Bakı, 24 yanvar (AZƏRTAC). Mən dünyanın ən gözəl şəhərlərindən sayılan Bakıda çıxış etmək şərəfinə nail olduğuma görə xoşbəxtəm. 

AZƏRTAC xəbər verir ki, bu sözləri görkəmli bəstəkar və dirijor Ennio Morrikone yanvarın 24-də “JW Marriott Absheron” otelində keçirilən mətbuat konfransında səsləndirmişdir.

Bildirmişdir ki, bütün konsertlərim mənim üçün bayram olmaqla yanaşı, narahatlıq və gərgin işləmək deməkdir. Filmlərə musiqi bəstələyərkən onun rejissoru ilə məsləhətləşirəm, çəkilən filmin janrını nəzərə alıram və digər məsələləri dəqiqləşdirirəm. Eyni zamanda, bu musiqidə həm də öz hisslərimi dinləyiciyə çatdırmağa çalışıram.

Dünya şöhrətli musiqiçi bakılı pərəstişkarlarına müraciətlə demişdir ki, yanvarın 25-də Heydər Əliyev Sarayında keçiriləcək konsertimdən zövq alsanız, çox şad olaram. Ümidvaram ki, konsert zamanı sizin sevginizi hiss edəcəyəm.

“Buta” İncəsənət Mərkəzinin ictimaiyyətlə əlaqələr üzrə direktoru Fuad Hətəmov, Mədəniyyət və Turizm Nazirliyinin incəsənət şöbəsinin müdiri, professor Fərəh Əliyeva, “Fireland Vineyards” şirkətinin direktoru Elmar Səidov, “Nar Mobile” şirkətinin baş direktoru Kent Maknili paytaxtımızda baş tutacaq konsert haqqında məlumat vermişlər.

Bildirilmişdir ki, yanvarın 25-də Heydər Əliyev Sarayında görkəmli bəstəkar və dirijor Ennio Morrikone möhtəşəm konsert proqramı ilə çıxış edəcəkdir. Maestronun Bakıda konsert proqramı ilə çıxış etməsi Azərbaycanın mədəni həyatı üçün əlamətdar hadisədir.

Konsert “Buta” İncəsənət Mərkəzinin təşkilatçılığı, Mədəniyyət və Turizm Nazirliyinin, İtaliyanın Azərbaycandakı səfirliyinin dəstəyi və “Fireland Vineyards” və “Nar Mobile” şirkətlərinin sponsorluğu ilə baş tutacaqdır.

Azərbaycan musiqiçiləri görkəmli bəstəkar və dirijor Ennio Morrikone ilə eyni səhnəni bölüşəcəklər.

“Oskar” mükafatı laureatı və dəfələrlə bu ada namizəd, dördqat “Qızıl qlobus” və “Qızıl şir” mükafatlarının laureatı, Venesiya film festivalının qalibi Maestro Ennio Morrikone Heydər Əliyev Sarayında Üzeyir Hacıbəyli adına Azərbaycan Dövlət simfonik orkestri və Azərbaycan Xor Kapellası ilə birlikdə möhtəşəm konsert verəcəkdir. Heydər Əliyev Sarayının səhnəsinə maestro ilə birlikdə 200-dən çox musiqiçi çıxacaqdır.

Ennio Morrikone İtaliya, İspaniya, Fransa, Almaniya, Rusiya və ABŞ-da çəkilmiş 400-dən çox kino və seriala musiqi bəstələmişdir. Onlardan “Bir dəfə Amerikada”, “Professional”, “Yaxşı, pis və qəddar”, “Bir dəfə vəhşi Qərbdə”, “Malena”, “Dekameron”, “Lolita”, “Kill Bill” və digər filmlər dünya kinematoqrafiyasının şedevrlərinə çevrilmişdir.

Azərbaycan tamaşaçıları öz sevimli filmlərindən musiqiləri eşidəcək və əfsanəvi maestro Ennio Morrikonenin sənətindən zövq alacaqlar.