İyulun 8-də Azərbaycanda səfərdə olan Avropa Birliyinin nümayəndə heyəti ilə görüşdən sonra İlham Əliyev jurnalistləri maraqlandıran suallara cavab vermişdir. SUAL: İlham müəllim, görüşdə əsasən hansı məsələlər müzakirə edildi? İLHAM ƏLİYEV: Görüşdə, əsasən, Avropa Birliyi ilə bizim münasibətlərimiz haqqında fikir mübadiləsi aparıldı. Bilirsiniz ki, bizim çox gözəl münasibətlərimiz var, əməkdaşlıq edirik. Xüsusilə neft sektorundakı əməkdaşlıq haqqında söhbət etdik. Biz istəyirik ki, bu sahədə Azərbaycanla Avropa Birliyi arasında daha geniş əməkdaşlıq olsun. Biz “Enerji dialoqu” adlandırılan layihəyə qoşulmaq istəyirik. Hesab edirik ki, Azərbaycanın buna haqqı çatır. Çünki Azərbaycan artıq regionda neft hasil edən çox vacib ölkəyə çevrilir. Gələcəkdə Azərbaycan qazı Avropaya çatdırılacaq və bununla əlaqədar biz hesab edirik ki, Avropa Birliyi ilə ölkəmiz arasında enerji dialoqunun yaradılması məqsədəuyğun ola bilər. Biz əsasən bu məsələlər haqqında söhbət etdik. SUAL: İlham müəllim, qonaqlar qarşıdan gələn seçkilər ilə maraqlandılarmı? İLHAM ƏLİYEV: Xeyr. Seçkilər haqqında söhbət olmadı. SUAL: İlham müəllim, Sizin namizədliyiniz irəli sürülüb, bu addımı necə qiymətləndirirsiniz? İLHAM ƏLİYEV: Mən namizədliyimi irəli sürən insanlara təşəkkür edirəm. Onların təşəbbüsünə hörmətlə yanaşıram, ona görə də mən buna öz razılığımı verdim. Amma istəyirəm biləsiniz ki, mən bu addımı atmaqla ilk növbədə Heydər Əliyevin seçki kampaniyasında daha da fəal iştirak etmək məqsədini güdürdüm. Onsuz da iştirak edəcəkdim, ancaq bu status mənə əlavə imkanlar verəcəkdir. Hesab edirəm, - bunu da bilməlisiniz,- mənim namizədliyimin irəli sürülməsi yalnız bu məqsədi güdür. Çalışacağam ki, öz fəaliyyətimlə seçki kampaniyasında ümumi işə xeyir gətirim. SUAL: Müxalifət qəzetləri bunu belə dəyərləndirirlər ki, bir ailədən iki namizəd ola bilməz. İLHAM ƏLİYEV: Məni müxalifət qəzetlərinin yazdıqları maraqlandırmır, bu onların öz işidir. Mən hesab edirəm ki, burada heç kim hər hansı məhdudiyyət qoya bilməz və vətəndaş olaraq bir ailədən lap beş adam da öz namizədliyini irəli sürə bilər. Ona görə, mən onların yazdıqlarına əhəmiyyət vermirəm və sizə də onların yazdıqlarına əhəmiyyət verməməyi məsləhət görürəm. Hesab edirəm ki, bu, düzgün qərardır və mənə imkan verəcək ki, seçkilərdə daha fəal iştirak edim və ümumi işimizə öz töhfəmi verim. SUAL: Qalib gələcəyinizə əminsinizmi? İLHAM ƏLİYEV: Əminəm ki, seçkilərdə Heydər Əliyev qalib gələcək, mən də ona səs verəcəyəm. Hesab edirəm ki, Azərbaycan xalqının əksəriyyəti də ona səs verəcəkdir. SUAL: İlham müəllim, iyun ayında “Şahdəniz” layihəsinin təməlqoyma mərasimi keçirilməli idi, bu, nədənsə təxirə salındı. İLHAM ƏLİYEV: Burada hansısa bir xüsusi təməlqoyma mərasimindən söhbət getmir, çünki, hələ ki, texniki cəhətdən biz buna hazır deyilik. Sadəcə olaraq, biz istəyirdik ki, bunu hansısa bir rəmzi şəkildə qeyd edək. Amma