CƏMİYYƏT
ADA Universitetinin “Vətəni tanı” adlı yay düşərgəsinin iştirakçıları 4 saylı Bakı DOST Mərkəzində olublar
Bakı, 12 iyul, AZƏRTAC
ADA Universitetinin “Vətəni tanı” adlı yay düşərgəsi çərçivəsində bir qrup məktəbli 4 saylı Bakı DOST Mərkəzini ziyarət edib.
Agentliyin İctimaiyyətlə əlaqələr və kommunikasiya departamentindən AZƏRTAC-a bildirilib ki, düşərgə iştirakçılarına “DOST” mərkəzlərinin fəaliyyəti, burada göstərilən xidmətlər və “Könüllü DOST” proqramı haqqında ətraflı məlumat verilib. Məktəblilər "DOST" mərkəzindəki xidmət bölmələri ilə tanış olub, vətəndaşlara xidmət göstərilməsi prosesini izləyiblər.
Məktəblilər 4 saylı Bakı DOST Mərkəzində yerləşən İnklüziv İncəsənət Məktəbini də ziyarət ediblər. Onlar fiziki məhdudiyyətli şəxslərin əl işlərinə baxıblar.
Mərkəzdə müxtəlif əyləncəli oyunlar təşkil olunub. Yay düşərgəsinin iştirakçıları “Könüllü DOST”larla birgə sosial sahəni əhatə edən müxtəlif səhnəciklər nümayiş etdiriblər.
“Vətəni tanı” adlı yay düşərgəsinin iştirakçılarına təşəkkürnamələr təqdim olunub.