CƏMİYYƏT
ABŞ yəhudiləri: Azərbaycanın multikultural ənənələrin qorunmasına yönəlmiş siyasəti təqdirəlayiqdir
Bakı, 5 fevral, AZƏRTAC
Dini Qurumlarla İş üzrə Dövlət Komitəsinin (DQİDK) sədri Mübariz Qurbanlı fevralın 5-də yəhudilərdən ibarət ABŞ nümayəndə heyətinin üzvləri ilə görüşüb.
Komitədən AZƏRTAC-a bildiriblər ki, qonaqları salamlayan DQİDK sədri bildirib ki, Azərbaycan dünyəvi dövlət olmasına baxmayaraq, din hər zaman dövlətin xüsusi diqqət yetirdiyi sahələrdən biridir.
Mübariz Qurbanlı bildirib ki, ölkəmizdə insanların dini etiqad azadlığının təmin olunması, qorunması üçün hüquqi baza var və hər bir vətəndaşın etiqad azadlığı dövlətin təminatı altındadır. Azərbaycanda multikultural və tolerant mühitin dərin tarixi köklərə malik olduğunu diqqətə çatdıran Komitə sədri yəhudilərin Azərbaycanda məskunlaşma tarixi və yəhudi icmalarının ölkəmizdəki fəaliyyətindən danışıb. Qeyd edib ki, dövlət tərəfindən qeydiyyata alınan qeyri-İslam dini qurumlarından 8-i yəhudi dini icmasıdır, eyni zamanda, ölkəmizdə 7 sinaqoq və bir sıra yəhudi məktəbləri fəaliyyət göstərir. Konfessiyalar hər zaman dövlətin diqqət və qayğısı ilə əhatə olunur, məscidlərlə yanaşı, kilsələr və sinaqoqlar da dövlət tərəfindən təmir və bərpa edilir, yeniləri inşa olunur. Dini konfessiyaların fəaliyyətlərinin dəstəklənməsi məqsədilə dövlətimizin başçısı tərəfindən hər il maliyyə vəsaiti ayrılır.
Qonaqlara Ermənistan-Azərbaycan Dağlıq Qarabağ münaqişəsi, Ermənistanın ölkəmizin işğal olunmuş ərazilərində maddi-mədəni, dini irsin talan və məhv edilməsi siyasəti haqqında da ətraflı məlumat verilib.
Görüş və əhatəli məlumat üçün təşəkkürlərini bildirən qonaqlar Azərbaycanın həmişə müxtəlif konfessiyaların, xalqların birgə yaşadığı, tolerantlığın yüksək səviyyədə qorunduğu ölkələr sırasında olmasını yüksək qiymətləndiriblər. Ölkəmizin multikulturalizm ənənələrinin qorunmasına yönəlmiş çoxşaxəli siyasətinin təqdirəlayiq hal olduğunu vurğulayıblar.
Sonda Komitə sədri qonaqların suallarını cavablandırıb.
Qeyd edək ki, nümayəndə heyətinə San-Dieqo Universitetinin professoru Martin Kruminq, Yəhudi Respublikaçılar Alyansının təsisçisi Miç Silberman, “Newsblaze” portalının müxbiri Nurit Qrinqer, jurnalistlər Leon Veynşteyn və Raul Kontreras daxildirlər.