SİYASƏT
ARDNŞ-İN BİRİNCİ VİTSE-PREZİDENTİ, MİLLİ MƏCLİSİN DEPUTATI İLHAM ƏLİYEVİN VAŞİNQTONA SƏFƏRİ
Vaşinqtonda səfərdə olan Azərbaycan Dövlət Neft Şirkətinin birinci vitse-prezidenti, Milli Məclisin deputatı İlham Əliyev bir sıra görüşlər keçirmişdir.
ABŞ DÖVLƏT KATİBİNİN BİRİNCİ MÜAVİNİ RİÇARD ARMİTAC VƏ PREZİDENTİN MİLLİ TƏHLÜKƏSİZLİK MƏSƏLƏLƏRİ ÜZRƏ MÜŞAVİRİNİN MÜAVİNİ STİVEN HEDLİ İLƏ GÖRÜŞLƏR
ARDNŞ-ın birinci vitse-prezidenti, Milli Məclisin deputatı İlham Əliyevin oktyabrın 21-də Birləşmiş Ştatların dövlət katibinin birinci müavini Riçard Armitac və ABŞ Prezidentinin milli təhlükəsizlik məsələləri üzrə müşavirinin müavini Stiven Hedli ilə keçirilən görüşlərində tərəflər ABŞ-Azərbaycan əməkdaşlığına dair geniş fikir mübadiləsi aparmışlar. Söhbət zamanı ölkələrimiz arasında əlaqələrin daha da möhkəmləndirilməsi istiqamətində qarşılıqlı səylərin artırılması zərurəti vurğulanmışdır. ABŞ hökumətinin rəsmi nümayəndələri terrorizmə qarşı mübarizədə Azərbaycanın beynəlxalq koalisiyaya dəstəyinin Birləşmiş Ştatlar tərəfindən çox yüksək dəyərləndirildiyini bildirmişlər.
“ERMƏNİSTAN QEYRİ-KONSTRUKTİV MÖVQEYİNDƏN ƏL ÇƏKMİR”
Milli Təhlükəsizlik Şurasında və Dövlət Departamentində aparılan müzakirələr zamanı İlham Əliyev Cənubi Qafqaz və Xəzər regionunda dövlətlərarası münasibətlərdən geniş bəhs etmişdir. O, Azərbaycan Respublikasi və Rusiya Federasiyası prezidentlərinin Xəzər dənizinin dibinin həmhüdud sahələrinin bölünməsinə dair Moskvada imzaladıqları sazişi və Bakı-Tbilisi-Ceyhan əsas ixrac boru kəmərinin tikintisinə başlanmasını regional sabitliyə müsbət təsir göstərən amillər kimi dəyərləndirmişdir.
ARDNŞ-in birinci vitse-prezidenti Amerika rəsmilərinə xatırlatmışdır ki, hüquqi, demokratik və dünyəvi dövlət quran, bazar iqtisadiyyatı yolu seçmiş Azərbaycan bu istiqamətdə hərtərəfli islahatlar həyata keçirir. Lakin ölkənin ən ağrılı problemi olan Ermənistan-Azərbaycan, Dağlıq Qarabağ münaqişəsinin indiyədək həll edilməməsi böyük çətinliklər yaradır. Münaqişənin aradan qaldırılmamasının əsas səbəbi kimi Ermənistanın qeyri-konstruktiv mövqedən əl çəkilməməsini vurğulayan İlham Əliyev ATƏT-in Minsk qrupunun həmsədrlərindən olan ABŞ nümayəndələrinə bildirmişdir ki, belə vəziyyət Azərbaycanda əhalinin səbr kasasını doldurur, müharibə əhval-ruhiyyəsini gücləndirir. Bununla yanaşı o, ölkəmizin münaqişənin sülh yolu ilə həlli yollarını aramaqda davam edəcəyini söyləmişdir.
ABŞ-IN TANINMIŞ SİYASİ XADİMLƏRİ, GÖRKƏMLİ ALİMLƏRİ VƏ SABİQ RƏSMİ ŞƏXSLƏRİ İLƏ GÖRÜŞLƏR
Dağlıq Qarabağ probleminin həlli yolları, regionda təhlükəsizlik və Azərbaycanda aparılan demokratik islahatlar həmin gün İlham Əliyevin ölkəmizin Vaşinqtondakı səfirliyində keçirdiyi daha iki görüşün də əsas mövzusu olmuşdur. ABŞ-ın tanınmış siyasi xadimləri, əvvəlki hökumətlərin aparıcı üzvləri Madlen Olbrayt, Uilyam Kohen, Zbiqnev Bzejinski, Brent Skoukroft, habelə görkəmli alimlər Fred Star və akademik Roald Saqdeyev və başqaları ilə birgə nahar zamanı geniş fikir mübadiləsi aparılmışdır. İlham Əliyev Azərbaycanda hazırkı vəziyyətə, ölkəmizin iqtisadi-sosial və demokratik inkişafına dair çoxsaylı suallara cavab vermişdir. O, bildirmişdir ki, Xəzər hövzəsinin təbii ehtiyatlarının işlənilməsi üzrə layihələr uğurla həyata keçirilir və bunun ilk müsbət nəticələri göz qabağındadır. İlham Əliyev demişdir ki, Azərbaycan hökumətinin əsas məqsədi bu layihələrdən əldə olunan gəliri ölkə iqtisadiyyatının yeni sektorlarının yaradılmasına və əhalinin sosial rifahının yaxşılaşdırılmasına yönəlməkdən ibarətdir.
