Quba, 10 sentyabr (AZƏRTAC, Elxan Yusifli). Sentyabrın 10-da Həzi Aslanov adına Sumqayıt şəhər 22 nömrəli və Quba şəhər 3 nömrəli orta məktəbləri arasında “Qardaşlaşma haqqında” sazişin imzalanmasına həsr edilmiş mərasim keçirildi.

AZƏRTAC xəbər verir ki, Azərbaycan Respublikasının Prezidenti yanında Bilik Fondunun “Qardaşlaşmış məktəblər” layihəsi çərçivəsində reallaşan tədbir Quba şəhərindəki Heydər Əliyev Mərkəzində reallaşdı.

Tədbirdən əvvəl Sumqayıt və Quba məktəbliləri ümummilli lider Heydər Əliyevin abidəsini ziyarət edərək, önünə gül dəstələri düzdülər.

Daha sonra Heydər Əliyev Mərkəzində olan qonaqlar Ulu Öndərin həyat və fəaliyyətinin əks etdirən fotostendlərə baxdılar.

Tədbirdə bildirildi ki, "Qardaşlaşmış məktəblər" layihəsi geniş şagird kütləsini əhatə etməklə, məktəblilərin fəal və yaradıcı şəxs kimi inkişafını nəzərdə tutur. Layihəsinin əsas məqsədi respublikanın orta ümumtəhsil məktəblərində təhsil alan yeniyetmə və gənclərin biliyə marağının artırılması, Azərbaycan tarixinin və mədəniyyətinin, eləcə də vətənpərvərlik ruhunun təbliğidir. Layihənin vəzifələri müxtəlif bölgələrdən olan məktəblilər arasında "bilik körpüsü"nün yaradılması, onların bir-birinə yaxınlaşdırılması, şagirdlərin intellektual səviyyəsinin yüksəldilməsi və dünyagörüşlərinin genişləndirilməsi, istedadlı gənclərin aşkarlanması, həmçinin fəallarla yanaşı, passiv şagirdlərin də layihəyə cəlb olunmasıdır.

Tədbirdə Sumqayıt şəhərinin görməli yerlərinin görüntülərindən ibarət videoçarx nümayiş etdirildi.

Daha sonra iki məktəb arasında "Qardaşlaşma haqqında" saziş imzalandı.

Sənədə əsasən, qardaşlaşmış məktəblərin birgə konfranslar, "dəyirmi masa"lar, sərgilər, konsertlər, muzey və tarixi yerlərə ekskursiyalar, hər iki rayon rəsmiləri, mədəniyyət və incəsənət xadimləri ilə görüşlər keçirməsi nəzərdə tutulur.