Stokholm, 5 yanvar, AZƏRTAC

Keçən il Norveçdə qızılbalıq satışı hesabına rekord məbləğdə pul qazanılıb. Bu, Krallığın iqtisadiyyatının əsas hərəkətverici qüvvəsi olan neft satışından əldə edilən gəlirlərin azalmasını qismən kompensasiya etməyə imkan verib.

Norveç KİV-ləri bu barədə Norveç Dəniz Məhsulları Şurasının məlumatlarına istinadla xəbər verirlər.

Bütövlükdə 2016-cı ildə balıq ovunun azalması, dəniz parazitləri ilə bağlı problemlər, Çin bazarının genişlənməsi nəticəsində qızılbalığa tələbatın artması qızılbalığın qiymətinin 40 faiz yüksəlməsinə səbəb olub.

Norveç iqtisadiyyatı üçün xoş yenilik olan bu xəbər Krallığın balıqçılıq təsərrüfatlarını da sevindirib. Belə ki, keçən il qızılbalıq satışından əldə edilmiş gəlir 2015-ci ilin müvafiq göstəricisi ilə müqayisədə 31 faiz artaraq 65,3 milyard Norveç kronuna (təqribən 7,8 milyard ABŞ dollarına) bərabər olub. Bütövlükdə Norveç dəniz məhsullarının ixracından əldə edilən gəlirlər 23 faiz artaraq rekord məbləğə - 91,6 milyard Norveç kronuna (təqribən 10,6 milyard ABŞ dollarına) çatıb.

Qeyd edək ki, Norveçdən ixrac edilən dəniz məhsullarının üçdə iki hissəsi qızılbalığın payına düşür. Norveç dəniz məhsullarının əsas istehlakçısı Fransadır.

Analitiklərin fikrincə, dünyada qızılbalığa tələbatın artması və Norveç ilə Çin arasında diplomatik münasibətlər normallaşandan sonra Çin bazarının açılması sayəsində qızılbalığın qiymətinin artması meyli 2017-ci ildə də davam edəcək.

2010-cu ildə çinli dissident Lyu Syaobonun Osloda Nobel sülh mükafatına layiq görülməsi bu iki ölkə arasında münasibətlərin korlanmasına səbəb olmuşdu.

Rauf Əliyev

AZƏRTAC-ın xüsusi müxbiri

Stokholm