REGİONLAR


20 Yanvar xalqımızın milli oyanış tarixinin şanlı səhifəsidir

Yevlax, 18 yanvar, AZƏRTAC 

20 Yanvar Azərbaycan xalqının tarixinə qanla yazılmış səhifələrdən biridir. İllər keçsə belə, xalqımızın milli oyanış tarixinin qanlı, həm də şanlı səhifəsi olan bu faciə unudulmayacaq.

AZƏRTAC-ın bölgə müxbiri xəbər verir ki, bu fikirlər Yevlax Şəhər İcra Hakimiyyəti, Yeni Azərbaycan Partiyası (YAP) rayon təşkilatı və Yevlax Şəhər Mədəniyyət Mərkəzinin 20 Yanvar faciəsinin 29-cu ildönümü münasibətilə birgə keçirdiyi tədbirdə səsləndirilib. Tədbir iştirakçıları əvvəlcə 20 Yanvar şəhidlərinin xatirəsini bir dəqiqəlik sükutla yad ediblər.

Yevlax Şəhər İcra Hakimiyyəti başçısının müavini Qənimət Qaraşov, YAP Yevlax rayon təşkilatının sədr müavini, aparat rəhbəri Əli Quliyev və Bərdə Regional Mədəniyyət İdarəsinin nümayəndəsi Rafiq Məmmədov çıxış edərək, Azərbaycan tarixinin azadlıq mübarizəsinin və qəhrəmanlıq salnaməsinin parlaq səhifələrindən olan 20 Yanvar faciəsindən, qanlı hadisəyə siyasi-hüquqi qiymət verilməsində, şəhidlərin adının əbədiləşdirilməsində ümummilli lider Heydər Əliyevin tarixi xidmətlərindən danışıblar. Bildirilib ki, 20 Yanvar tariximizə təkcə faciə kimi yox, həm də mübarizlik, qəhrəmanlıq günü kimi daxil olub. Həmin gün xalqımızın ürəyində illərlə qalmış azadlıq, müstəqillik eşqinin oyanış günüdür. Azərbaycan xalqı 20 Yanvarda hərbi, siyasi və mənəvi təcavüzə məruz qalsa da, öz tarixi qəhrəmanlıq ənənələrinə sadiq olduğunu, Vətənin azadlığı və müstəqilliyi naminə ən ağır sınaqlara sinə gərmək, şəhid vermək əzmini bütün dünyaya nümayiş etdirib.

Tədbirdə Mədəniyyət Mərkəzinin direktoru Eldəniz Mustafayevin rəhbərliyi ilə ədəbi-bədii kompozisiya təqdim olunub. İştirakçılara YAP Yevlax rayon təşkilatı tərəfindən hazırlanmış 20 Yanvar faciəsini əks etdirən bukletlər paylanıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.