Ağdam, 16 iyul (AZƏRTAC). Ağdam rayon İcra hakimiyyətində 2010-cu ilin birinci yarısının sosial-iqtisadi inkişafının yekunları və qarşıda duran vəzifələr müzakirə olunmuşdur.

Rayon icra hakimiyyəti başçısının müavini Elşad Əhmədov məruzə etmiş və bildirmişdir ki, hesabat dövründə rayonun sosial-iqtisadi inkişaf dinamikası saxlanılmış, ötən ilin birinci yarımili ilə müqayisədə ümumi məhsul buraxılışının həcmi 410 min manat artaraq 26 milyon 603,6 min manat, kənd təsərrüfatı məhsullarının həcmi 1012 min manat artaraq 18 milyon 155 min manat, pərakəndə əmtəə dövriyyəsinin həcmi 440,6 min manat artaraq 6 milyon 676,8 min manat, o cümlədən əhaliyə göstərilən pullu xidmətlərin həcmi 122,4 min manat artaraq 4 milyon 202,8 min manat olmuşdur. Bir işçiyə hesablanmış orta aylıq əməkhaqqı 11,01 manat artaraq 139 manat olmuşdur.

Hesabat dövrü ərzində 268-i daimi olmaqla 792 nəfər işlə təmin olunmuşdur.

Rayon əhalisinin içməli və suvarma suyuna ehtiyacının ödənilməsi, elektrik enerjisi ilə təminatının yaxşılaşdırılması üçün tədbirlər görülmüş, Quzanlı, Qasımbəyli, İmanqulubəyli, Birinci Quzanlı qəsəbələrinə, İmanqulubəyli, Eyvazlı, Çullu kəndlərinə təbii qaz verilmişdir. Hazırda Əhmədağalı və Əfətli kəndlərində qaz çəkilişi davam edir.

Rayonda aparılan tikinti-quruculuq və abadlıq işləri barədə məlumat verən natiq bildirmişdir ki, Soltanbud təpəsi üzərində Azərbaycanın Milli Bayrağı ucaldılmış, xəritəsi çəkilmiş, təpənin ətəyində şəhidlərin xatirəsinin əbədiləşdirilməsi üçün Xatirə kompleksi tikilmiş, burada park salınmış, Quzanlı qəsəbə uşaq bağçasının köhnə binası əsaslı bərpa edilmişdir. Hazırda rayonun girişində Xaçınçayı üzərində milli ornamentlərlə bəzədilmiş və müasir uslubda simvolik “Giriş qapısı”nın, Quzanlı qəsəbəsində veteranlar evinin, rayon təhsil şöbəsi, yol istismar, qaz istismarı, rayonlararası qaz tikinti idarələri üçün inzibati binaların, uşaq xəstəxanasının və doğum evinin, məcburi köçkünlər üçün 689 ailəlik yeni qəsəbənin tikintisi, rayon mədəniyyət evinin əsaslı təmiri davam etdirilir.

Xüsusi inşaat briqadasının köməyi ilə 150 köçkün ailəsinin evində cari təmir işləri aparılmış, 30-a qədər köçkün ailəsinə yeni ev tikilmişdir.

2010-cu ilin “Ekologiya İli” elan edilməsi ilə əlaqədar rayonda 40 mindən artıq ağac əkilmiş, tinglik təsərrüfatı yaradılmışdır.

Cari ilin məhsulu üçün 19 min 120 hektar sahədə taxıl əkilmişdir, ötən ilin müvafiq dövrü ilə müqayisədə kənd təsərrüfatı məhsullarının istehsalı xeyli artmışdır. Hesabat dövründə 1697 hektar tərəvəz, 423 hektar kartof, 2242 hektar təzə yonca, 142 hektar yem çuğunduru səpilmişdir.

Mal-qaranın sayı 31 min 573 başa, qoyun və keçilərin sayı 99 min 849 başa çatdırılmışdır. Ət istehsalı 1283 ton, süd istehsalı 12034 ton, yumurta istehsalı 4 milyon 36 min ədəd olmuşdur.

Rayon təhsil şöbəsinin müdiri Elmira Şükürova, statistika idarəsinin rəisi Xosrov İsmayılov, suvarma sistemləri idarəsinin müdiri Hafiz Əzimzadə və başqaları yığıncaqda çıxış edərək görülmüş işləri ətraflı təhlil etmiş, uğurlarla yanaşı problemləri də sadalamış, onların həlli üçün təkliflər irəli sürmüşlər.

Rayon icra hakimiyyətinin başçısı Nizami Sadıqov qarşıda duran vəzifələrdən danışmış, idarə və müəssisə rəhbərlərinə tapşırıqlar vermişdir.

Milli Məclisin deputatları Aqil Abbas və Bəxtiyar Əliyev yığıncaqda çıxış etmişlər.