Məclisin AŞPA-dakı daimi nümayəndə heyətinin başçısı İlham Əliyevin Avropa Şurası Parlament Assambleyasının sədr müavini və Büro üzvü seçilməsi deputatlar arasında böyük əks-səda doğurmuşdur. AZƏRTAC-ın müxbiri Milli Məclisin deputatları Əli Abbasov, Bəxtiyar Əliyev və Əli Hüseynovdan, habelə isveçrəli deputat Andreas Qrossdan qısa müsahibələr almışdır. Həmin müsahibələri oxuculara təqdim edirik. 

ƏLİ ABBASOV: Mən cənab İlham Əliyevin AŞPA-nın sədr müavini seçilməsini bütün Azərbaycan xalqının, Azərbaycan diplomatiyasının qələbəsi kimi səciyyələndirirəm. Bu, bir tərəfdən ölkəmizdə aparılan hüquqi islahatların, demokratik quruculuğun, beynəlxalq təşkilatlarda Azərbaycanın nüfuzunun artmasının, digər tərəfdən isə şəxsən İlham Əliyevin hərtərəfli fəaliyyətinin nəticəsidir. İlham Əliyevin bu vəzifəyə seçilməsi son iki ildə bizim deputat qrupunun fəaliyyətinə AŞ deputatlarının verdiyi yüksək qiymət kimi başa düşülməlidir. İlham Əliyevin təkcə rəsmi çıxışları, gördüyü işlər deyil, həm də özünə xas olan şəxsi və diplomatik keyfiyyətləri AŞ-da onun nüfuzunun artmasına səbəb olmuşdur.

O, boş yerə vaxt sərf etmir, sessiyaya gələrkən dəqiq iş planı tutur, həm özünə, həm də deputatlara tələbkarlıqla yanaşır. İlham Əliyev işləməyi sevir və bizdən də işgüzarlıq tələb edir.

İlham Əliyevin AŞPA-nın sədr müavini seçilməsi Azərbaycan diplomatiyasının qarşısında nə kimi perspektivlər aça bilər?

Birincisi, ilk dəfədir ki, Azərbaycandan olan siyasətçi belə bir qurumun rəhbərliyində təmsil olunur. Bu isə özlüyündə ölkəmiz üçün yeni imkanlar yaradır. İkincisi, İlham Əliyevin yeni vəzifəsi AŞPA-nın bəzi yığıncaqlarına onun sədrlik etməsinə, Büro iclaslarında əsas məsələlərin hazırlanmasında bilavasitə iştirakına, müəyyən məsələlərə təsir göstərməyə, müdaxilə etməyə imkan yaradır. Bir sözlə, nümayəndə heyətimizin başçısı İlham Əliyevin yeni vəzifəsi deputatlarımızın AŞPA-dakı fəaliyyətinə yeni təkan verəcəkdir.

BƏXTİYAR ƏLİYEV: Azərbaycan nümayəndə heyətinin başçısı İlham Əliyevin bu beynəlxalq qurumun sədr müavini və Büro üzvü seçilməsi hamımızı sevindirir. Adətən, sədr müavinləri bir il müddətinə seçildiyi halda, İlham Əliyevin iki ildən artıq müddətə bu vəzifəyə seçilməsi Azərbaycan üçün böyük hadisədir. Bu müddət ərzində onun ölkəmizi narahat edən bir çox məsələlərə istər Büroda, istərsə də AŞPA-nın sessiyalarında münasibət bildirməsinə əlverişli şərait yaradacaqdır.

İndiyə qədər Azərbaycan nümayəndə heyəti müəyyən məsələləri qaldırırdı. Lakin onlara baxılarkən Azərbaycan nümayəndə heyəti orada təmsil olunmadığından, ikili standartlarla qarşılaşırdıq. İndi isə vəziyyət dəyişmişdir.

Cənab İlham Əliyevin düzgün müəyyən etdiyi taktika və strategiyanın nəticəsidir ki, qaldırdığımız məsələlərə artıq AŞPA-nın rəhbərliyi və deputatları tərəfindən rəğbətlə yanaşılır. Onlar bizim haqq işimizə dəstək verməyə başlayırlar. Eyni zamanda, demək istəyirəm ki, AŞPA-nın indiki sessiyasının ilk iclasında İlham Əliyev sabitlik faktı ilə bağlı dərin məzmunlu çıxış etdi və nəhayət, Ermənistanın ölkəmizin ərazisini işğal etməsini AŞPA-nın rəsmi olaraq öz sənədlərində qeyd etməsi faktını açıqladı. Bu onu göstərir ki, respublikamızın işğal altında olan ərazisinin sülh yolu ilə qaytarılmasının, Ermənistan silahlı qüvvələrinin işğal olunmuş ərazilərdən çıxarılmasının və məcburi köçkünlərin öz doğma yerlərinə qayıtmasının vaxtı çatıbdır. Bu, nəinki Azərbaycanda, ümumən Avropada həm sabitliyin, həm də demokratiyanın inkişafına xidmət etmiş olar. Yeni ilin bizim üçün belə uğurla başlaması gələcəkdə Azərbaycan dövlətinin və xalqının mənafeyinə uyğun qərarların qəbul ediləcəyinə böyük inam yaradır.

