Bakıda ilk Azərbaycan Beynəlxalq Daşınmaz Əmlak Sərgisi keçirilir YENİLƏNİB VİDEO
Bakı, 4 noyabr, AZƏRTAC
Bakıda ilk dəfə Azərbaycan Beynəlxalq Daşınmaz Əmlak Sərgisi (AIREX 2026) keçirilir.
AZƏRTAC xəbər verir ki, sərginin rəsmi açılış mərasimində Dövlət Şəhərsalma və Arxitektura Komitəsinin sədri Anar Quliyev, Qarabağ Dirçəliş Fondunun İdarə Heyətinin sədri Rəhman Hacıyev və “PAŞA Property Management” şirkətinin baş icraçı direktoru Tural Əliyev çıxış ediblər.
AIREX 2026 ölkəmizdə 2026-cı ilin “Şəhərsalma və Memarlıq İli” elan olunduğu dövrə təsadüf edir. Bakının gələcək inkişafı, eləcə də Qarabağ və Şərqi Zəngəzurda şəhər və kəndlərin yenidən qurulması fonunda sərgi Azərbaycanda həyata keçirilən layihələrin beynəlxalq auditoriyaya təqdim olunması baxımından mühüm platforma rolunu oynayır. Sərginin açılış gününün işgüzar proqramında da Azərbaycanın şəhərsalma təcrübəsi və yenidənqurma işləri əsas yer tutur.
Noyabrın 6-dək davam edəcək sərgidə 60-dan çox yerli və beynəlxalq şirkət iştirak edir. Üç gün ərzində sərgini 20 min nəfərin ziyarət edəcəyi gözlənilir. Tədbir həm ilk mənzilini almaq istəyənlər, həm də yeni bazarları və əməkdaşlıq imkanlarını araşdıran investorlar üçün geniş imkanlar yaradır.
Bakıdan Maldiv adalarınadək – fərqli bazarlar bir sərgidə
AIREX 2026-da Azərbaycanla yanaşı, Birləşmiş Krallıq, Birləşmiş Ərəb Əmirlikləri, Türkiyə, Gürcüstan və Maldiv adaları da təmsil olunur. İştirakçılar arasında Böyük Britaniyanın “Berkeley Group” və “Chapman Taylor”, Birləşmiş Ərəb Əmirliklərinin Modon, Gürcüstanın isə “Silk Development” şirkətləri də var.
Beləliklə, ziyarətçilər yerli yaşayış kompleksləri ilə tanış olmaqla yanaşı, eyni məkanda xarici layihələrin nümayəndələri ilə də görüşmək imkanı əldə edirlər.
Sərgi mənzil almaq istəyənlərə müxtəlif layihələri müqayisə etmək üçün əlverişli şərait yaradır. Eyni büdcə ilə Bakının müxtəlif ərazilərində hansı mənzilləri almağın mümkün olduğu, ilkin ödənişin məbləği və mənzillərin təhvil verilmə müddəti ilə bağlı suallara şirkət nümayəndələrindən birbaşa cavab almaq mümkündür.
İlk mənzilini almaq istəyənlər, eləcə də ailəsi üçün daha geniş yaşayış sahəsi axtaranlar sərgi çərçivəsində müvafiq layihələr və təkliflərlə tanış ola bilərlər.
Ziyarətçilər şirkətlərin stendlərində mənzillərin planlarına baxa, qiymətləri və ödəniş müddətlərini müqayisə edə, sərgi günlərinə özəl təkliflərlə tanış ola bilərlər. Mənzil seçimi zamanı yaşayış komplekslərinin yerləşdiyi ərazi, yaxınlıqdakı infrastruktur və sakinlərə göstərilən xidmətlər barədə də ətraflı məlumat əldə etmək mümkündür.
Xaricdə mənzil almaq və ya daşınmaz əmlaka investisiya yatırmaq istəyənlər isə Bakıdan ayrılmadan beynəlxalq şirkətlərin nümayəndələri ilə görüşə, maraqlandıqları layihələr üzrə alış şərtlərini müzakirə edə bilərlər.
AIREX-in işgüzar proqramı sahə mütəxəssisləri və tələbələr üçün də nəzərdə tutulub. Daşınmaz əmlak şirkətlərinin və agentliklərinin, memarlıq, dizayn, tikinti və texnologiya sahələrinin nümayəndələri sərgidə potensial tərəfdaşlarla görüşərək konkret layihələr üzrə əməkdaşlıq imkanlarını müzakirə edə bilərlər. Müvafiq sahələrdə təhsil alan tələbələr isə layihə müəllifləri ilə ünsiyyət qurmaq, panel müzakirələrində iştirak etmək, mütəxəssislərin təcrübəsi və bazardakı yeniliklərlə tanış olmaq imkanı qazanırlar.
Üç gün ərzində beş panel müzakirəsi, sammit və startap müsabiqəsi
Noyabrın 4-də sərginin işgüzar proqramının əsas mövzusunu Azərbaycanın şəhərsalma perspektivləri təşkil edib. Müzakirələr ölkənin yenidənqurma təcrübəsinə və yeni yaşayış məntəqələrinin planlaşdırılması məsələlərinə həsr olunub. Sərgi çərçivəsində keçirilən şirkət təqdimatları və işgüzar görüşlər isə memarlara, layihə müəlliflərinə və investorlara potensial tərəfdaşlarla birbaşa əlaqə qurmaq imkanı yaradır.
Noyabrın 5-də üç panel müzakirəsinin keçirilməsi nəzərdə tutulur. Mütəxəssislər beynəlxalq brendlərlə əməkdaşlığın yaşayış layihələrinə verdiyi töhfələri, Xəzər regionundan Mərkəzi Asiyayadək şəhərlərin baş planlarının hazırlanması məsələlərini, eləcə də yeni məhəllələrdə yaşayış, iş və istirahət məkanlarının əlaqələndirilməsini müzakirə edəcəklər.
Həmin gün “PMD Projects” şirkətinin təşkilatçılığı ilə III Dayanıqlı Tikinti Sammiti də keçiriləcək.
Noyabrın 6-da diqqət bankların, daşınmaz əmlak və texnologiya şirkətlərinin əməkdaşlığına yönələcək. “SABAH.HUB” ilə birgə təşkil olunacaq “PropTech” startap müsabiqəsində komandalar daşınmaz əmlak sektoru üçün hazırladıqları texnoloji həlləri təqdim edəcəklər. Müsabiqədən sonra şirkətlər maraqlandıqları startaplarla ayrıca görüşərək təklif olunan həllərin öz fəaliyyətlərində tətbiqi imkanlarını müzakirə edə biləcəklər.
AIREX 2026 “Baku Expo Management” və “PAŞA Property Management” şirkətlərinin təşkilatçılığı, “Times Consulting”in strateji tərəfdaşlığı və bir sıra dövlət qurumlarının dəstəyi ilə keçirilir. Sərginin sponsorları “PAŞA Real Estate Qrup”, “Baku City Residences”, “Sea Breeze”, “PMD Group”, “Bakı Ağ Şəhər” və ABB-dir.
Qeyd edək ki, sərgi noyabrın 4-dən 6-dək Bakı Ekspo Mərkəzində ziyarətçilər üçün açıq olacaq. Giriş ödənişsizdir. Ziyarətçilər register.airex.az/az internet səhifəsində və ya sərginin girişində qeydiyyatdan keçə bilərlər.
Bölmənin digər xəbərləri
