İQTİSADİYYAT
“AzerGold” istiqrazlarının dövriyyəyə buraxılması ilə bağlı “Açılış zəngi” mərasimi keçirilib
Bakı, 24 sentyabr, AZƏRTAC
“AzerGold” Qapalı Səhmdar Cəmiyyətinin (QSC) istiqrazlarının mütəşəkkil kapital bazarlarına daxil olması ilə əlaqədar Bakı Fond Birjasında (BFB) “Açılış zəngi” mərasimi keçirilib.
İqtisadiyyat Nazirliyinin mətbuat xidmətindən AZƏRTAC-a bildirilib ki, mərasimdə BFB-nin idarə heyətinin sədri vəzifəsini icra edən Eldar Abdullayev, “AzerGold” QSC-nin Müşahidə Şurasının sədri Rövşən Nəcəf, “AzerGold”un idarə heyəti sədrinin müavini Xəyyam Fərzəliyev, “PAŞA Bank” ASC-nin idarə heyətinin sədri Taleh Kazımov, “PAŞA Kapital İnvestisiya Şirkəti” QSC-nin direktoru Ceyhun Hacıyev və Mərkəzi Bankın baş direktoru Əli Əhmədov iştirak ediblər. Tədbirə İqtisadiyyat naziri Mikayıl Cabbarov və emitent “AzerGold” QSC-nin idarə heyətinin sədri Zakir İbrahimov cəmiyyətin Daşkəsən rayonunda yerləşən “Çovdar” mədənindən birbaşa canlı bağlantı vasitəsilə qatılıblar.
“AzerGold”un sədri Z.İbrahimov QSC-nin istiqrazlarla bağlı reallaşan təşəbbüsünün ölkə iqtisadiyyatının inkişafına töhfə vermək, vətəndaşlara mənfəətli və etibarlı investisiya imkanları yaratmaq məqsədi daşıdığını qeyd edib. O, sözügedən emissiyanın vətəndaşların milli iqtisadiyyat və dağ-mədən sənayesinin inkişafında pay sahibi olması üçün əlverişli fürsət olduğunu diqqətə çatdırıb.
İqtisadiyyat naziri M.Cabbarov “AzerGold” istiqrazlarının tədavülə buraxılmasını kapital bazarları üzrə 2020-ci ilin ən mühüm hadisələrindən biri hesab edildiyini vurğulayıb. Nazir “AzerGold”un birja vasitəsilə həyata keçirdiyi istiqraz buraxılışının Azərbaycanda maliyyə sektorunun inkişafı istiqamətində aparılan tədbirlərin uğurlu nəticəsi olduğunu, maliyyə və dağ-mədən sektorunun inkişafına töhfə verməklə yanaşı, vətəndaşlar üçün yeni investisiya imkanlarının formalaşmasında xüsusi rol oynayacağını bildirib.
BFB-nin idarə heyətinin sədri vəzifəsini müvəqqəti icra edən E.Abdullayev yeni istiqrazların korporativ qiymətli kağızlar bazarında maliyyə alətlərinin şaxələndirilməsinə səbəb olacağını və investorlar üçün daha geniş imkanların yarandığı münbit sərmayə mühitini formalaşdıracağını diqqətə çatdırıb.
Tədbirin sonunda emitent “AzerGold” QSC-nin nümayəndəsi tərəfindən istiqrazların ilkin bazarda ticarətə buraxılışını simvolizə edən zəng çalınıb. Beləliklə, istiqrazların BFB-nin ticarət platformasında ilkin ticarətinə başlanılıb.