Nur-Sultan, 3 oktyabr, AZƏRTAC

Qazaxıstan Respublikasının Nur-Sultan şəhərində Beynəlxalq Antikorrupsiya Akademiyası Üzv Dövlətləri Assambleyasının 8-ci sessiyası, eləcə də Akademiyanın İdarə Heyətinin növbəti iclası keçirilir.

AZƏRTAC xəbər verir ki, təşkilatın ümumi siyasətinin, habelə maraq doğuran digər məsələlərin müzakirə olunduğu İdarə Heyətinin iclasında Dövlət Miqrasiya Xidmətinin rəisi, III dərəcəli dövlət miqrasiya xidməti müşaviri Vüsal Hüseynov İdarə Heyətinin üzvü qismində iştirak edib.

İclasda təşkilatın gələcək inkişafı ilə bağlı məsələlər müzakirə edilib, həmçinin Beynəlxalq Antikorrupsiya Akademiyasının dekanı vəzifəsinə seçkilərə dair fikir mübadiləsi aparılıb.

İdarə Heyətinin iclasından sonra Assambleyanın 8-ci sessiyası öz işinə başlayıb. Sessiyada Azərbaycanı Dövlət Miqrasiya Xidmətinin rəisi Vüsal Hüseynovun rəhbərlik etdiyi və tərkibinə ölkəmizin Qazaxıstandakı səfiri Rəşad Məmmədovun, Korrupsiyaya qarşı mübarizə üzrə Komissiyanın katibi Kamal Cəfərovun, Baş prokuror yanında Korrupsiyaya qarşı Mübarizə Baş İdarəsinin Təşkilat və informasiya təminatı idarəsinin rəisi Səbuhi Alıyevin daxil olduğu nümayəndə heyəti təmsil edir.

Vüsal Hüseynov sessiyanın yüksək səviyyəli seqmentində çıxış edərək ölkəmizdə Prezident İlham Əliyevin rəhbərliyi ilə həyata keçirilən islahatlar və dövlət proqramları barədə ətraflı məlumat verib. O, korrupsiyaya qarşı mübarizə sahəsində beynəlxalq təşkilatlarla əməkdaşlığın Azərbaycanda prioritet istiqamətlərdən biri olduğunu, beynəlxalq təcrübə nəzərə alınaraq güclü antikorrupsiya qanunvericilik bazasının formalaşdığını, mütəmadi olaraq korrupsiyaya qarşı mübarizəyə dair mühüm institusional tədbirlərin və islahatların həyata keçirildiyini qeyd edib. Xidmət rəisi çıxışında Azərbaycan ilə Beynəlxalq Antikorrupsiya Akademiyası arasında mövcud olan əməkdaşlığın istiqamətləri barədə də məlumat verib.

Vüsal Hüseynov tədbirin üzv ölkələr arasında əməkdaşlığı təşviq etmək, qurumun son sessiyadan bəri fəaliyyətini nəzərdən keçirmək, həmçinin qlobal antikorrupsiya fəaliyyətindəki rolunu və perspektivlərini müzakirə etmək üçün yaxşı fürsət olduğunu da diqqətə çatdırıb.

Sessiyadan sonra keçirilən mətbuat konfransında iştirak edən Korrupsiyaya qarşı mübarizə üzrə Komissiyanın katibi Kamal Cəfərov ölkəmizdə korrupsiyaya qarşı mübarizə sahəsində görülən işlərdən, eləcə də dövlət xidmətlərinin göstərilməsində tətbiq olunan “bir pəncərə prinsipi”nin korrupsiya risklərinin azaldılmasına müsbət təsirindən danışıb.

Səfər çərçivəsində Azərbaycan nümayəndə heyəti Qazaxıstanın Antikorrupsiya Agentliyinin rəhbəri Alik Şpekbayevlə görüş də daxil olmaqla bir sıra ikitərəfli görüşlər keçirib. Görüşlərdə korrupsiyaya qarşı mübarizə sahəsində qarşılıqlı əməkdaşlığın perspektivləri barədə fikir mübadiləsi aparılıb.

Qeyd edək ki, sözügedən tədbirdə Beynəlxalq Antikorrupsiya Akademiyasına üzv olan 74 dövləti, müşahidəçi statusa malik ölkələri, beynəlxalq təşkilatları və qeyri-hökumət təşkilatlarını təmsil edən 500-dən çox nümayəndə iştirak edir.

İlahə Əhmədova

AZƏRTAC-ın xüsusi müxbiri

Nur-Sultan