REGİONLAR
ASTARADA 2005-Cİ İLİN YEKUNLARI VƏ 2006-CI İLDƏ QARŞIDA DURAN VƏZİFƏLƏR MÜZAKİRƏ EDİLMİŞDİR
Rayon icra hakimiyyətinin başçısı Oqtay Abbasov hesabat məruzəsi ilə çıxış edərək bildirmişdir ki, yola saldığımız il astaralılar üçün uğurlu olmuşdur. 2005-ci ildə ümummilli liderimiz Heydər Əliyevin siyasi kursu bütün sahələrdə müvəffəqiyyətlə davam etdirilmiş, Prezident İlham Əliyevin gündəlik qayğısı nəticəsində Astara rayonunun dinamik inkişafı təmin edilmişdir.
Ölkəmizin başçısının Astaraya 3 dəfə səfər etdiyini diqqətə çatdıran natiq, bu səfərlərin respublika əhəmiyyətli obyektlərin istifadəyə verilməsi ilə əlamətdar olduğunu bildirmiş, ölkəmizdə ilk modul tipli elektrik stansiyasının Astarada tikilməsini Prezidentin cənub bölgəsinin əhalisinə göstərdiyi qayğının təzahürü kimi qiymətləndirmişdir.
Regionların sosial-iqtisadi inkişafı Dövlət Proqramında nəzərdə tutulan tədbirlərin icrası barədə məlumat verən icra başçısı bildirmişdir ki, 2005-ci ildə rayonun aqrar sektorunda bir sıra nailiyyətlər qazanılmış, yeni emal müəssisələri və sosial obyektlər istifadəyə verilmişdir.
Qeyd olunmuşdur ki, “Azərsun-Holdinq” Şirkətlər Birliyi rayondakı 2 nömrəli çay fabrikində yenidənqurma işləri aparmış, burada yüksək keyfiyyətdə yaşıl çay yarpağının emalı təmin edilmiş, çayçılıqda və sitrusçuluqda 1255 nəfər mövsümi işlərə cəlb olunmuşdur.
Ötən il rayonun Telman kəndində sutkalıq gücü 300 ton, Maşxan kəndində isə sutkalıq gücü 150 ton olan konserv zavodları istifadəyə verilmiş, hər iki emal müəssisəsində 225 nəfər daimi, 500 nəfər mövsümi işlə təmin edilmişdir. Rayonun yeni işə düşmüş müəssisələrində 2932 nəfər dami, 4250 nəfər müvəqqəti işlərə cəlb edilmişdir.
Hesabat məruzəsində rayonda sosial infrastrukturun yaxşılaşdırılması sahəsində qazanılan nailiyyətlərdən də ətraflı söhbət açılmışdır.
Bildirilmişdir ki, rayon əhalisinə təbii qazın verilməsini yaxşılaşdırmaq məqsədi ilə burada əsaslı təmir işləri aparılmış, 11,8 kilometr qaz xətti yenisi ilə əvəz edilmiş, dörd kəndə təbii qazın verilməsi bərpa edilmişdir.
Yola saldığımız ildə Astarada 9 məktəbin inşasına başlanmış, həmin məktəblərdən 6-sı yeni dərs ilində istifadəyə verilmişdir. Yeni təhsil ocaqlarının 3-ü Heydər Əliev Fondunun təşəbbüsü ilə tikilmişdir.
İclasda çıxış edənlər 2005-ci ildə əldə olunmuş nailiyyətlərlə bərabər, yol verilmiş nöqsanları, mövcud problemləri ətraflı təhlil etmiş, 2006-cı ildə qarşıda duran vəzifələrlə bağlı təkliflərini bildirmişlər.
Şura iclasında Dövlət Sərhəd Xidmətinin rəisi Elçin Quliyev çıxış edərək 2005-ci ildə respublikamızda sosial-iqtisadi inkişaf sahəsində qazanılan nailiyyətlərdən danışmış, qeyri-neft sektorunun, sahibkarlığın inkişafı, yoxsulluğun azaldılması istiqamətində dövlətimizin ardıcıl həyata keçirdiyi tədbirləri diqqətə çatdırmışdır.
Ölkəmizin xarici siyasət sahəsində qazandığı diplomatik uğurları vurğulayan natiq, vətəndaşların İrana sadələşdirilmiş qaydada keçidi ilə bağlı əhali tərəfindən edilən müraciətlərin həlli istiqamətində zəruri tədbirlərin görüldüyünü bildirmişdir.
Yığıncaqda Astara rayonunun 2006-cı il üçün sosial-iqtisadi inkişaf proqramı təsdiq edilmişdir.
Şura iclasında müzakirə olunan məsələ ilə əlaqədar müvafiq qərar qəbul olunmuşdur.
Toplantıda Prezident İlham Əliyevə müraciət qəbul edilmişdir.
Milli Məclisin deputatı Vasif Əliyev və Prezidentin İcra Aparatının məsul işçisi Tağı Tağıyev tədbirdə iştirak etmişlər.