sonra qərar belə oldu ki, necə ki, Bakı-Ceyhanın təməli qoyuldu, vaxtı gələndə, borular gətiriləndə və inşaata az vaxt qalanda bu layihənin də təməli qoyulsun. Yəni hesab etdik ki, bu, daha məqsədəuyğun olar. “Şahdəniz” layihəsi həyata keçirilir, hər şey proqram üzrə gedir, əminəm ki, nəzərdə tutulan vaxt “Şahdəniz” də istismara veriləcək və beləliklə, Azərbaycan həm neft, həm də qaz ixrac edən ölkəyə çevriləcəkdir. SUAL: İlham müəllim, son günlər Ermənistan silahlı qüvvələri Azərbaycan mövqelərini tez-tez atəşə tuturlar. Bu, nə məqsədlə ola bilər? İLHAM ƏLİYEV: Bilirsiniz, ehtimallar irəli sürmək olar, mən dəqiq deyə bilmərəm bu nə ilə bağlıdır. Ola bilər ki, bunun səbəbi seçkilərlə bağlıdır, ola bilər ki, bunun səbəbi Ermənistandakı daxili vəziyyətdir. Biz dəfələrlə görmüşük ki, Ermənistanda vəziyyət gərginləşəndə onlar dərhal ictimai rəyi yayındırmaq üçün hansısa addımlara üstünlük verirlər, o cümlədən atəşkəsin pozulmasına da imkan yaradırlar, daha doğrusu onu pozurlar. Ola bilər ki, bu, onunla bağlıdır, amma mən dəqiq deyə bilmərəm.SUAL: Ukrayna mətbuatına müsahibənizdə bildirmişdiniz ki, sentyabrda Odessa-Brodı layihəsinə görə bu ölkəyə səfər edəcəksiniz. Bu məsələ gündəlikdə qalırmı? İLHAM ƏLİYEV: Gündəlikdə qalır, amma deyə bilərəm ki, biz öz nümayəndəmizi ora göndərmişdik. Ukraynada bu məsələ ilə bağlı böyük bir konfrans keçirilmişdi. Azərbaycandan da nümayəndə orada iştirak etmişdi. Hesab edirəm ki, biz mövqeyimizdə qalırıq. Biz bu layihəni dəstəkləyirik, amma gərək iqtisadi cəhətdən buna baxaq. Yəni layihənin texniki-iqtisadi əsaslandırılması bizə təqdim olunmalıdır, maliyyə mənbələri bizə bəlli olmalıdır və biz gərək onu da müzakirə edək ki, Azərbaycan bu layihədə hansı şəkildə iştirak edə bilər. Ona görə ilkin mərhələdə biz öz nümayəndəmizi ora göndərdik, konfransda iştirak etdi və çıxış etdi, bizim bu layihəyə siyasi dəstəyimizi onlara çatdırdı. Beləliklə, Azərbaycan bir daha bəyan etdi ki, bu layihəni dəstəkləyir. O ki qaldı mənim səfərimə, o yəqin ki, vaxtı gələndə reallaşacaqdır. SUAL: İlham müəllim, seçki kampaniyası ilə əlaqədar yəqin ki, rayonlara səfər edəcəksiniz. İLHAM ƏLİYEV: Əlbəttə ki, bölgələrə çıxacağam. Mən onsuz da mütəmadi qaydada bölgələrdə oluram, seçkilər ilə bağlı və yaxud digər məsələlərlə əlaqədar çalışacağam ki, bölgələrdə olum və həm vəziyyəti yaxından öyrənim, həm də seçki kampaniyasında iştirak edim. SUAL: İlham müəllim, Sizin seçki qərargahınız Yeni Azərbaycan Partiyasında yaradılacaq, bu, partiyada iki namizədin seçki qərargahının yaradılması deyil ki?İLHAM ƏLİYEV: Xeyr. Mən ümumiyyətlə, bu barədə hələ düşünməmişəm. Ola bilər ki, mən seçki qərargahı yaratmayım. Çünki, mən bəyan etdim ki, seçkilərdə iştirakımın əsas məqsədi Heydər Əliyevin seçki kampaniyasında iştirak etməkdir. Mən o qərargahda təmsil olunacağam və öz vəzifəmi yalnız bu prizmadan həyata keçirəcəyəm.Sağ olun, təşəkkür edirəm.