SİYASƏT
ABŞ-da Xocalı qətliamının xatirəsinə həsr olunmuş panel müzakirəsi keçirilib
Vaşinqton, 27 fevral, AZƏRTAC
Nyu-York şəhərində fəaliyyət göstərən Amerika Sefard Federasiyası (ASF) və Müsəlman Amerika Liderlik Alyansının (MALA) təşəbbüsü və təşkilatçılığı ilə Xocalı qətliamının xatirəsinə həsr olunmuş panel müzakirəsi keçirilib. Panel müzakirələrində ASF-nin icraçı direktoru Ceyson Quberman, MALA-nın həmtəsisçisi və icraçı direktoru Zeynəb Xan, Azərbaycan bəstəkarı və pianoçuları Əbuzər Manafzadə və Nərgiz Əliyarova, “Arts Council” Şəbəkəsinin rəhbəri, Xocalı üzrə incəsənətin icraçısı Dadaş Məmmədov, Corc Vaşinqton Universitetinin tələbəsi Çilənay Səfərli və ASF İdarə heyətinin üzvü, Birləşmiş Ərəb Əmirliklərinin baş ravvini və yeni yaradılmış Körfəz Yəhudi İcmaları Assosiasiyasının İdarə heyətindən ravvin Elie Abadie iştirak ediblər.
Görüşdə əvvəlki illərdə Nyu-York şəhərində Xocalı qətliamının anım mərasimləri ilə bağlı keçirilən tədbirlər xatırlanaraq, videoçarx nümayiş olunub. Həmin tədbirlərdə Xocalı qətliamı haqqında ətraflı məlumat verilib, faciə şahidlərin dilindən auditoriyaya çatdırılıb və digər ölkələrin təcrübələri paylaşılıb.
Əbuzər Manafzadə pianoda faciə qurbanlarının xatirəsinə həsr olunmuş musiqi ifa edib.
Xocalı hadisəsi ilə bağlı incəsənət əsərlərinin yaradıcısı Dadaş Məmmədov faciəyə həsr olunmuş əsərləri təqdim edərək onların tarixindən danışıb. D.Məmmədov Xocalı faciəsinin ildönümü münasibətilə Art Tower Gallery tərəfindən keçirilən sərgini xatırlayaraq, incəsənət xadimi Nazim Məmmədov və fransız sənətkarı tərəfindən əsərlərin təqdim olunduğunu vurğulayıb. Rəssamlar incəsənət əsərləri vasitəsilə qətliamı əks etdirməyə çalışıblar. Sərgidə mədəniyyət nazirinin iştirak etdiyi, həmçinin müxtəlif ölkələrdə sərgiləndiyi bildirilib.
Tədbirdə pianoçu, Milli Musiqi və Qlobal Mədəniyyət Cəmiyyətinin prezidenti və təsisçisi Nərgiz Əliyarovanın ifasında Faiq Sücəddinovun “Vətən balladası” əsəri səsləndirilib. N.Əliyarova bu cür anım tədbirlərinin keçirilməsi və maarifləndirmənin əhəmiyyətindən danışıb. Eyni zamanda, musiqinin insanları və müxtəlif xalqları bir yerə gətirməkdə rolundan danışıb.
Azərbaycan diasporunun fəal üzvlərindən olan Çilənay Səfərli Xocalı faciəsinin tariximizdə dərin iz buraxdığını, təşkil olunan bu cür tədbirlərin və müzakirələrin əhəmiyyətindən söz açıb.
Daha sonra ravvin Elie Abadieni sülhə dəstək mesajı verərək, Xocalı qətliamı zamanı həlak olanları xatırlayıb.
Görüşə ABŞ-ın müxtəlif dini və etnik təşkilatlarının təmsilçiləri, yerli ictimai fəallar, Azərbaycan və yəhudi icmalarının üzvləri, o cümlədən Azərbaycanın ABŞ-dakı səfirliyinin, Diasporla İş üzrə Dövlət Komitəsinin nümayəndələri qatılıb.
AZƏRTAC-ın Vaşinqton bürosu