Milli Məclisin sədri Murtuz Ələsgərov Rusiya parlamentinin AŞPA-dakı nümayəndə heyətinin başçısı, Dövlət dumasının Beynəlxalq məsələlər komitəsinin sədri Dmitri Roqozini qəbul etmişdir. Görüşdə parlamentlərarası münasibətlərin indiki vəziyyəti, Rusiya ilə Azərbaycanın qanunvericilik orqanları arasında əməkdaşlığın perspektivləri, regionda sülhün və təhlükəsizliyin bərqərar edilməsində parlament üzvlərinin rolu haqqında məsələlər müzakirə olunmuşdur. 

Azərbaycan parlamentinin sədri Avropa Şurasının Parlament Assambleyasında Rusiya və Azərbaycan parlament nümayəndə heyətlərinin dövlətlərarası əlaqələrin möhkəmləndirilməsinə kömək edən uğurlu əməkdaşlığını yüksək qiymətləndirdi. O dedi ki, dövlətlərimiz arasında bu gün mövcud olan strateji əməkdaşlıq ilk növbədə prezidentlər Vladimir Putinin və Heydər Əliyevin ümumi səylərinin nəticəsidir. Dövlət başçılarının görüşləri zamanı imzalanmış sənədlər ölkələrimiz arasında qarşılıqlı surətdə faydalı əməkdaşlığın hüquqi əsasını yaratmışdır.

Murtuz Ələsgərov son illərdə parlamentlərarası münasibətlərin dinamik inkişafından danışaraq, Rusiya parlamentinin yuxarı palatasının sədri Sergey Mironovun və Dumanın sədri Gennadi Seleznyovun ölkəmizə səfərlərini xüsusi vurğuladı. O, “Qafqaz dördlüyü” ölkələri parlament sədrlərinin görüşlərinin Cənubi Qafqazda münaqişələrin nizama salınmasında mühüm əhəmiyyəti olduğunu bildirdi.

Milli Məclisin sədri Prezident Heydər Əliyevin rəhbərliyi ilə ölkədə aparılan islahatlar və həyata keçirilən iri iqtisadi layihələr barədə də qonağa məlumat verərək dedi ki, bu layihələr təkcə Azərbaycan xalqının deyil, həm də bütün Qafqaz regionunun rifahının yaxşılaşmasına yönəlmişdir. O, Ermənistanın qeyri- konstruktiv mövqeyi üzündən həll olunmamış Ermənistan- Azərbaycan, Dağlıq Qarabağ münaqişəsini sosial- iqtisadi tərəqqi yolunda əsas maneə adlandırdı. Murtuz Ələsgərov dedi: “ATƏT-in Minsk qrupunun həmsədri, “Qafqaz dördlüyü” ölkələrindən biri kimi Rusiya bu münaqişənin sərhədlərin toxunulmazlığı və dövlətlərin ərazi bütövlüyü prinsipləri əsasında həllində maraqlı olmalıdır”.

Dmitri Roqozin də Rusiya ilə Azərbaycan parlamentləri arasında münasibətlərin səviyyəsini, parlament nümayəndə heyətlərinin Avropa Şurasında bir-birini dəstəkləməsini yüksək qiymətləndirdi. O dedi ki, son illərdə Azərbaycan böyük iqtisadi tərəqqiyə nail olmuşdur ki, bu da dövlətçiliyin möhkəmlənməsi ilə birbaşa bağlıdır. Qonaq vurğuladı ki, ölkələrimizin parlamentləri Qafqaz regionunda sülhü və təhlükəsizliyi möhkəmləndirmək, mühacirət məsələlərini həll etmək, iqtisadi əməkdaşlığı daha da inkişaf etdirmək üçün hüquqi baza yaratmaqda səylərini birləşdirməlidir.

Qəbulda Rusiyanın Azərbaycandakı səfiri Nikolay Ryabov iştirak edirdi.