DÜNYA
İndoneziya Prezidenti yeni koronavirusa görə ölkədə fövqəladə vəziyyət elan edib
Tokio, 1 aprel, AZƏRTAC
İndoneziya Prezidenti Coko Vidodo yeni koronavirus təhlükəsi ilə əlaqədar ölkədə səhiyyə sahəsində fövqəladə vəziyyətin tətbiq olunduğunu elan edib.
AZƏRTAC xəbər verir ki, bu barədə “The Jakarta Post” qəzeti məlumat yayıb.
Prezidentin sözlərini sitat gətirən qəzet yazır: “Biz səhiyyə sahəsində mühüm qadağaların tətbiqi barədə qərar qəbul etdik. Prezidentin ölkədə fövqəladə vəziyyət elan olunması barədə Fərmanı qəbul olundu”.
C.Vidodo bəyan edib ki, ölkədə tətbiq ediləcək məhdudiyyət tədbirlərinə milli polis nəzarət edəcək. Bununla yanaşı, o, polisin səlahiyyətinə daxil olunan konkret məsələləri də elan edib.
İndoneziyanın hakimiyyət orqanları tərəfindən yeni koronavirusun yayılmasının qarşısını almaq məqsədilə ilk olaraq əcnəbilərin ölkəyə girişinə və çıxışına qadağa qoyulmuşdu.
Qeyd edək ki, martın 31-nə olan son məlumatlara görə, İndoneziyada yeni koronavirusa 1528 nəfər yoluxub və onlardan 14-ü ölüb.
Vüqar Ağayev
AZƏRTAC-ın xüsusi müxbiri
Tokio