Müstəqil Azərbaycan bu gün öz tarixinin əlamətdar və məsuliyyətli bir dövrünü yaşayır. Azərbaycan xalqı dövlətçiliyimiz üçün taleyüklü bir hadisənin – yeni əsrin ilk prezident seçkiləri ərəfəsindədir. Müdrik xalqımız qarşıdakı beş ildə müstəqil Azərbaycanın xoşbəxt gələcəyinə, milli müstəqilliyimizin əbədiliyinə, dönməzliyinə təminat verən dövlət başçısını seçəcəkdir.

Azərbaycan Respublikasının Təhsil Şurası özünün ümumrespublika toplantısında ölkənin bütün pedaqoji ictimaiyyətinin arzu və istəkləri əsasında tarixi məsuliyyətini dərindən dərk edərək bəyan edir:

Xalqımızın ümummilli lideri, təhsilimizin böyük təəssübkeşi, ilk Xalq Müəllimi Heydər Əlirza oğlu Əliyevin prezidentliyə namizədliyi ölkəmizin 220-dən artıq təşkilatını birləşdirən “Yeni Azərbaycan Naminə” İctimai Hərəkat tərəfindən müdafiə olunaraq, bu tarixi əhəmiyyətli məsələnin gerçəkləşməsi yolunda əməli fəaliyyətə başlanılmışdır.

Azərbaycana rəhbərlik missiyasını bir qərinədən artıqdır ki, uğurla həyata keçirən Heydər Əliyevin xalqımız qarşısında müstəsna xidmətləri vardır. Onun milli mənafeyi hər şeydən uca tutan, millət və Vətən sevgisindən yoğrulan böyük siyasi-dövlətçilik fəaliyyəti müasir tariximizin bütün taleyüklü məqamları, bütün uğurları ilə birbaşa bağlıdır. Bu mənada, cənab Heydər Əliyevin söylədiyi “Mənim seçki platformam Azərbaycana həsr edilən həyatım, fəaliyyətim, əməllərimdir” müdrik kəlamı tariximizin son 34 illik mərhələsinin inkişaf dinamikası və real nəticələri ilə təsdiqlənir.

Prezidentimizin Azərbaycana rəhbərlik etdiyi son 10 ildə ölkəmizdə hüquqi, demokratik dövlət qurulmuş, müstəqilliyimizin əbədiliyi təmin edilmiş, iqtisadi, mədəni və sosial inkişaf sahəsində tərəqqiyə nail olunmuş, insan inkişafı ön plana çəkilməklə Vətənimizin beynəlxalq aləmə inteqrasiyası sürətlənərək, demokratik dövlət imici xeyli yüksəlmişdir.

Bütün bu uğurlar Heydər Əliyevin yorulmaz fəaliyyəti, müstəqil, qüdrətli, yeni Azərbaycan uğrunda fədakar mübarizəsi nəticəsində mümkün olmuşdur.

Təhsil işçiləri bu tarixi həqiqəti yüksək qiymətləndirirlər ki, Azərbaycan beynəlxalq birliyə məhz Heydər Əliyev şəxsiyyətinin böyüklüyü və yenilməz nüfuzu ilə daxil olur. Ötən illərin ən böyük uğuru bir də bundan ibarətdir ki, ölkədə ictimai-siyasi, iqtisadi sabitlik tam bərqərar olmuş, Qarabağ münaqişəsinin beynəlxalq hüquq normaları çərçivəsində və sülh yolu ilə həllində irəliləyişə nail olunmuş, bütün sahələrdə başlanılmış əsaslı islahatlar uğurla həyata keçirilir.

Biz belə bir qəti fikirdəyik ki, Prezident Heydər Əliyevin başladığı və möhkəm təməllər üzərində qurulan daxili və xarici siyasəti müdafiə etmək, ölkədə bütün sahələrdə, xüsusən təhsil sahəsində islahat proqramına uyğun olaraq, milli təhsil quruculuğundakı irimiqyaslı tədbirlər kompleksinin ardıcıllıqla reallaşdırılmasına töhfəmizi vermək hər birimizin vətəndaşlıq borcudur.

19\007 AZR - 9

TƏHSİL:13

Bu tarixi məqamda daha dərindən dərk edirik ki, Azərbaycan xalqının, müstəqil Azərbaycan dövlətinin xoşbəxt gələcəyi naminə Heydər Əliyevə indi daha çox ehtiyac vardır.

Biz, Azərbaycan Respublikası Təhsil Şurasının ümumrespublika toplantısının iştirakçıları “Yeni Azərbaycan Naminə” İctimai Hərəkata qoşulduğumuzu bəyan edir və ölkəmizin bütün təhsil işçiləri adından milli qürur hissi ilə bildiririk ki, Azərbaycan Respublikasında 2003-cü il oktyabrın 15-də keçiriləcək prezident seçkilərində möhtərəm Heydər Əlirza oğlu Əliyevin namizədliyini birmənalı şəkildə müdafiə edəcək, müstəqilliyimizin təminatçısını, təhsilimizin böyük himayəçisini yekdilliklə dəstəkləyəcəyik.

Böyük iftixarla möhtərəm Prezidentimizi əmin edirik ki, Azərbaycanın təhsil işçiləri həmişə Heydər Əliyevlə olub, indi onunladır, sabah da onunla olacaqdır!

Bəyanat Azərbaycan Respublikası

Təhsil Şurasının 2003-cü il iyulun 19-da

Bakıda Respublika sarayında

keçirilən 2500 nəfərlik ümumrespublika

toplantısında qəbul edilmişdir.