dövlətçiliyi bu gün möhkəm təməllər üzərində irəliləyir və böyük tarixi uğurlara imza atır. Ulu Öndərin apardığı uğurlu daxili və xarici siyasət Prezident İlham Əliyev tərəfindən qətiyyətlə davam etdirilir. Ölkə başçısı ümummilli lider Heydər Əliyevin dövlətçilik ənənəsini daha da inkişaf etdirərək iqtisadi baxımdan güclü, siyasi-diplomatik baxımdan çevik, hərbi baxımdan qüdrətli bir Azərbaycan kimi dünyada tanınmasına nail oldu.

Rektor konfransın materialları əsasında dərc olunan “Azərbaycanşünaslığın aktual problemləri” toplusunun iştirakçılara təqdim ediləcəyini söyləyib.

Təhsil nazirinin müavini İdris İsayev Ulu Öndərin Azərbaycanın müstəqillik tarixindəki rolundan danışıb. O, Ümummilli Liderin irəli sürdüyü ideologiyanın Azərbaycanı bu gün regionun ən qüdrətli dövlətinə çevirdiyini bildirib: “Ümummilli lider Heydər Əliyev Azərbaycan Respublikasının bütün istiqamətlərdə sürətli inkişaf strategiyasını yaratmış, dünya dövlətləri arasında ölkəmizin mövqelərini möhkəmlədən beynəlxalq müqavilələrə imza atmış, elm və təhsili müstəqil dövlətimizin prioritet istiqamətinə çevirmiş dahi şəxsiyyətdir. Ulu Öndər elm və təhsili müstəqil dövlətimizin prioritet istiqamətinə çevirib. İqtisadi və siyasi böhrandan uğurlu sıçrayış, nəhəng enerji layihələrinin həyata keçirilməsi, qloballaşan yeni dünya və inkişaf etmiş Avropa dəyərlərinin sintez edilərək ölkəmizdə tətbiqi məhz Ümummilli Liderin adı ilə bağlıdır. Azərbaycanşünaslığın aktual problemlərinin ümummilli lider Heydər Əliyevin anadan olmasının 96-cı ildönümünə həsr edilmiş konfransda araşdırılması müasir dövlətçiliyimizin strategiyasının dahi şəxsiyyətin qoyduğu prinsiplərdən kənara çıxmadığının bir göstəricisi kimi dəyərləndirilməlidir”.

Konfransda çıxış edən Azərbaycan Respublikasının Əqli Mülkiyyət Agentliyinin İdarə Heyətinin sədri, professor Kamran İmanov deyib: “Ümummilli lider Heydər Əliyevin böyüklüyünü, bütün sahələrə aid gördüyü işləri olduğu kimi tam şəkildə şərh etməkdə biz – onun müasirləri acizik. Yalnız illər, qərinələr ötəndən sonra bu tarixi şəxsiyyətin Vətəni, xalqı qarşısındakı xidmətlərinin əsl qiymətini zaman özü verəcək. Ulu Öndərin müasirləri onun uzaqgörənliyinin izlərini, gələcəyimizə yol açan fikir və düşüncələrinin bugünkü cəmiyyətimizin ictimai rəy və varidatına, Azərbaycanın əqli mülkiyyət sisteminin yaradıcısının irsinin ən dəyərli əqli mülkiyyətə çevrilməsini görürük və ölkəmizdə həyatın sürətlə dəyişməsinin şahidiyik. Bunun başında innovativ, yeniliklərlə və islahatlarla zəngin və insanlara xidmət edən dövlət siyasəti durur. Bunlar kreativliklə keçirilən Ulu Öndərin varislik yoludur. Tarixin hökmü tarixi şəxsiyyətlərin çətinliklər və problemlər barədə izahını yox, çətinliklər və problemlər üzərində qələbəsini tanıyır. Bu qələbəni biz bu gün Azərbaycanın inkişafında, nüfuzunun artmasında, xalqımızın ölkə Prezidentinə olan dərin ehtiram və sevgi duyğularında görürük. Azərbaycan xalqı dövlət başçısının yürütdüyü siyasətə böyük dəstək verir. Prezident İlham Əliyevin iqtisadi islahatlar konsepsiyası yeni uğurlu nəticələr verir, Azərbaycan iqtisadiyyatında artım nümayiş olunur.

Professor Kamran İmanov Ulu Öndərin “Mən fəxr edirəm ki, Azərbaycanlıyam” sözlərinin milli özünüdərkin və milli özünütəsdiqin zirvə nöqtəsini təşkil etdiyini vurğulayıb. Qeyd edib ki, müasir dəyişən dünyada ölkə rəhbərliyinin multikultural təhlükəsizliyinə əsaslanan siyasi qərarlar və xalqımızın çoxəsrlik tolerant ənənələri Azərbaycanı multikulturalizmin mərkəzinə çevirib, Azərbaycan bir çox müasir cəmiyyətlər üçün nümunəvi model olub.

Kamran İmanov dövlət başçısı İlham Əliyevin innovasiyalı inkişafla bağlı yürütdüyü iqtisadi islahatlar siyasətindən, əqli mülkiyyətin bu siyasətin təsirinə və innovativ inkişafa uyğun xidmət etməsindən də söz açıb.

Rusiya Altay Dövlət Universitetinin regional iqtisadiyyat və idarəetmə şöbəsinin müdiri, professor Vitali Mişşenko, Rusiya Volqoqrad Dövlət Sosial-Pedaqoji Universitetinin professoru Olqa Dmitriyeva, Çexiya-Azərbaycan Mədəniyyət Mərkəzinin sədri, professor Azər Kərimov və digər çıxış edənlər konfransın mövzusunun aktuallığını, azərbaycanşünaslığın aktual problemlərinin araşdırılmasında beynəlxalq tədbirin əhəmiyyətini vurğulayıblar.

Sonra konfrans işini bölmə iclaslarında davam etdirib. “Heydər Əliyev və azərbaycançılıq ideologiyası”, “Müasir beynəlxalq münasibətlər sistemində Azərbaycan”, “Azərbaycan dili və ədəbiyyatının aktual problemləri”, “Azərbaycan tarixi və mədəniyyətinin aktual problemləri”, “İctimai-siyasi elmlərin aktual problemləri” və digər mövzularda davam edən bölmə iclaslarında yerli və xarici alimlərin məruzələri dinlənilib.

Qeyd edək ki, builki konfransa ümumilikdə 181 material daxil olub, onlardan 159-u çapa tövsiyə edilib.