ƏLİ HÜSEYNOV: AŞPA-nın qış sessiyasının ilk iclasında Azərbaycan parlamenti nümayəndə heyətinin başçısı İlham Əliyevin sədr müavinlərindən biri seçilməsi həm Avropa Şurası, həm də Azərbaycan üçün mühüm bir hadisədir.

1993-cü ildən bəri Prezident Heydər Əliyevin hüquqi dövlət quruculuğu sahəsində gördüyü işlərin məntiqi nəticəsi olaraq, ölkəmizin AŞ-yə üzv qəbul edilməsi tarixi bir hadisə idi. Azərbaycan AŞ-yə daxil olduqdan sonra İlham Əliyevin rəhbərliyi ilə görülən işlər müasir Azərbaycan tarixinin və diplomatiyasının ən uğurlu səhifələridir. Xüsusi vurğulamaq istəyirəm ki, AŞPA-nın sədr müavinləri deputatlar arasında böyük nüfuz qazanmış şəxslərdən ibarətdir. Bu baxımdan cənab İlham Əliyevin sədr müavini seçilməsi qanunauyğun haldır. Çünki AŞ artıq onu tanınmış siyasətçi, uzaqgörən diplomat, insan hüquqlarını və demokratik dəyərləri yüksək qiymətləndirən bir insan kimi qəbul etmişdir. Onun fəaliyyətinin AŞ-yə verdiyi şəxsi töhfələr öz layiqli qiymətini alıbdır. Bu mühüm hadisə bir daha onu sübut etdi ki, Azərbaycan bu iki il ərzində AŞ-nin bütün sınaqlarından şərəflə çıxıbdır.

Nümayəndə heyətinin başçısı İlham Əliyevin AŞPA-dakı fəaliyyətinə kölgə salmaq cəhdləri olmuşdur. Hələ ölkəmiz AŞ-yə üzv qəbul olunmaq ərəfəsində müxalifət buna mane olmağa səy göstərirdi. Amma heç nəyə nail ola bilmədilər. Bu gün Azərbaycandakı radikal müxalifət və xaricdəki düşmənlərimiz, xüsusilə ermənilər bilməlidirlər ki, heç vaxt öz məqsədlərinə çatmayacaqlar, əksinə, bizim bu cür nailiyyətlərimiz hələ çox olacaqdır.

ANDREAS QROSS: Həmkarımız cənab İlham Əliyevin AŞPA-nın sədr müavini seçilməsi məni sevindirir. Mən bilirəm ki, sədr müavini olmağın özü bir şərəfdir. Qeyd etmək istəyirəm ki, bu elə prosesdir ki, hər ölkənin nümayəndəsi sədr müavini seçilir və bu həmin ölkə üçün bir fəxrdir. Bu şərəfə Avropa Şurası Parlament Assambleyasında ölkəsi üçün çox işlər görən deputatlar nail olurlar. Bu mənada deputatlar arasında böyük nüfuz qazanmış İlham Əliyevin həmin vəzifəyə seçilməsini ürəkdən qəbul edir və alqışlayıram.

Dünən AŞPA-nın iclasını mən idarə edirdim. Hər iki Əliyevi yaxşı tanıdığımdan, artıq özünü layiqli diplomat kimi göstərmiş cənab İlham Əliyevə məmnuniyyətlə səs verdim. Bununla da qəlbən Azərbaycan vətəndaşları ilə birgə olduğumu bir daha sübut etdim. Bu, həqiqətən belədir.

Əlbəttə, yeri düşəndə tənqid də lazımdır. Tənqidin özü ölkənin xeyrinə bir xidmətdir. Mənim fikrimcə, qərəzli fikirləri gizlədib, əvəzində başqa şey danışmaq daha qorxuludur, daha pisdir.

Mən cənab İlham Əliyevi bir daha qəlbən təbrik edirəm.

Əsgər Əliyev

AZƏRTAC-ın xüsusi müxbiri

Strasburq