Azərbaycan Prezidenti Heydər Əliyev AFR-ə rəsmi səfəri zamanı, iyulun 3-də Düsseldorfda dünyanın ən sabit və iri banklarından biri olan “Doyçe Bank”ın iqamətgahına getmişdir.

Bankın idarə heyətinin üzvü Georq Krupp ali qonağı, Azərbaycan nümayəndə heyətinin üzvlərini salamlayaraq dedi ki, “Doyçe Bank” bir neçə ildir Azərbaycanda baş verən hadisələri böyük maraqla izləyir. G.Krupp keçən ilin payızında Bakıda Azərbaycanın dövlət başçısı ilə ilk görüşünü xatırlayaraq qeyd etdi ki, biz o zaman başa düşdük ki, bu respublikada sabitliyin və iqtisadi yüksəlişin təminatçısı məhz Prezident Heydər Əliyevdir. Ona görə də “Doyçe Bank” respublikanın iqtisadi inkişafının sürətləndirilməsində Azərbaycan Prezidentinə kömək etmək niyyətindədir. Azərbaycan haqqında iki kitabçanın buraxılması da bu köməyin təzahürlərindən biridir. Cənab Krupp həmin kitabçaların nüsxələrini Prezident Heydər Əliyevə təqdim etdi. Kitabçalardan biri Azərbaycandakı siyasi və iqtisadi şəraiti işıqlandırır və dünyanın müxtəlif ölkələrində geniş yayılır. İkinci kitabça isə respublikanın iqtisadi inkişafına kömək göstərmək istəyən sərmayədarlar üçün iqtisadi bələdçidir.

Görüş zamanı qeyd olundu ki, “Doyçe Bank”ın vəzifələrindən biri Azərbaycanla iş görmək istəyənlərlə ünsiyyət yaradılmasında kömək göstərməkdir. İşgüzar dairələrin nümayəndələrinin iştirak etdikləri bu görüş də məhz həmin məqsədlə təşkil olunmuşdur və onun iştirakçıları özlərini maraqlandıran məsələləri Azərbaycan nümayəndə heyəti ilə müzakirə edə biləcəklər. Cənab Krupp onu da bildirdi ki, “Doyçe Bank” bank sisteminin formalaşdırılmasında habelə ixitsaslı kadrların hazırlanmasında kömək göstərir.

Sonra aşağıdakı sənədlərin – Azərbaycan Milli Bankı ilə “Doyçe Bank” arasında maliyyə əməkdaşlığı sahəsində qarşılıqlı anlaşma haqqında memorandum və Azərbaycan Beynəlxalq Bankı ilə AQ Banklar Konsorsiumu arasında bu saziş çərçivəsində kredit xətti açılması haqqında saziş imzalandı.

G.Krupp sənədlərin imzalanmasından əvvəl bildirdi ki, bunlar Almaniya və Azərbaycan bankları arasında maliyyələşdirmə sahəsində qarşılıqlı münasibətləri genişləndirmək üçün zəmin yaradır. Memorandum baza sənədidir, saziş isə ixrac sövdələşəmələrinin avans olaraq maliyyələşdirilməsini nəzərdə tutur.

Sənədlərin imzalanması mərasimi başa çatdıqdan sonra Prezident Heydər Əliyev görüş iştirakçılarını bu mühüm hadisə münasibətilə təbrik edərək dedi ki, sənədlərin reallaşdırılması Azərbaycan iqtisadiyyatının gələcək inkişafına, habelə respublikamız ilə Almaniya arasında əməkdaşlığın dərinləşməsinə kömək göstərəcəkdir.

Dövlətimizin başçısı “Doyçe Bank”da görüşdən xatirə olaraq Georq Kruppa Azərbaycan haqqında kitablar təqdim etdi. Prezident Heydər Əliyev bildirdi ki, bunlardan istifadə etməklə respublikamız haqqında daha ətraflı nəşrlər hazırlamaq mümkündür. Azərbaycan rəhbəri ona hədiyyə edilmiş kitabçalar üçün “Doyçe Bank”a təşəkkürünü bildirdi.

Sonra Azərbaycan Prezidenti Heydər Əliyevin şərəfinə “Doyçe Bank”ın idarə heyəti adında ziyafət verildi.