Vaşinqton, 20 sentyabr, AZƏRTAC

ABŞ vətəndaşlıq və immiqrasiya xidmətinin (USCIS) sentyabrın 11-dən qüvvəyə minmiş yeni qaydaları ABŞ-a leqal immiqrasiyanı xeyli çətinləşdirir. Yeni qaydalar 2018-ci il sentyabrın 11-dən sonra sifariş və ya ərizə ilə müraciət etmiş applikantlara şamil olunacaq.

AZƏRTAC xəbər verir ki, qaydalarda edilmiş dəyişikliklərə əsasən, əgər viza və ya qrin-kart almaq üçün ərizədə səhv aşkar edilərsə və ya formalarda bəzi məlumatlar çatışmırsa, bu halda immiqrasiya və nəzarət xidməti zabitləri həmin sifarişi rədd edə bilər. Agentliyin işçiləri sifarişdə yaranmış problem barədə iddiaçını məlumatlandırmağa borclu deyillər. Bununla belə, məlumatda vurğulanır ki, “yeni siyasət hüquqazidd imtinalar və cüzi səhvlərə, yaxud anlaşılmazlığa görə cəza məqsədi ilə istifadə edilməyəcək”.

İndiyə qədər viza almaq üçün sənədlərini təqdim edənlər və ya “Diversity Visa Lottery” lotereyasının iştirakçıları sənəd formalarını doldurarkən səhvə yol verdikdə və ya müəyyən sənədlər çatışmadıqda immiqrasiya xidmətinin əməkdaşları onlara bildiriş göndərirdilər. Bu halda sifariş verilməsi prosesi davam edir və applikantların qeyri-dəqiqlikləri aradan qaldırmaq və ya sənədlər paketini tamamlamaq üçün kifayət qədər vaxtı və şansı olurdu. İndi isə bu xidmətin zabitləri applikantın səhvi barədə ona bildiriş göndərmək, yoxsa sadəcə onun müraciətini rədd etmək barədə müstəqil şəkildə, öz mülahizələrinə görə qərar qəbul edəcəklər. Sənədlərdə yanlışlıq barədə bildiriş olmadıqda qəti qərar çıxarılana qədər potensial iddiaçının bu prosesə müdaxilə etmək şansı olmayacaq. Bu zaman bilavasitə ABŞ-da olan və vizanın müddətini uzatmaq istəyən iddiaçılar xüsusilə ehtiyatlı olmalıdırlar. Əgər sənədlərdə səhv aşkar olunarsa və sifariş rədd edilərsə, onda vizanın qüvvədə olma müddəti başa çatanda deportasiya prosesi başlanacaq.

USCIS-in mətbuat katibi Maykl Bars deyib ki, yeni siyasətin məqsədi immiqrasiya iddiasında olan şəxsləri sənədlərin hazırlanmasına daha məsuliyyətli yanaşmağa məcbur etməkdir. Hər il təqribən 7 milyon insan ABŞ-da daimi yaşamaq üçün və immiqrasiya vizası almaq məqsədilə müraciət edir. Buna görə artıq ABŞ-da yaşayan applikantların çoxu viza ala bilməyəcək və onların cari statusunun müddəti başa çatandan sonra bu status dayandırılacaq.

Yusif Babanlı

AZƏRTAC-ın xüsusi müxbiri

Vaşinqton