ƏLİ HÜSEYNOV: Cənab sədr, hörmətli millət vəkilləri, dəvət olunmuş şəxslər, mətbuat nümayəndələri. Sədrin qeyd etdiyi kimi, bu gün səhər hüquq siyasəti və dövlət quruculuğu məsələləri daimi komissiyasının iclası keçirilmişdir. İclas iştirakçıları gündəliyə çıxarılmış bir məsələni – cənab İlham Heydər oğlu Əliyevin Baş nazir vəzifəsinə təyin olunmasına razılıq verilməsi məsələsini Milli Məclisin gündəliyinə tövsiyə etmişdir. Mən qısa çıxışımda həm öz fikrimi, həm də həmkarlarımın fikirlərini diqqətinizə çatdırmaq istəyirəm. Cənab Prezidentin Milli Məclisə bu müraciəti Azərbaycanın dövlətçilik tarixində birmənalı olaraq mühüm bir hadisədir. Mənim fikrimcə, bunun əhəmiyyəti həm də ondadır ki, cənab Prezident Heydər Əliyevin 34 illik hakimiyyəti dövründə qəbul etdiyi bütün qərarlar xalqın və vətəndaşların iradəsini özündə əks etdirir. Bu baxımdan mən hesab edirəm ki, bu gün cənab Prezidentin İlham Əliyevin Baş nazir vəzifəsinə təyin edilməsinə razılıq verilməsi ilə bağlı Milli Məclisə etdiyi müraciətindəki imzası təkcə onun deyil, bütövlükdə bizim xalqın və vətəndaşların imzasıdır. Biz Azərbaycan xalqı və dövlətçiliyi naminə bu məsələyə öz razılığımızı verməliyik və onu dəstəkləməliyik.

Bir deputat kimi hesab edirəm ki, parlament bütövlükdə yeni təyin ediləcək Baş nazirə onun bütün fəaliyyəti dövründə dəstək verməlidir. Həm ictimai-siyasi proseslərin gedişində, həm də qanunvericilik bazasının yaradılmasında bu dəstək verilməlidir.

Cənab sədr, bir məsələni də qeyd etmək istəyirəm. Artıq bu gün səhər müxalifət mətbuatı bu addımın guya bir dövlət çevrilişi olması barədə yalan, böhtan və iftira dolu məlumatlar yaymaqdadır. Bu azmış kimi, onlar insanları mitinqlərə və yürüşlərə, dövlətin qanunsuz yolla devrilməsinə çağırırlar. Bizi dövlət çevrilişində ittiham edirlər, ancaq özləri Azərbaycanda bir necə dövlət çevrilişi cəhdinin təşkilatçısı olublar. 1995-ci ildə dövlət çevrilişi cəhdinin icraçıları məlum idi. Ancaq onların təşkilatçıları kim olub? Bəli, Azərbaycanın müstəqilliyini istəməyən bəzi xarici dövlətlər buna dəstək veriblər. Amma Azərbaycanda bunun iştirakçıları Müsavat partiyasının başqanı İsa Qəmbər, habelə Əli Kərimov, Etibar Məmmədov və müxalifət partiyalarının digər rəhbərləri olublar. Onlar bəzən dolayısı yolla, lakin çox zaman birbaşa bu dövlət çevrilişlərini müdafiə ediblər. Lakin heç nəyə nail olmayıblar. İctimaiyyətimiz bilməlidir ki, biz müstəqil Azərbaycanın tarixinin ən çətin günlərini yaşamışıq və Azərbaycan dövlətini qoruyub saxlamışıq. Müxalifət də bilməlidir ki, onlar bizə heç zaman müxalif ola bilməzlər. Onlar bilməlidirlər ki, qarşılarındakı 5-10 qaragüruhçudan qorxub qaçan Vəzirov, nə də Ayaz Mütəllibov deyildir. Onların qarşısında dayanan Heydər Əliyev komandasıdır və biz Heydər Əliyevin və onun davamçısı İlham Əliyev siyasətini axıra qədər müdafiə edəcəyik və bütün istədiklərimizə nail olacağıq.