Mayın 7-də Bakı Biznes Universitetində “Heydər Əliyev və Azərbaycanın sosial-iqtisadi tərəqqisi” mövzusunda elmi-praktik konfrans keçirilmişdir. Tədbir başlanmazdan əvvəl qonaqların - Milli Məclisin deputatları Şahlar Əsgərovun, Tahir Rzayevin və digərlərinin iştirakı ilə “Heydər Əliyev idarəetmə məktəbi”nin açılışı olmuşdur.

Konfransı universitetin rektoru, iqtisad elmləri doktoru, professor İbad Abbasov açmışdır.

Milli Məclisin deputatı, Elm və təhsil məsələləri daimi komissiyasının sədri Şahlar Əsgərov, YAP Yasamal rayon təşkilatının sədri Fikrət İsmayılov öz çıxışlarında tarixi paralellər apararaq, real faktlar gətirərək Heydər Əliyevin tarixi şəxsiyyət, müstəqil Azərbaycan dövlətinin qurucusu olduğunu əsaslandırmış, ona xalq məhəbbətinin, beynəlxalq aləmdə, xüsusilə türk dünyasında olan dərin hörmətin köklərini açıqlamış və xatırlatmışlar ki, Prezidentimizin ad gününün qeyd olunması təkcə Azərbaycanla məhdudlaşmır. Çünki o, tarixi şəxsiyyətdir, onun qədrini bilməliyik.

Sonra rektor İbad Abbasovun “Heydər Əliyev və Azərbaycanın iqtisadi inkişafı”, universitetin elmi işlər üzrə prorektoru, Milli Elmlər Akademiyasının müxbir üzvü Ağasəlim Ələsgərov “Heydər Əliyev və müstəqil Azərbaycan Respublikasının xarici iqtisadi əlaqələrinin təşəkkülü, formalaşması və inkişafı”, tarix elmləri doktoru Xaqani Məmmədovun “Heydər Əliyev və Azərbaycanda müstəqil, demokratik dövlət quruculuğu” mövzularında məruzələri dinlənilmişdir.

Konfransda Azərbaycan Prezidenti Heydər Əliyevə təbrik məktubu oxunmuşdur.

Təbrikdə deyilir:

Əziz və möhtərəm Prezident!

Sizi – dünya şöhrətli siyasi xadimi, xalqımızın böyük oğlunu, müstəqil Azərbaycan dövlətinin xilaskarını və qurucusunu anadan olmağınızın 80 illiyi münasibətilə ürəkdən təbrik edir, sizə uzun ömür, möhkəm cansağlığı, ölkəmizin yüksəlişi və tərəqqisi naminə yorulmaz və möhtəşəm fəaliyyətinizdə daha böyük uğurlar arzu edirik.

Siz bütün şüurlu həyatınızı Azərbaycanın inkişafına həsr etmisiniz. Azərbaycana rəhbərlik etdiyiniz 1969-1982-ci illərdə yüksək idarəçilik və təşkilatçılıq bacarığınız sayəsində ölkəmiz sosial-iqtisadi və mədəni həyatın bütün sahələrində misilsiz inkişaf yolu keçərək, qabaqcıl respublikalardan birinə çevrilmişdi. Məhz Sizin sayənizdə keçmiş Sovetlər Birliyinin tərkibində Azərbaycanın gələcək müstəqilliyinin möhkəm iqtisadi təməli qoyulmuşdu.

XX əsrin sonlarında xalqımız ikinci dəfə dövlət müstəqilliyini itirmək təhlükəsi qarşısında qaldıqda, Siz öz xilaskarlıq missiyanızı, yüksək vətəndaşlıq borcunuzu şərəflə yerinə yetirdiniz. Beləliklə, Azərbaycan dövlətçiliyi qorunub saxlandı, vətəndaş müharibəsi dayandırıldı, dövlət çevrilişi cəhdlərinin, terror aktlarının qarşısı qətiyyətlə alındı, cəbhədə atəşkəs elan edildi, ölkədə möhkəm ictimai-siyasi sabitlik yarandı, Ermənistan-Azərbaycan, Dağlıq Qarabağ münaqişəsinin sülh yolu ilə, dövlətimizin ərazi bütövlüyü və sərhədlərimizin toxunulmazlığı prinsipi əsasında nizama salınması üçün danışıqlara başlandı.

Azərbaycanda hüquqi, demokratik və dünyəvi dövlət quruculuğu prosesi uğurla həyata keçirilir. Ötən illər ərzində ölkədə mütərəqqi siyasi-iqtisadi və sosial islahatlar aparılmışdır. Sizin fəal iştirakınız və rəhbərliyinizə respublikamızda demokratik dəyərlərə söykənən qanunvericilik bazası yaradılmış və daha da təkmilləşdirilməkdədir.

Müstəqil dövlətimizin beynəlxalq aləmdə mövqeləri möhkəmlənmişdir. Azərbaycan Böyük İpək yolunun bərpası, Bakı-Tbilisi-Ceyhan əsas ixrac boru kəməri, Bakı-Tbilisi-Ərzurum qaz kəməri kimi qlobal layihələrin fəal iştirakçısına çevrilmişdir.

Əziz Prezident!

Biz təhsil işçiləri Sizin Azərbaycanda xalq təhsilinin inkişafına qayğınızı, müəllim əməyini yüksək qiymətləndirməyinizi ürəkdən alqışlayırıq. Son illərdə ölkəmizdə sahibkarlığın təşəkkülü və inkişafı, özəl ali təhsil müəssisələrinin yaranması və dövlət təhsil müəssisələri ilə bərabər mövqe tutması Sizin adınızla bağlıdır.

Sizi – müstəqil dövlətçiliyimizin qurucusunu, xalqımızın xilaskar oğlunu 80 illik yubileyiniz münasibətilə bir daha səmimi-qəlbdən təbrik edir, Sizə uzun ömür, sağlamlıq, dövlətimizin və xalqımızın xoş gələcəyi naminə yorulmaz fəaliyyətinizdə yeni-yeni uğurlar arzulayırıq.