REGİONLAR


MDU-da “Karyera və perspektiv imkanlar” mövzusunda seminar keçirilib

Bakı, 23 aprel, AZƏRTAC

Mingəçevir Dövlət Universitetində (MDU) Magistratura və Doktorantura Təhsil Mərkəzi (MDTM), Karyera və İnkişaf Mərkəzinin (KİM) birgə təşkilatçılığı ilə “Karyera və perspektiv imkanlar” mövzusunda seminar keçirilib.

MDU-dan AZƏRTAC-a bildirilib ki, universitetin akademik heyət üzvlərinin və tələbələrin iştirak etdiyi seminarda “Biznesin idarə edilməsi” ixtisası üzrə II kurs magistrant İlham İlyasov məruzə ilə çıxış edib.

İ.İlyasov məruzəsində karyera inkişafının planlaşdırılması və effektiv idarə olunması, hədəflərin mövcud və perspektiv imkanlara əsaslanaraq müəyyənləşdirilməsi məsələlərindən danışıb. Bilik və bacarıqları davamlı surətdə inkişaf etdirməyin, çətinlikləri fürsətə çevirməyin, fürsətlərə və yeniliklərə daim hazır olmağın və digər xüsusiyyətlərin karyera yüksəlişində əhəmiyyətindən bəhs edən məruzəçi bununla bağlı peşəkar şəxslərin təcrübəsindən faydalanmağın üstünlüklərini qeyd edib.

Əmək bazarının perspektivlərindən söhbət açan İlham İlyasov hazırda peşə təhsilinə tələbatın getdikcə artdığını qeyd edib və sahibkarlıq karyerasının inkişafında peşə təhsilinin önəmini vurğulayıb. Universitetlər və peşə məktəbləri arasında işbirliyinin imkanlarından bəhs edən məruzəçi hər iki təhsil müəssisəsinin innovasiya potensialının güclənməsinə, təhsil alanların və təhsil verənlərin karyera inkişafına müsbət təsir edə biləcək ortaq layihələrdən danışıb.

İştirakçılar tərəfindən maraqla qarşılanan seminarda məruzə ətrafında fikir mübadiləsi aparılıb və təqdim edilən suallar cavablandırılıb.

Qeyd edək ki, gənclərin hərtərəfli inkişafını diqqət mərkəzində saxlayan MDU-da təhsil alanların bilik və bacarıqlarının artırılması məqsədilə müvafiq təlim və seminarların təşkilinə xüsusi önəm verilir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.