İDMAN
16 yaşadək oğlanlar və qızlar arasında Azərbaycan birinciliyinin seçmə yarışları davam edir
Bakı, 7 yanvar (AZƏRTAC). Şəmkir Olimpiya İdman kompleksində şahmat üzrə 16 yaşadək oğlanlar və qızlar arasında Azərbaycan birinciliyinin seçmə yarışlarında 5-ci turun görüşləri başa çatmışdır.
Azərbaycan Şahmat Federasiyasından AZƏRTAC-a bildirmişlər ki, İsveçrə sistemi ilə 9 turdan ibarət olaraq keçirilən yarışda ölkəmizin 51 rayon və bölgələrindən 333 şahmatçı iştirak edir.
Beşinci turdan sonra 8 yaşlı oğlanlar arasında Kürdəmir şahmatçısı Fərhad Məmmədəliyev 5 oyundan 5 xal toplayaraq yeganə məğlubedilməz oyunçudur. Bu yaş qrupunda mübarizə aparan digər 4 nəfər: Hüseyn Seyid (Naxçıvan AR), Fuad Əliyev və Gülümsah Ağacahan (Sumqayıt), Ayan Cabbarllı (Ucar), Nihat Şahmuradovun (Quba) aktivində isə 4 xal var.
Eyni yaşlı qızlar arasında Aysel Səlimova (Mingəçevir) 4,5 xal toplayaraq qrupun yeganə lideridir. Səmra Qasımova (Füzüli), Gülüzar Hüseynova (Sumqayıt) və Zərrin Məmmədli (Naxçıvan AR) 4 xal toplamışlar.
10 yaş oğlanlar arasında iki hakimiyyətlilikdir. Sumqayıt şahmatçıları - Rahim Əliyev və Abil Şəfiyev 5 xal toplayaraq 1-2-ci yerləri bölüşdürürlər.
Səbinə Rzalı (Sumqayıt) aktivinə 5 xal yazaraq 10 yaşlı qızlar arasında vahid liderdir. Jalə Kərimli (Sumqayıt) 4,5 xalla 2-ci, Gülsüm Məmmədzadə (Gəncə) isə 4 xalla 3-cü yerdədir.
12 yaşlı oğlanlar arasında isə üç hakimiyyətlilik hökm sürür. Belə ki, Naxçıvan şahmatçısı Sadiq Məmmədov və Sumqayıt şahmatçıları - Rəvan Əliyev və Fərid Aslanov 4,5 xal toplayaraq 1-3-cü yerləri bölüşdürürlər.
Mingəçevir şahmatçısı Minayə Əhmədova və Sumqayıtlı Şəhla Əzizova aktivlərinə 4 xal yazaraq 12 yaşlı qızlar arasında 1-2-ci yerləri bölüşdürürlər.
Sumqayıt şahmatçısı Ceyhun Hüseynzadə 5 xal toplayaraq 14 yaşlı oğlanlar arasında 100 faizlik nəticə göstərib. Seymur Mikayılov (Şirvan) və Fərid Şirinov (Mingəçevir) isə 4,5 xal toplayaraq 2-3-cü pillədə qərarlaşıblar.
14 yaşlı qızlar arasında Ləman Hüseynova (Sumqayıt ) və Aytən Səfərova (Neftçala) 4,5 xal toplayaraq qrupa liderlik edirlər. Naxçıvan şahmatçısı Aynur Kətanova isə 3,5 xalla 3-cü yerdədir.
Quba şahmatçısı Həzrət Orucov və Gəncəli Məsut Quluzadə aktivlərinə 4 xal yazaraq 16 yaşlı oğlanlar arasında 1-2-ci yerləri bölüşdürürlər.
Eyni yaşlı qızlar arasında Xəyalə Nağıyeva və Vüsalə Quliyeva 4 oyundan 2,5 xal toplayaraq 1-2-ci yerin sahibidirlər.
Hər yaş qrupu üzrə ilk üç yerləri tutan şahmatçılar medal və müvafiq dərəcəli diplomlarla, finala vəsiqə qazanan idmançılar fəxri fərmanlarla təltif ediləcəklər. Yarış yanvarın 12-də başa çatacaqdır.