BRENT SKOUKROFT: İLHAM ƏLİYEV GÜCLÜ SİYASƏTÇİ TƏƏSSÜRATI BAĞIŞLAYIR
Tanınmış siyasi xadim BRENT SKOUKROFT İham Əliyev ilə görüşdən sonra demişdir:
-Biz İlham Əliyev ilə çox maraqlı görüş keçirdik. Azərbaycanın perspektivləri, ümumiyyətlə, region haqqında səmərəli fikir mübadiləsi apardıq. Mən bu müzakirələrdən çox məmnun qaldım. Anlayıram ki, indi çox mürəkkəb dövrdür. Lakin mən Azərbaycanın gələcəyinə nikbin baxıram. İlham Əliyev bizə güclü siyasətçi təəssüratı bağışladı. O, bizə region və ölkəsi haqqında dəqiq, tutarlı və çox ətraflı məlumatlar verdi.
AZƏRBAYCAN DEMOKRATİYANIN İNKİŞAFI ÜÇÜN MÜHÜM ADDIMLAR ATIR
ARDNŞ-in birinci vitse-prezidenti, Milli Məclisin deputatı İlham Əliyev oktyabrın 21-də ölkəmizin Vaşinqtondakı səfirliyində Milli Demokratiya İnstitutu, Beynəlxalq Respublikaçılar İnstitutu və Seçki Sistemləri üzrə Beynəlxalq Fondun nümayəndələri ilə də görüşmüşdür. Azərbaycanda demokratik inkişafdan söhbət açan İlham Əliyev xatırlatmışdır ki, müstəqilliyimizin ilk illərində Ermənistanın hərbi təcavüzü, ölkəmizdə qanunsuz silahlı dəstələrin olması, separatçı qüvvələrin baş qaldırması Azərbaycanın bir dövlət kimi varlığını təhlükə qarşısında qoymuşdu. Hazırkı iqtidar hakimiyyətə gəldikdən sonra ictimai-siyasi sabitlik bərpa edilmiş, ölkədə iqtisadi, demokratik islahatlar həyata keçirilməyə başlamışdır.
Milli Məclisin deputatı vurğulamışdır ki, Azərbaycan hökuməti demokratiyanın inkişafı istiqamətində müntəzəm və ardıcıl tədbirlər görür. Ölkəmizdə çoxsaylı siyasi partiyalar mövcuddur, senzura aradan qaldırılmışdır, azad mətbuat fəaliyyət göstərir, dini azadlıqlar təmin edilmişdir. Bütün bunlar Azərbaycanın ərazisinin 20 faizinin işğal altında olduğu, bir milyon vətəndaşımızın qaçqın və köçkünə çevrildiyi, ölkəmizə xaricdən daimi təzyiqlər edildiyi şəraitdə həyata keçirilir.
ABŞ-IN MİLLİ DEMOKRATİYA İNSTİTUTUNUN SƏDRİ, SABİQ DÖVLƏT KATİBİ XANIM MADLEN OLBRAYT İLƏ GÖRÜŞ
Həmin gün Milli Məclisin deputatı İlham Əliyev ABŞ-ın Milli Demokratiya İnstitutunun sədri, keçmiş dövlət katibi xanım Madlen Olbrayt ilə görüşmüşdür. İlham Əliyev Azərbaycanda demokratiyanın inkişafı sahəsində görülən işlər, Ermənistanın hərbi təcavüzü, onun nəticələri, ölkəmizdə həyata keçirilən hüquqi islahatlar bardə məlumat vermişdir. O, Avropa Şurası Parlament Assambleyasının payız sessiyasında Milli Məclisin nümayəndə heyətinin iştirakı haqqında da ətraflı söhbət açaraq demişdir ki, ölkəmizin bu beynəlxalq qurumda üzvlüyü Azərbaycanda demokratik proseslərə müsbət təkan verir.
Milli Məclisin deputatı ümid etdiyini bildirmişdir ki, ABŞ-ın qeyri-hökumət təşkilatları, xüsusən Milli Demokratiya İnstitutu Azərbaycanda təkcə müxalifət partiyaları ilə deyil, iqtidaryönlü partiyalarla da əlaqə quracaqlar.
X X X
Həmin gün İlham Əliyev nüfuzlu “Uoll- strit cornel” qəzetinin redaktorlar heyətinin üzvü Klaudiya Rozetə geniş müsahibə vermişdir.
ARDNŞ-nin birinci vitse-Prezidenti, Milli Məclisin deputatı İlham Əliyevin Vaşinqtona səfər çərçivəsində konqresmenlərlə və beynəlxalq maliyyə qurumlarının nümayəndələri ilə də görüşləri gözlənilir.
Şəfəq Akifqızı
AZƏRTAC-ın xüsusi müxbiri
Vaşinqton