SİYASƏT
AZƏRBAYCAN RESPUBLİKASI DÖVLƏT SƏNAYEDƏ İŞLƏRİN TƏHLÜKƏSİZ GÖRÜLMƏSİNƏ NƏZARƏT VƏ DAĞ-MƏDƏN NƏZARƏTİ KOMİTƏSİ ƏMƏK KOLLEKTİVLƏRİNİN BƏYANATI
Bunu sübuta yetirmək üçün heç də tarixə ekskurs etmək lazım deyildir. Azərbaycan Prezidenti Heydər Əliyevin böyük şəxsiyyəti, zəngin və müdrik rəhbərlik təcrübəsi, qüdrətli diplomat məharəti, xalqına, millətinə, dövlətinə və Vətəninə sonsuz sədaqəti, fikrimizcə, ən bariz nümunədir. Qətiyyətlə deyə bilərik ki, Azərbaycanın çoxəsrlik tarixində Heydər Əliyev qədər dövlətimizin inkişafı, xalqımızın arzu və amalları uğrunda ardıcıl və məqsədyönlü mübarizə aparan, milli-mənəvi dəyərlərimizə qayğı ilə yanaşan dövlət başçımız olmayıb. Biz, bugünkü yığıncağın iştirakçıları tam məsuliyyətimizlə bəyan edirik ki, Azərbaycanın bir dövlət kimi mövcudluğu, müstəqillik yolu ilə inamla irəliləməsi, dünya dövlətləri sırasında layiqli yer tutması bilavasitə möhtərəm Prezidentimiz Heydər Əliyevin adı ilə bağlıdır.
Prezident Heydər Əliyev dövlətimizin və dövlətçiliyimizin xilaskarıdır. Ötən əsrin 90-cı illərinin əvvəllərində özlərini “bəy” adlandıran səriştəsiz və boşboğaz liderciklərin fəlakət girdabına saldıqları, parçalanıb hətta xəritədən silinmək həddinə gətirib çıxardıqları Azərbaycan evimizi xalqın təkidli tələbi ilə yenidən hakimiyyətə gələn Heydər Əliyev xilas etmişdir.
Prezident Heydər Əliyev yeni Azərbaycan dövlətinin qurucusudur. Respublikamız bu qüdrətli qurucunun rəhbərliyi ilə bir qərinədə bir əsrlik inkişaf yolu keçmişdir. Azərbaycanda bu gün diqqəti çəkən ən möhtəşəm memarlıq inciləri, nəhəng sənaye müəssisələri, bir-birindən yaraşıqlı iri yaşayış massivləri möhtərəm Prezidentin quruculuq salnaməmizin səhifələrinə həkk olunmuş silinməz, pozulmaz yadigarlarıdır.
Prezident Heydər Əliyev gənc, müstəqil dövlətimizin sürətli inkişaf yollarını müəyyənləşdirən və bu yollarda qarşıya çıxan ən müşkül maneələri məharətlə dəf etməyi bacaran müdrik strateqdir. Cənab Prezidentimizin yorulmaz səyləri ilə Azərbaycan son on ildə həyatımızın bütün sahələrində böyük uğurlara qovuşmuş bir məmləkətə çevrilmişdir. Təməli “Əsrin müqaviləsi” ilə qoyulmuş yeni neft strategiyası Azərbaycanı bölgədə mühüm rol oynayan dövlətə çevirmişdir. Bu strategiya nəticəsində Azərbaycan xarici iş adamlarının daha çox sərmayə qoyduqları bir ölkə olmuşdur.
Bu dahi şəxsiyyətin bu cür xidmətlərini necə qiymətləndirməmək olar?! Bütün bunları öz tarixi taleyində yaşayan xalqımız qarşıdan gələn prezident seçkilərində Heydər Əliyevə deyil, bəs kimə səs verməlidir?! Bu gün xəstə təxəyyülləri ilə min cür yalan və böhtan uyduran, milli-mənəvi dəyərlərimizə arxa çevirən, əxlaqsızlığı, mənəviyyatsızlığı özlərinə peşə edən nankorlar birdəfəlik bilməlidirlər ki, xalq artıq öz seçimini edibdir, oktyabrın 15-də hamılıqla Heydər Əliyevə səs verəcəkdir.
Mənəviyyatsızlıq və çirkab girdabına çevrilmiş “Yeni Müsavat”, “Hürriyyət”, “Azadlıq”,”Müxalifət” qəzetlərinin yalan, uydurma, böhtan və iftiradan ibarət yazıları bizdə dərin hiddət və qəzəb hissi doğurmuşdur. Biz belə hərəkətlərin nəinki azərbaycançılığa, hətta insanlığa yaraşmayan əməllər olduğunu bildirməklə bəyan edirik ki, müxalifətin bu cür dağıdıcı mövqeyi müstəqilliyimizin zəiflədilməsinə yönəlmiş xəyanətkarlıqdır, xalqımıza arxadan vurulan düşmən zərbəsidir. Növbəti prezident seçkilərində də iflasa uğrayacağını hiss edən dağıdıcı müxalif qüvvələr və onların xarici himayədarları belə şayiələrlə daha xalqımızı çaşdıra, ölkəmizdə sabitliyi poza bilməyəcəklər. Müxalifətçilər başa düşmürlər ki, tarixin ağır sınaqlarından dövlətimizin müdrik başçısı Heydər Əliyevin rəhbərliyi ilə məharətlə çıxan, kimin kim olduğunu yaxşı bilən xalqımızı öz tarixi inkişaf yolundan heç bir qüvvə, heç bir siyasi şou, heç bir şayiə döndərə bilməz.
Bu bəyanatımızla şər qüvvələrə birmənalı şəkildə bir daha qəti olaraq deyirik ki, çoxminli kollektivimizin bir seçimi, bir yolu vardır. Bu seçim Heydər Əliyev, bu yol Heydər Əliyev yoludur. Hələ 1993-cü ilin oktyabr ayında müəyyən etdiyimiz bu seçim, bu yol kollektivimiz üçün dəyişməzdir, əbədidir. Biz bu seçimə, bu yola sadiq olmuşuq və bundan sonra da sadiq qalacağıq.
Bəyanat Azərbaycan Respublikası Dövlət
Sənayedə İşlərin Təhlükəsiz Görülməsinə
Nəzarət və Dağ-Mədən Nəzarəti Komitəsi əmək
kollektivləri nümayəndələrinin 1 avqust
2003-cü il tarixdə keçirilmiş toplantısında
qəbul edilmişdir.