“Cabbar Həşimov” tankeri əsaslı təmirdən sonra yenidən istismara qaytarılıb
Bakı, 6 may, AZƏRTAC
“Azərbaycan Xəzər Dəniz Gəmiçiliyi” QSC-nin (ASCO) Dəniz Nəqliyyatı Donanmasına məxsus “Cabbar Həşimov” tankeri əsaslı təmir olunub.
ASCO-dan AZƏRTAC-a bildirilib ki, təmir işləri “Zığ” Gəmi Təmiri və Tikintisi Zavodunda yüksək keyfiyyətlə aparılıb.
Təmir çərçivəsində tankerin sualtı və suüstü hissələri, əsas göyərtəsi və keçid körpüsü tam təmizlənərək rənglənib. Baş və köməkçi mühərrikləri, nasosları təmir olunub. Üzən vasitənin idarəetmə sistemləri sazlanıb. Maşın şöbəsində və boru sistemlərində təmir işləri görülüb, yararsız hissələr dəyişdirilib, gəmidə elektrik-quraşdırma işləri yerinə yetirilib. Tankerdə rabitə və elektroradionaviqasiya sahəsinə aid 1 dəst yeni elektron xəritə (ECDİS), 1 dəst maqnit kompas və exolota aid printer quraşdırılıb. Komanda-yayım qurğusu və naviqasiya avadanlıqları təmir olunub.
Bundan başqa, heyətin yaşayış otaqları, sanitar qovşaqlar və yeməkxanalar yenilənib.
Təmirdən sonra tanker dəniz sınağından uğurla keçib və istismara qaytarılıb.
“Cabbar Həşimov” gəmisinin uzunluğu 150, eni 17,3 metr, tam yükgötürmə qabiliyyəti 12 min tondur.
Bölmənin digər xəbərləri
