REGİONLAR
Lənkəranda keçirilən tədbirdə vətənpərvərlik ideyaları təbliğ olunub
Lənkəran, 27 sentyabr, Bağır Əliyev, AZƏRTAC
Sentyabrın 27-də Lənkəran Dövlət Universitetində Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının 2019-cu ilin 1-ci qrant müsabiqəsinin qaliblərindən olan “Turan Araşdırma Mərkəzi” İctimai Birliyinin icrasına başladığı “Vətən namusdur! Vətən şərəfdir! Vətən qorunacaq tək hədəfdir” layihəsi çərçivəsində maarifləndirmə tədbiri keçirilib.
AZƏRTAC-ın bölgə müxbiri xəbər verir ki, tədbirdə çıxış edən İctimai Birliyin sədr müavini Cavid İsmayıl vətənpərvərliyi ən ali insani hiss kimi dəyərləndirərək, bütün konfessiya və etnosların həmrəylik və sülh şəraitində birgə yaşayışının tarixi təcrübəsi olan Azərbaycanda multikulturalizm, tolerantlıq kimi dəyərlərin dövlət səviyyəsində təbliğ olunduğunu bildirib. Qeyd edib ki, müasir dövrdə ölkəmizdə həyata keçirilən multikulturalizm siyasəti dövlətimizin tarixi ənənələrə sadiq qaldığının bariz nümunəsidir. Lakin xaricdən yönələn təhdidlər qarşısında xalqımızın əsası ümummilli lider Heydər Əliyev tərəfindən qoyulan Azərbaycançılıq məfkurəsi ətrafında sıx birləşməsi önəmlidir.
Şair-publisist, sosioloq alim, professor Əhməd Qəşəmoğlu, “Olaylar” İnformasiya Agentliyinin baş direktoru, yazıçı-publisist Yunus Oğuz layihənin məqsəd və vəzifələrindən danışıblar.
Çıxış edənlər Azərbaycan tarixində baş verən hadisələri ətraflı təhlil edərək diqqətə çatdırıblar ki, tarixin ibrət dərslərinə biganə qalmaq olmaz, unutqanlıq xalqı məhvə sürükləyir.
“Vətənin sabahı bu gün yetişdirilən gənclərdən, onların məfkurəsindən, xalqına və vətəninə nə dərəcədə bağlılığından asılıdır”, - deyən Yunus Oğuz tarixi mövzuda yazdığı əsərlərində vətənpərvərlik mövzusunu daim diqqətdə saxladığını bildirib, kitablarını tələbələrə hədiyyə edib.
Tədbirdə vətənpərvərlik ideyalarını, Azərbaycançılıq məfkurəsini təbliğ edən, ölkəmizin məruz qaldığı tarixi faciələri əks etdirən videoçarx nümayiş olunub, iştirakçılara bukletlər və broşürlər paylanılıb.