RƏSMİ XRONİKA
AZƏRBAYCAN PREZİDENTİ İLHAM ƏLİYEV ATƏT-İN HAZIRKI SƏDRİNİ QƏBUL ETMİŞDİR
Qonaqları səmimiyyətlə salamlayan dövlətimizin başçısı İlham Əliyev bundan əvvəl ATƏT-in sədri ilə təkbətək görüş zamanı geniş fikir mübadiləsi aparıldığını, bir çox məsələnin müzakirə edildiyini, Azərbaycanın strateji istiqamətinin beynəlxalq strukturlara, Avropa strukturlarına inteqrasiyadan ibarət olduğunu vurğuladı. Prezident İlham Əliyev dedi ki, Azərbaycanda bu vaxta qədər aparılmış və bundan sonra da davam etdiriləcək siyasət bizim düz yolla getdiyimizi göstərir.
Azərbaycanın sürətlə inkişaf edən ölkə olduğunu xatırladan Prezident İlham Əliyev bildirdi ki, iqtisadi, sosial, siyasi islahatlar öz müsbət nəticələrini verməkdədir. Bu islahatlar davam etdiriləcək və ölkəmiz hərtərəfli inkişafa nail olacaqdır. Azərbaycanın çox güclü iqtisadi potensialı var. Aparılan iqtisadi siyasət ölkəmizi iqtisadi cəhətdən gücləndirməyə imkan verir. Bütün iqtisadi göstəricilərimiz yüksəkdir. Adambaşına düşən xarici sərmayələrin həcminə görə Azərbaycan MDB məkanında liderdir. Ümumi daxili məhsulun ildən ilə artması da göstərir ki, aparılan iqtisadi islahatlar böyük uğurlar gətirir.
Azərbaycanda siyasi islahatların aparıldığını, demokratiyanın inkişaf etdiyini, çoxpartiyalı sistemin bərqərar olduğunu vurğulayan respublikamızın rəhbəri əminliklə dedi ki, gələcəkdə bizi bu yolda da böyük uğurlar gözləyir. Biz əminik, seçdiyimiz yol imkan verəcək ki, Azərbaycanda demokratik dəyərlər bundan sonra da inkişaf etsin və ölkəmizə böyük faydalar gətirsin. Prezident İlham Əliyev bütün bunlarla yanaşı, sosial məsələlərin həllinə də böyük diqqət yetirildiyini, regionların sosial-iqtisadi inkişafına dair Dövlət Proqramının əsas məqsədinin Azərbaycanda yaşayan vətəndaşların həyat səviyyəsini daha da yüksəltməkdən, ən çətin vəziyyətdə yaşayan qaçqınlar və köçkünlərdən ötrü müasir, gözəl şəraitin təmin edilməsindən ibarət olduğunu vurğuladı. Dövlətimizin başçısı Azərbaycan üçün ən ağrılı problem olan Ermənistan-Azərbaycan, Dağlıq Qarabağ münaqişəsindən danışaraq dedi: Biz ümid edirik ki, ATƏT-in Minsk qrupu bu münaqişənin həlli istiqamətində öz səylərini artıracaqdır. Əfsuslar olsun ki, bu vaxta qədər bu istiqamətdə heç bir müsbət dəyişiklik yoxdur və münaqişə həll edilməmiş qalır. Artıq bütün dünya ictimaiyyəti bilir ki, bu münaqişə nəticəsində Azərbaycan torpağının 20 faizi işğal olunmuş, bir milyondan artıq qaçqın-köçkün yaranmışdır. Təəssüflər olsun ki, Ermənistan tərəfi qeyri-konstruktiv mövqe tutur, Ermənistan silahlı qüvvələri işğal olunmuş torpaqlardan çıxmaq istəmir. Beləliklə, ümumiyyətlə, region üçün böyük təhlükə yaranır.Problemin həlli üçün ilk növbədə, beynəlxalq hüquq normalarına əməl olunmasının zəruriliyini vurğulayan Prezident İlham Əliyev bildirdi ki, münaqişə yalnız bu normalar əsasında öz həllini tapa bilər. Yəni Azərbaycanın ərazi bütövlüyü bərpa edilməli, Ermənistan silahlı qüvvələri işğal olunmuş torpaqlardan çıxarılmalı, qaçqınlar, köçkünlər öz doğma torpaqlarına qayıtmalıdırlar. Biz ümid edirik ki, ATƏT və onun Minsk qrupu öz səylərini göstərəcək və bu münaqişə tezliklə öz ədalətli, beynəlxalq hüquq normalarına əsaslanmış həllini tapacaqdır.Cənab Solomon Passi vaxt ayırıb onu və nümayəndə heyətini qəbul etdiyinə görə dövlətimizin başçısı İlham Əliyevə təşəkkürünü bildirdi. ATƏT-in hazırkı sədri Azərbaycan Prezidenti seçilməsi münasibətilə cənab İlham Əliyevi bir daha təbrik etdi, bu məsul vəzifədə ona uğurlar dilədi. O, Bakıda ilk dəfə olduğunu və şəhərin tarix-mədəniyyət abidələrinin onda böyük təəssürat yaratdığını söylədi. Qonaq Azərbaycanın Avropaya inteqrasiyası prosesini yüksək qiymətləndirdi. O, eyni zamanda, dedi ki, 15 il əvvəl heç kimin ağlına belə gəlməzdi ki, onun ölkəsinin də yerləşdiyi Balkan yarımadası Şimali Atlantika blokuna bu qədər yaxın olacaqdır. Lakin indi bu, reallıqdır və əminəm ki, inteqrasiya prosesi daha geniş vüsət alaraq bütün Qara dəniz məkanını əhatə edəcəkdir. Cənab Solomon Passi ATƏT-ə üzv ölkələrlə daha sıx inteqrasiya üçün Azərbaycana hər cür yardım edəcəklərini bildirdi.ATƏT-in sədri Dağlıq Qarabağ münaqişəsindən danışaraq dedi ki, bunun nə dərəcədə ciddi və Azərbaycan xalqı üçün ağrılı problem olduğunu bilir. O, təəssüflə vurğuladı ki, ATƏT-in Minsk qrupunun vasitəçilik missiyası hələ də nəticə vermir. Qonağın fikrincə, onun rəhbərlik etdiyi təşkilat yalnız birbaşa danışıqların hər hansı bir nəticə verəcəyinə ümid edir. Solomon Passi dedi: Mən hər iki ölkənin prezidentlərinin dialoqundan çox şey gözləyirəm və bunu Yerevana səfərim zamanı da bəyan edəcəyəm. Qəbulda Prezidentin İcra Aparatının xarici əlaqələr şöbəsinin müdiri Novruz Məmmədov, ATƏT-in Bakı ofisinin rəhbəri Piter Burhard iştirak edirdilər.